ސޭން ފްރެންސިސްކޯ، އެމެރިކާ (ޖުލައި 4) - އެމެރިކާގެ އައިޓީ ކުންފުންޏަކަށް އަމާޒުކޮށް ދިން ރޭންސަމްވެއާ ހަމަލާއެއްގެ އަސަރު 1000 އަށް ވުރެ ގިނަ ކުންފުންޏަށް ކޮށްފި އެވެ.
އެ ހަމަލާގެ ސަބަބުން ސްވިޑަންގެ އެންމެ ބޮޑު ސުޕާމާކެޓު ޗެއިން، ކޫޕް ސްވިޑަންގެ 800 އަށް ވުރެ ގިނަ ފިހާރަ ވަގުތީ ގޮތުން ބަންދުކުރަން ޖެހުނު ކަމަށް އެ ކުންފުނިން ވަނީ ބުނެފަ އެވެ.
ފަހަކަށް އައިސް އިތުރުވެފައިވާ ރޭންސަމްވެއާ ހަމަލާތަކުގެ ފަހަތުގައި ވަނީ ރަޝިއާގެ ހެކަރުން ކަމަށް ދަނީ ތުހުމަތު ކުރެވެމުންނެވެ. އެމެރިކާގެ ރައީސް ޖޯ ބައިޑެން އާއި ރަޝިއާގެ ރައީސް ލެޑިމިއާ ޕޫޓިންއާ ދެމެދު ދާދި ފަހުން ބޭއްވި ބައްދަލުވުމުގައި ވެސް ވަނީ އެ މައްސަލާގައި މަޝްވަރާ ކުރައްވާފަ އެވެ.
އައިޓީ ކުންފުންޏަށް ދިން ހަމަލާގެ ފުރިހަމަ ތަހުގީގެއް ކުރަން އަމުރު ކުރެއްވުމަށް ފަހު ބައިޑެން ވިދާޅުވީ "މިއީ ރަޝިއާ ސަރުކާރުން ހިންގާ އަމަލެއް ނޫން ކަމަށް ބެލެވުނު ނަމަވެސް، އެކަން ޔަގީން ކުރަން ޖެހޭ" ކަމަށެވެ.
ހަމަލާ އަމާޒު ކުރި އައިޓީ ކުންފުނި، ކަސޭޔާއިން ބުނީ ހަމަލާގެ އަސަރު ކުރާނީ ކުންފުނީގެ ކަސްޓަމަރުންގެ މަދު ޕަސެންޓަކަށްކަން ކަށަވަރުކޮށްފައިވާ ކަމަށެވެ. އެގޮތުން ވީއެސްއޭ ސޮފްޓްވެއާ ބޭނުން ކުރާ 40 ކުންފުންޏަށް އަސަރު ކުރި ކަމަށް ބުންޏެވެ.
ނަމަވެސް ސައިބާސެކިއުރިޓީ ކުންފުނި ހަންޓްރެސް ލެބުން ބުނީ ހަމަލާގައި ގެއްލުން ލިބުނު ކުންފުނިތަކާއެކު މަސައްކަތް ކުރަމުންދާ ކަމަށާއި ހަމަލާ ދީފައި ވަނީ "1000 އަށް ވުރެ ގިނަ ކުންފުނި އެންކްރިޕްޓް" ކުރަން ސޮފްޓްވެއާއަށް ބަދަލު ގެނެސްގެން ކަމަށެވެ.
ނިއުޒީލޭންޑު ސަރުކާރުގެ ކޮމްޕިއުޓާ އެމެޖެންސީ ރެސްޕޯންސް ޓީމުން ބުނީ ހަމަލާގެ ފަހަތުގައި ވަނީ "ރީވިލް" ނަމަކަށް ކިޔާ ހެކަރުންގެ ގްރޫޕެއް ކަމަށެވެ.
ދުނިޔޭގެ އެންމެ ބޮޑު ގެރި މަސް ޕްރޮސެސް ކުރާ ފެކްޓްރީ، ޖޭބީއެސްއަށް މިދިޔަ މަހު ދިން ހަމަލާގެ ފަހަތުގައި ވަނީ ވެސް ރީވިލް ކަމަށް އެފްބީއައިއިން ވަނީ ބުނެފަ އެވެ. އެ ހަމަލާގައި ބްރެޒިލްގެ ފެކްޓްރީއަށް ވަނީ ހެކަރުންނަށް 11 މިލިއަން ޑޮލަރަށް ވާ ވަރުގެ ބިޓްކޮއިން ދޭން ޖެހިފަ އެވެ.
އދ. ގެ ސެކިއުރިޓީ ކައުންސިލުން މިދިޔަ ހަފްތާގައި ވަނީ ފުރަތަމަ ފަހަރަށް ސައިބާ ސެކިއުރިޓީއާ ގުޅޭ ރަސްމީ ބައްދަލުވުމެއް ބާއްވާފަ އެވެ.
ސެކުއިރުޓީ ކައުންސިލުގެ މެމްބަރުން ފާހަގަކުރީ ރޭންސަމްވެއާ ހަމަލާތަކުގެ ސަބަބުން ދުނިޔޭގެ ބޮޑެތި ކުންފުނިތަކަށް ލިބެމުންދާ ގެއްލުމުގެ ނުރައްކާ އިތުރުވަމުންދާ ކަމަށެވެ.
