ކޮވިޑާ ހެދި އެޅި ފިޔަވަޅުތަކުގެ ތެރެއިން މެދުކަނޑާލާފައި އޮތް އެފްއޭއެމް ތިން ވަނަ ޑިވިޝަން ފުޓްބޯޅަ މުބާރާތް މި މަހު ފަހުކޮޅު ފެށޭތޯ ބަލަމުން އަންނަ ކަމަށް އެފްއޭއެމުން މިއަދު ބުނެފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިއުލާނުކުރި ފިޔަވަޅުތަކާ އެއްގޮތަށް އަމަލުކުރުމުގެ ގޮތުން އެފްއޭއެމުން ތިން ވަނަ ޑިވިޝަން ފުޓްބޯޅަ މުބާރާތް މެދުކަނޑާލަން ނިންމީ މިިދިޔަ މެއި މަހު ހަތަރު ވަނަ ދުވަހު އެވެ.
ކޮވިޑް-19 ފެތުރޭތީ ހަރުކަށިކޮށް އެޅި ފިޔަވަޅުތަކަށް ލުއި ދިނުމުގެ ގޮތުން މިއަދު އިއުލާނުކުރި ކަންތައްތަކުގެ ތެރޭގައި ކުޅިވަރުތައް ކުޅެން ހުއްދަ ދިނުން ހިމެނެ އެވެ. މިއާ އެކު ތިން ވަނަ ޑިވިޝަން ފުޓްބޯޅަ މުބާރާތުގައި ވާދަކުރާ ޓީމުތަކުގެ ކުޅުންތެރިން ޕްރެކްޓިސް ކުރަން ވަނީ ފުރުސަތު ލިބިފަ އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) "އަދަދު" އަށް ވިދާޅުވީ ގައިޑްލައިންތަކުގެ ތެރެއިން ޕްރެކްޓިސް ކުރަން މިހާރު ތިން ވަނަ ޑިވިޝަން ޓީމުތަކަށް ފުރުސަތު އެބައޮތް ކަމަށާއި ޓީމުތަކާ ގުޅިގެން އެކަން ކުރިއަށް ގެންދާނެ ކަމަށެވެ.
"މި ވަގުތަށް ހުއްދަދީފައި މި އޮތީ ކުޅިވަރު ހަރަކާތްތައް ކުރިއަށް ގެންދަން. އެކަމަކު މުބާރާތް ބާއްވަން ހުއްދައެއް ނެތް. މިހާރު މި އޮތް ގޮތަށް ކުރިއަށްދާނަމަ އީދު ބަންދު ފަހުން މި މަހު ފަހުކޮޅު މުބާރާތް (ތިން ވަނަ ޑިވިޝަން) އަލުން ފެށޭނެ ކަމަށް މި ބަލަނީ،" ޖަވާ ވިދާޅުވި އެވެ.
ތިން ވަނަ ޑިވިޝަން ފުޓްބޯޅަ މުބާރާތް އެންމެ ފުރަތަމަ ޝެޑިއުލް ކުރީ މިދިޔަ ފެބްރުއަރީ މަހު އެވެ. އެކަމަކު މުބާރާތް ފެށެން ކުޑަ ދުވަސްކޮޅަކަށްވެފައި ވަނިކޮށް ފަސްކުރަން ޖެހުނީ ކޮވިޑް-19ގެ ކޭސްތައް މާލެ ސަރަހައްދުގައި ގިނަވާތީ އެޗްޕީއޭގެ އެންގުމަށް ކުޅިވަރު ހަރަކާތްތައް ހުއްޓާލަން ޖެހުމުންނެވެ. މުބާރާތް އަލުން ފެށުނީ މިދިޔަ އޭޕްރީލް މަހު 18 ވަނަ ދުވަހު އެވެ. ސާދަ ޓީމާ އެކު ކުރިއަށްދާ މި މުބާރާތް މެއި މަހު ހުއްޓާލިއިރު، 12 މެޗެއް ވަނީ ކުޅެ ނިމިފަ އެވެ.
ކޮވިޑްގެ ހާލަތު މިދިޔަ މެއި މަހު ގޯސްވެގެން ފުޓްބޯޅަ ކަލަންޑަރަށް ގެނައި ބަދަލުތަކުގެ ތެރޭގައި ސީޒަން އަވަހަށް ވަނީ ނިންމާލައިފަ އެވެ. އެ ގޮތުން ދިރާގު ދިވެހި ޕްރިމިއާ ލީގުގެ ދެ ވަނަ ބުރާ ހަމައިން ލީގު ނިންމާލައި އެއް ވަނައިގައި އޮތް މާޒިޔާ އަށް ޗެމްޕިއަންކަން ދީފަ އެވެ. އަދި އެ ގޮތަށް ނިންމީ އެފްއޭ ކަޕާއި ޕްރެޒިޑެންޓްސް ކަޕް ނުބާއްވާ ގޮތަށެވެ.
މިދިޔަ މެއި މަހު 30 ވަނަ ދުވަހު ބޭއްވި އެފްއޭއެމްގެ ކޮންގްރެސްގައި އެ އެސޯސިއޭޝަންގެ ރައީސް ބައްސާމް އަދީލް ޖަލީލް ވިދާޅުވީ މި ފަހަރުގެ ތިން ވަނަ ޑިވިޝަން ފުޓްބޯޅަ މުބާރާތް މިހާރު ވަރަށް ގިނަ މެޗު ކުޅެފައިވާއިރު، ވިސްނުމަކީ ކޮވިޑްގެ ހާލަތު ރަނގަޅުވެ، ފުރުސަތު ލިބުނުހާ އަވަހަކަށް ތިން ވަނަ ޑިވިޝަން ފުރިހަަމަ ކުރުމަށް ކަމަށެވެ. އެއީ ދެ ވަަނަ ޑިވިޝަން ކުޅެވެން އޮތީ ތިން ވަނަ ޑިވިޝަނުން ޓީމުތަކެއް ޕްރޮމޯޓްވެގެން ކަމަށްވާތީކަން ބައްސާމް ފާހަގަކުރެއްވި އެެވެ.
ތިން ވަނަ ޑިވިޝަން މެދުކަނޑާލާފައި މި އޮތް މުއްދަތުގައި ވެސް އެ މުބާރާތުގައި ކުޅޭ ޓީމުތަކުގެ ބިދޭސީ ކުޅުންތެރިން ވަނީ މާލޭގައި ބަހައްޓައިފަ އެވެ. އެއީ މުބާރާތް ކުރިއަށްދާނެ ކަމުގެ އުއްމީދުގަ އެވެ.
އާންމު ގޮތެއްގައި ދެ މަހެއްހާ ދުވަސްތެރޭ ނިމޭ ގޮތަށް ރޭވިގެންދާ ތިން ވަނަ ޑިވިޝަން މުބާރާތް މި ފަހަރު މި އޮތީ ވަރަށް ބޮޑަށް ދިގުލައި ގޮސްފަ އެވެ. މިހާރު މި އޮތް ގޮތުން ބައެއް ޓީމުތަކަށް އެންމެ އަވަހަށް ވެސް ތިން ވަނަ ޑިވިޝަން ފުރިހަމަކުރެވޭނީ ނުވަ މަހުންނެވެ. މިހެންވެ، މި ފަހަރުގެ ތިން ވަނަ ޑިވިޝަންގެ ކްލަބްތަކަށް މާލީގޮތުން ވަރަށް ބޮޑު ބުރައެއް ވަނީ އުފުލަން ޖެހިފަ އެވެ.
