އަޓާމީ، ޖަޕާން (ޖުލައި 4) - ޖަޕާނުގައި ޗުއްޓީ ހޭދަކުރަން މީހުން ގޮސް އުޅޭ އަވަށެއްގައި ހިނގި ނުރައްކާތެރި ބިންގަނޑު ކަނޑައިގެން ދިޔުމުގެ ހާދިސާގައި ގެއްލުނު މީހުން ހޯދުމުގެ މަސައްކަތް ކުރަމުން އެބަ ދެ އެވެ.
ޖަޕާނުގެ މެދުތެރޭގައި އޮންނަ އަޓާމީ ރިސޯޓް އަވަށުގައި މިހާތަނަށް ދެ މީހަކު މަރުވެފައި ވާއިރު، ދިހަ މީހަކު ވަނީ ސަލާމަތްކޮށްފަ އެވެ. އަދިވެސް 20 މީހަކު ގެއްލިގެން ހޯދަމުންދާ ކަމަށް ސަރުކާރުގެ އޮފިޝަލަކު ވަނީ ބުނެފަ އެވެ.
ބޯކޮށް ވާރޭ ވެހޭތާ ދުވަސްތަކެއް ފަހުން، ބިންގަނޑު ކަނޑައިގެން ގޮސް އެ އަވަށުގެ ގެތަކަށް ފަސް އެޅިފައި ވަނީ އިއްޔެ އެވެ.
"ގެއްލުން ލިބުނު ގެތަކާއި އިމާރާތްތަކުގެ އަދަދު 130 އަށް އެރުމަކީ އެކަށީގެންވާ ކަމެއް،" ބޮޑުވަޒީރު ޔޮޝިހިޑޭ ސުގާ ވިދާޅުވި އެވެ.
"މި ވިއްސާރަ މޫސުމުގައި ބޮޑު ސަރަހައްދަކަށް ހުއްޓުމެއް ނެތި ވާރޭ ވެހޭނެ ކަމަށް ބެލެވޭ. ވާރޭ ހުއްޓާލުމުން ވެސް ބިންގަނޑު ކަނޑައިގެން ދިޔުމުގެ އިތުރު ނުރައްކާތެރި ހާދިސާތައް ހިނގާނެ ކަމުގެ ބިރު އެބަ އޮތް،" ސުގާ ވިދާޅުވި އެވެ.
ޝިޒުއޮކާ ޕްރީފެކްޗާގެ އޮފިޝަލަކު ބުނީ މީހުން ސަލާމަތް ކުރުމަށް އާއްމުންގެ 100 މީހުންނާއި 140 ސިފައިން މަސައްކަތް ކުރަމުންދާ ކަމަށެވެ.
ނަމަވެސް ޕަބްލިކް ބްރޯޑްކާސްޓާ އެންއެޗްކޭއިން ފަހުން ބުނީ މޫސުން ގޯސްވުމުގެ ސަބަބުން މީހުން ސަލާމަތް ކުރުމުގެ މަސައްކަތް ވަގުތީ ގޮތުން މެދުކަނޑާލަން ޖެހިފައިވާ ކަމަށެވެ.
ޖަޕާނަށް ކޮންމެ އަހަރަކު ވެސް އަންނަ ވިއްސާރަ މޫސުމުގައި މެދުކެނޑުމެއް ނެތި ގިނަ ހަފްތާތަކެއް ވަންދެން ވާރޭވެހި، ބިންގަނޑު ކަނޑައިގެން ދިޔުމުގެ ހާދިސާތައް ހިނގަ އެވެ.
ސައިންޓިސްޓުން ބުނެފައިވަނީ މޫސުމީ ބަދަލުގެ ސަބަބުން ޖަޕާނުގެ ވިއްސާރަ މޫސުމުގައި ކުރާ އަސަރު ބޮޑުވަމުންދާ ކަމަށެވެ.
