ބ. ތުޅާދޫގެ ގެއެއްގައި މިއަދު ހިނގި އަލިފާނުގެ ހާދިސާއެއްގައި އެގޭގެ ހިފާގެންގުޅޭ ހުރިހާ އެއްޗަކާއި އެ އާއިލާއިން ރައްކާކޮށްފައި ހުރި ފައިސާތައް އަނދައި ހުލިވެ، ބޮޑު ގެއްލުމެއް ލިބިއްޖެ އެވެ.
މިއަދު ހެނދުނު 11:30 ހާއިރު އެ ހާދިސާ ހިނގީ ތުޅާދޫ ހިއްކި ބިމުގައި ހުންނަ ގުލްޝަނީ ހިޔާ ގޭގަ އެވެ. އެގެއަކީ އަބްދުލްބާރީ އާއި ފާތިމަތު ނުޒުހާގެ އިތުރުން އެ މީހުންގެ ކުޑަ ދެ ފިރިހެން ކުދިން ދިރިއުޅޭ ގެ އެވެ. އެއްކޮޓަރި ސިޓިން ރޫމެއް ހުންނަ އެ ގޭގައި އަލިފާނުގެ ހާދިސާ ހިނގި ވަގުތު ގޭގައި މީހަކު ނެތެވެ. އެ ގެއަކީ އެ މީހުންގެ ތިމާގެ މީހެއްގެ ގެ އެކެވެ.
ނުޒުހާގެ ބޭބެ މުހައްމަދު މުމްތާޒް، "އަދަދު" އަށް ބުނީ އައިސް އަލަމާރީގައި ކަރަންޓް ޝޯޓެއް ވެގެން ހިނގި ކަމަށް ބެލެވޭ އެ ހާދިސާގައި އެ ގޭގައި ހިފާ ގެންގުޅޭ ހުރިހާ ސާމާނަކާއި އަންނައުނުގެ އިތުރު ގިނަ އަދަދެއްގެ ފައިސާ އަނދާފައިވާ ކަމަށެވެ.
ތުޅާދޫގައި ހިނގި އަލިފާންގެ ހާދިސާގައި އެ ގެއަށް ބޮޑެތި ގެއްލުންތަކެއް ލިބިފައި: ހިފާ ގެންގުޅޭ ހުރިހާ އެއްޗެއް ވަނީ އަނދައިފައި-- ފޮޓޯ: މުމްތާޒް
"ސިޓިން ރޫމްގައި ހުރި ހުރިހާ އެއްޗެއް އަނދާފައި ވަނީ. އޭގެ ތެރޭގައި ޑަބަލް ބެޑަކާއި އަލަމާރިއަކާއި ބަދިގޭގައި ގެންގުޅޭ ހުރިހާ ސާމާނެއް. އަންނައުނު ވެސް ހުރީ ސިޓިން ރޫމްގެ ހުރި އަލަމާރިއެއްގައި. އެ ހުރިހާ އެއްޗެއް ވެސް އަނދާފައި ވަނީ،" މުމްތާޒް ބުންޏެވެ.
"ދިރިއުޅުމަށް ބޭނުންވާ އެއްޗަކަށް ލިބިފައި ހުންނާނީ ކޮޓަރިތެރޭ ހުރި ފޮތްތައް. ދެން ސްކޫލުން ދީފައި އޮތް ޓެބްލެޓް."
އެ ގޭގައި ދިރިއުޅޭ ދެމަފިރިންނަށް ވަރަށް ފަހުން ތުޅާދޫން ގެއެއް ލިބުމުން އެ މީހުން ތައްޔާރު ވަމުން ދިޔައީ އެ ބިމުގައި ގެއެއް އެޅުމަށެވެ. އެކަމަށް ރައްކާކޮށްފައި ހުރި ފައިސާ ކޮޓަރީގައި ހުރި ގޮދަޑިއެއްގެ ދަށުގައި ބަހައްޓާފައި ހުރިއިރު އެ ހުރިހާ ފައިސާއެއްވެސް ވަނީ އަނދައިފަ އެވެ.
"އެ ފައިސާ އެނދިކަން އެނގުނީމަ އޭނާ [އެގޭ ފިރިހެން މީ] ބޮލުގަ އަތްއަޅާފައި ރޯން ފެށީ. އޭނާ ޝޮކެއްގައި ހުރީމަ އެއީ ކިހާ އަދަދެއްގެ ފައިސާއެއް ކަމެއް އޭނާއަށް ވެސް ބުނެދޭން އަދި ނޭނގެ،" މުމްތާޒް ބުންޏެވެ.
އެ ގޭ ފިރިހެން މީހާއަކީ އެ ރަށު ސްކޫލްގެ މަސައްކަތު މީހާ އެވެ. އެ އާއިލާއަކީ އެހާ ތަނަވަސް ބައެއް ނޫންކަމުން މިއީ އެ މީހުންނަށް ލިބުނު ވަރަށް ބޮޑު ގެއްލުމެއް ކަމަށް އާއިލާއިން ބުނެ އެވެ.
އެ ދެމަފިރިންނާއި ދެ ކުދިން މިވަގުތު ތިބީ އަންހެން މީހާގެ މަންމަ ގޭގަ އެވެ. އެމީހުންނަށް މާލީ އެހީތެރިކަމެއް ދޭން އެރަށު ކައުންސިލުން ވެސް ވަނީ ނިންމައިފަ އެވެ.
