ޕެރިސް، ފްރާންސް (ޖުލައި 7) - އިރާނުގެ ނިއުކްލިއާ ޕްރޮގްރާމުގެ ދަށުން ޔުރޭނިއަމް މުއްސަނދި ކުރަން އިތުރު މަސައްކަތްތައް ފަށާފައި ވާތީ ޔޫރަޕުގެ ގައުމުތަކުން ކަންބޮޑުވުން ފާޅުކޮށްފި އެވެ.
"އެންމެ ފަހުން އެޅި ފިޔަވަޅުތަކާ އެކު އިރާނުން ދަނީ ވިއެނާގައި ކުރިއަށްދާ މަޝްވަރާތަކުން ކާމިޔާބު ނަތީޖާއެއް ނެރުމަށް ހުރަސް އަޅަމުން،" އިނގިރޭސި ވިލާތް، ފްރާންސް އަދި ޖަރުމަނުގެ ފޮރިން މިނިސްޓަރުން ނެރުއްވި ބަޔާނެއްގައި ވިދާޅުވި އެވެ.
އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އިން އަންގާރަ ދުވަހު ބުނީ އިރާނުން މަސައްކަތް ކުރަނީ 20 ޕަސެންޓާ ހަމައަށް ޔުރޭނިއަމް މުއްސަނދި ކުރަން ކަމަށެވެ.
އައިއޭއީއޭގެ ބަޔާނެއްގައި ބުނީ މުއްސަނދު ކުރާ ޔުރޭނިއަމް ފޮނުވާނީ އިސްފަހާންގައި ހުންނަ ފިޔުލް އުފައްދާ ޕްލާންޓުގެ ރިސާޗް އަދި ޑެވެލޮޕްމަންޓް ލެބޯޓަރީއަކަށް އިރާނުން އެންގި ކަމަށެވެ.
އޭގެ ބޭނުމަކީ ރިސާޗް ރިއެކްޓަރަކަށް ބޭނުންވާ ހަކަތަ އުފެއްދުން ކަމަށް އިރާނާ ހަވާލަދީ އެ އެޖެންސީން ބުންޏެވެ.
ޔޫރަޕްގެ ތިން މިނިސްޓަރުން ވިދާޅުވީ އެއީ 2015 ވަނަ އަހަރު އެކުލަވާލި ނިއުކްލިއާ އެއްބަސްވުމާ ދެކޮޅަށް ހިންގާ "ސީރިއަސް އަމަލެއް" ކަމަށެވެ.
"ޔުރޭނިއަމް ދަގަނޑު އާރް އެންޑް ޑީ އުފެއްދަން ޖެހޭ އެއްވެސް މަދަނީ ބޭނުމެއް އިރާނަކަށް ނެތް. މިއީ ނިއުކްލިއާ ހަތިޔާރު އުފައްދަން އަޅާ މުހިއްމު ފިޔަވަޅެއް،" މިނިސްޓަރުންގެ ބަޔާނުގައި ވިދާޅުވި އެވެ.
ނަމަވެސް އިރާނުން ތަކުރާރުކޮށް ބުނަމުން ދަނީ ޔުރޭނިއަމް މުއްސަނދި ކުރަނީ ނިއުކްލިއާ ހަތިޔާރު އުފައްދަން ނޫން ކަމަށާއި މިއީ ހަކަތަ އުފައްދަން ކުރާ މަސައްކަތެއް ކަމަށެވެ.
