ދުވަސް ނުފުރައި އެންމެ 29 ހަފުތާ (ހަތް މަހުގައި)، ކުއްލިގޮތަކަށް ސިރޭރިއަނަކުން އެއްމާބަނޑު ދެ ކުދިން ނަގަން ޖެހުމުން ކަންބޮޑުވުން އޮތެވެ. އިމަޖެންސީ ހާލަތަށް ބަލައި ހޮސްޕިޓަލުން ބުނީ ދެ ކުދިން ސަލާމަތްވާނެ ކަމަށް އޮތީ "ފިފްޓީ، ފިފްޓީގެ ޗާންސެއް" ކަމަށެވެ. ދެމަފިރިންގެ ހިތުގެ ވިންދު ހުއްޓި ނާއުއްމީދު ވި އެވެ.
އެކަމަކު، ކުޅުދުއްފުށީ ހޮސްޕިޓަލުގެ ޑޮކްޓަރުންނާއި މެނޭޖްމަންޓުން ދިނީ ވަރަށް ބޮޑު ޔަގީން ކަމެކެވެ. ގިނަ ބަޔަކަށް އިތުބާރު ބޮޑު، އައިޖީއެމްއެޗާ އެއް ފެންވަރެއްގައި އެ ހޮސްޕިޓަލުގައި އެ ދެމަފިރިންނަށް ފަރުވާގެ ކަންކަން ފުރިހަމަކޮށްދޭނެ ކަމެވެ.
އެކަން ގަބޫލުކުރުމުގައި އުނދަގޫތަކެއް ހުއްޓެވެ.
އެހެންވިޔަސް މިދިޔަ މެއި މަހުގެ 27 ގައި ހޮސްޕިޓަލުގައި އެޑްމިޓްވެ ފަރުވާ ހޯދަން ފެށުން އެއީ ނަސީބެއްގެ ގޮތުގައި އެ ދެމަފިރިން މިއަދު ދެކެ އެވެ. ހޮސްޕިޓަލުން ދިން ޔަގީންކަމަށް ބުރަވެވުނީތީ އެ ދެމަފިރިން މިއަދު އުފާ ވެސް ވެ އެވެ.
ސިޒޭރިއަނަކުން ނެގި ދެ ފިރިހެން ކުދިން ހޮސްޕިޓަލުގައި ހޭދަވި މަހަކަށް ވުރެން ގިނަ ދުވަހާ ގުޅޭ ވީޑިއޯއެއް ހޮސްޕިޓަލުން ވަނީ އާއްމުކޮށްފަ އެވެ.
އެ ވީޑިއޯގައި ވާހަކަ ދެއްކެވި ޑޮކްޓަރުން ވިދާޅުވީ ދުވަސްނުފުރައި އުފަންވި ދެ ކުދިންގެ ބަރުދަނުގައި ކިލޯއެއް ހަމަވީ ކިރިޔާ ކަމަށެވެ. އެހެންވެ، ދެ ކުދިން ގެންގުޅެން ޖެހުނީ މަންމައާ ވަކިން އެންއައިސީޔޫގަ އެވެ.
މަހަކަށް ވުރެން ގިނަ ދުވަސް ފަހުން މިހާރު ވަނީ ހޮސްޕިޓަލުން ދޫކޮށްލައިފަ އެވެ. ދެ ފިރިހެން ކުދިންނާއި މަންމަގެ ހާލު ވެސް ރަނގަޅެވެ.
އަޑުތަކާއި ހިދުމަތުގެ ފެންވަރު ހާސްބައި ތަފާތު
އެ ދެމަފިރިން ވެސް އަބަދު އަޑުއަހަމުން އައީ އަތޮޅު ހޮސްޕިިޓަލްތަކުގައި ދޭ ފަރުވާގެ ހިދުމަތުގެ ފެންވަރު ދަށް ކަމެވެ. އެކަށީގެންވާ ފަރުވާ ނުދެވުމުގެ ކަންބޮޑުވުމެވެ. އެކަމަކު މިއީ ހަގީގަތެއް ނެތް ވާހަކައެއްކަން އެނގުނީ އަމިއްލައަށް ތަޖުރިބާކުރެވުމުންނެވެ.
ދެމަފިރިން ބުނިގޮތުގައި ހޮސްޕިޓަލާ މެދު އަޑުތައް ފެތުރިފައިވާ ގޮތާއި ފަރުވާ އާއި ހިދުމަތް ލިބުނު ގޮތުގައި ހާސްބައިގެ ތަފާތު ހުއްޓެވެ.
"ވަރަށް ރަނގަޅު ހިދުމަތް، ވަރަށް ހިތްހަމަޖެހޭ. އަޅުގަނޑުމެން ދޭންވީ ލޯބި އެހެން ބަޔަކު ދީގެން ބެލެހެއްޓީ ވަރަށް ރަނގަޅަށް،" ދެ ކުދިންގެ މަންމަ ބުންޏެވެ.
ޑޮކްޓަރުންނާއި ނަރުހުން ކަންތައްކޮށްދިން ގޮތަށް އޭނާ ވަރަށް ތައުރީފްކުރި އެވެ.
އެ ހޮސްޕިޓަލުގެ ކުޑަކުދިންގެ ޑޮކްޓަރު އަހްމަދު ހުސެއިން ވިދާޅުވީ ސިޒޭރިއަނަކުން ދެ ފިރިހެން ކުދިން ނެގިއިރު ވަރަށް ހާލު ދަށެވެ. ވިހެއިރު ކިލޯއެއް ހުރި ނަމަވެސް ހޮސްޕިޓަލުން ދޫކޮށްލި އިރު 1.8 އަށް ބަރުދަން އިތުރުވެފައިވާ ކަމަށް ވެސް ވިދާޅުވި އެވެ.
އެ އުމުރުގައި، ފުއްޕާމޭ ފުއްޕާލުމަށް ބޭނުންވާ މާއްދާ އުފެދިފައި ނުހުންނާތީ ވެސް ގޮންޖެހުންތަކެއް ކުރިމަތިވި އެެވެ.
އެ ކުދިންނާ ވަރަށް ގާތުން ހުރިހާ ކަމެއް ބެއްލެވި ޑޮކްޓަރު ދެކެވަޑައިގަންވާ ގޮތުގައި ދެ ކުދިން ސަލާމަތްކުރުމުގައި އުނދގޫތަކެއް ކުރިމަތިވިޔަސް އެއީ ސަރަހައްދީ ހޮސްޕިޓަލަކުން ހޯދި ބޮޑު ކާމިޔާބީއެކެވެ.
ކުޅުދުއްފުށީ ހޮސްޕިޓަލް: ސަރަހައްދީ ހޮސްޕިޓަލްތަކުގެ ތެރެއިން އެތަނުން އަންނަނީ ކާމިޔާބީތަކެއް ހޯދަމުން.
ކުޅުދުއްފުށީ ހޮސްޕިޓަލުގެ ކުޑަކުދިންގެ ޑިޕާޓްމެންޓާ ހަވާލުވެ ހުންނެވި ޑޮކްޓަރު މުހައްމަދު ފައިސަލް ވިދާޅުވީ ދެ ކުދިން ސަލާމަތްކޮށް، ދެމަފިރިންގެ އުފާވެރިކަން ދެމެހެއްޓުމަކީ ހޮސްޕިޓަލުގެ ޑޮކްޓަރުންނާއި ނަރުހުން އަދި މެނޭޖްމަންޓަށް ލިބުނު "ވަރަށް ބޮޑު ހިތްވަރެއް، އަދި ކުރިއެރުމެއް" ކަމަށެވެ.
އެންމެ ބޮޑު ދަތިކަމަކަށް ދިމާވަނީ ކޮންމެ ފަހަރަކު ވެސް ބަލިމީހުންނަށް ހޮސްޕިޓަލުގެ ހިދުމަތްތަކާ މެދު އޮންނަ އިތުބާރާއި ޔަގީންކަން ކުޑަވުން ކަމަށް ވިދާޅުވި އެވެ.
"އަޅުގަނޑުމެން ކިޔައިދިނިން ހުރި ޕޮސިބިލިޓީސްތަކާއި ރިސްކް ފެކްޓާސްތައް ވެސް،" އޭނާ ވިދާޅުވި އެވެ.
އެއީ ކޮންމެ ތަނަކުން ހިދުމަތް ހޯދިއަސް ހުންނާނެ ކަންކަމަށް ވާތީ އެ ވަރު އެދެމަފިރިންނަށް ވިސްނައިދިނެވެ. އެހެންވެ އެހާ ޔަގީންކަމެއް ނުދެވުނަސް ކުރެވެން އޮތް ހުރިހާ ކަމެއް ކޮށްދޭނެ ކަމުގެ ޔަގީންކަން ދިނެވެ.
ފައިސަލް ވިދާޅުވި ގޮތުގައި އެއީ، ޖުމްލަ ގޮތެއްގައި ކުޅުދުއްފުއްޓާއި މުޅި ސަރަހައްދަށް ވެސް ލިބުނު ކާމިޔާބީއެކެވެ. މިއީ، ސިއްހީ ފަރުވާ ހޯދުމުގައިި މާލެއަށް ބަރޯސާވެގެން އުޅެން ޖެހުމުގެ ވިސްނުން ބަދަލުކުރަން ޖެހިފައިވާ ކަން ސާފުވެގެން ދިޔަ ކަމެއްގެ ގޮތުގައި ވެސް އޭނާ ފާހަގަކުރެއްވި އެވެ.
"އަޅުގަނޑުމެންގެ ނިއޮނޭޓަލް ޑިޕާޓްމަންޓުން، ކުޑަކުދިންގެ ޑިޕާޓްމަންޓުން މާލެއަކަށް ކުދިންނެއް ނުފޮނުވާނެ. ވަރަށް މަދު ހާލަތެއްގައި ނޫނީ ނުފޮނުވާނެ،" ފައިސަލް ވިދާޅުވި އެވެ.
އެއްމާބަނޑު ދެބެއިން ސަލާމަތްކޮށް ކުޅުދުއްފުށީ ހޮސްޕިޓަލުން ސާބިތުކޮށްދިނީ، މާލެ އާއި އެއްފެންވަރެއް ނޫނަސް، އެތަނުން ރަނގަޅު ފަރުވާދެވެން އޮތް ކަމެވެ.
