ރާމަﷲ، ފަލަސްތީން (ޖުލައި 4) - އިޒްރޭލުގެ ސިފައިން ހުޅަނގު އައްސޭރީގައި ބަޑި ޖަހައި، ފަލަސްތީނުގެ ރައްޔިތަކު މަރާލައިފި އެވެ.
އިޒްރޭލުގެ ސިފައިން ނެރުނު ބަޔާނެއްގައި ބުނީ ހުޅަނގު އައްސޭރީގައި ޔަހޫދީ ވަޒަންވެރިންނާއި ފަލަސްތީނު މީހުންނާ ދެމެދު ހަމަނުޖެހުންތަކެއް ހިނގާފައިވާ ކަމަށެވެ.
ހަމަނުޖެހުމާ ގުޅިގެން މީހަކަށް އަމާޒުކޮށް ބަޑި ޖެހި ކަމަށް އިޒްރޭލު ސިފައިން ބުނި ނަމަވެސް، މީހަކު މަރުވި ކަމަށް ބުނެފައެއް ނުވެ އެވެ.
ފަލަސްތީނުގެ ހެލްތު މިނިސްޓްރީން ބުނީ މަރުވެފައިވަނީ މުހައްމަދު ފަރީދް ހަސަން ނަމަކަށް ކިޔާ ޒުވާނެއް ކަމަށެވެ. އޭނާ މަރުވީ ނަބްލޫސް ސިޓީ ކައިރީގައިވާ ގުސްރާ އަވަށުގައި އިޒްރޭލް ސިފައިން ބަޑި ޖެހުމުން ކަމަށް ވެސް ހެލްތު މިނިސްޓްރީން ބުންޏެވެ. އެ ހަމަލާގައި އިތުރު ދެ މީހަކަށް އަނިޔާވި އެވެ.
ފަލަސްތީނުގެ ރަސްމީ ވަފާ ނިއުސް އޭޖެންސީން ބުނީ "ހަސަންގެ ގަޔަށް ބަޑި ޖެހީ އޭނާ ދިރިއުޅޭ ގޭގެ ފުރާޅުމަތީގައި ހުއްޓާ" ކަމަށެވެ.
އިޒްރޭލުގެ ސިފައިން ބުނީ "ނަބްލޫސްގެ ދެކުނުން އޮންނަ ގުސްރާ އަވަށުގައި ފަލަސްތީނުގެ ގިނަ ބަޔަކާއި ޔަހޫދީ ވަޒަންވެރިންނާ ދެމެދު ހިލަ އުކާ ހަމަނުޖެހުން އުފެދުނު" ކަމަށެވެ.
"އެ ތަނުގައި އުޅުނު ސިފައިން ވަނީ ފަލަސްތީނު މީހުންނާއި ޔަހޫދީން ފޮނުވާލުމަށް ރަޔަޓް ގިއަރުގައި މަސައްކަތް ކޮށްފައި،" ބަޔާނުގައި ވެ އެވެ.
"ހަމަނުޖެހުމުގެ ތެރެއިން ތުހުމަތު ކުރެވޭ މީހަކު ވަނީ ސިފައިންނަށް އަމާޒުކޮށް އެއްޗެއް އެއްލާފައި. އެ އެތި ވަނީ ސިފައިންނާ ހަމައަށް ވެއްޓުމުން ގޮވާފައި. ރައްދުގައި ސިފައިން ވަނީ ބަޑި ޖަހާފައި،" އިޒްރޭލު ސިފައިންގެ ބަޔާނުގައި ވެ އެވެ.
އިޒްރޭލާއި ގާޒާ ކޮންޓްރޯލް ކުރާ ހަމާސްއާ ދެމެދު މިދިޔަ މޭ މަހު, 11 ދުވަސް ވަންދެން ހަމަލާ ބަދަލު ކުރި އެވެ. އެތައް ބަޔަކު މަރުވި ފަހުން ހަމަލާތައް ހުއްޓާލީ މޭ 21 ގަ އެވެ.
ހަމަލާތައް ހުއްޓާލަން އެއްބަސްވި ފަހުން ވެސް ދޭތެރެއަކުން ދަނީ ހަމަނުޖެހުން ބޮޑުވަމުންނެވެ. އެގޮތުން މިދިޔަ މަހު ވެސް އަލިފާން ފުއްޕާހަންތައް ފޮނުވުމުން ވައިގެ ހަމަލާ ދިނެވެ.
ޖޫން 18 ވަނަ ދުވަހު ހަމަލާ ބަދަލު ކުރުމަށް ފަހު އިޒްރޭލު ސިފައިންގެ ވެރިޔާ ފައުޖުތަކަށް އެންގީ އަލުން ހަނގުރާމަ ފަށަން ތައްޔާރަށް ތިބުމަށެވެ.
މޭ މަހުގެ ހަމަލާ ބަދަލު ކުރުމުގައި ފަލަސްތީނުން 260 މީހުން މަރުވެ، އިޒްރޭލުން 13 މީހުން މަރުވި އެވެ.
ހަމާސް އިން ގާޒާގެ ކޮންޓްރޯލް ހޯދި 2007 ވަނަ އަހަރުން ފެށިގެން އިޒްރޭލުން ވަނީ އެ ސަރަހައްދު ވަށައިގެން ބަންދުކޮށްލާފަ އެވެ. އިޒްރޭލުން ބުނަނީ ގާޒާގެ ބޯޑަރުތައް ބަންދު ކުރަން ޖެހެނީ އެ ތަނުގައި އުޅޭ ހަނގުރާމަވެރި ގްރޫޕުތައް ކޮންޓްރޯލް ކުރަން ކަމަށެވެ.
