ގުދުސް (ޖުލައި 4) - ގާޒާއިން ފޮނުވި އިންސެންޑިޔަރީ ބެލޫން ނުވަތަ އަލިފާން ރޯވާ ފުއްޕާހަންތަކަކަށް ރައްދު ދިނުމުގެ ގޮތުން އިޒްރޭލުން އަނެއްކާވެސް ވައިގެ ހަމަލާތަކެއް ދީފި އެވެ.
ހަމާސްގެ ސެކިއުރިޓީ މަސްދަރުތަކުން އޭއެފްޕީއަށް ބުނީ އިޒްރޭލުގެ ވައިގެ ހަމަލާތައް އަމާޒުވީ އަސްކަރީ ޓްރެއިނިން މަރުކަޒުތަކަށް ކަމަށެވެ. ހަމަލާތަކުގައި އެއްވެސް މީހަކަށް އަނިޔާވި ކަމެއް ސާފެއް ނޫނެވެ.
"އިޒްރޭލުގެ ސަރަހައްދަށް މިއަދު ފޮނުވި އަލިފާން ފުއްޕާހަންތަކަށް ރައްދު ދިނުމުގެ ގޮތުން އަސްކަރީ ޖެޓުތަކުން ވަނީ ހަމާސް ޓެރަރިސްޓް ޖަމާއަތުގެ ހަތިޔާރު އުފައްދާ އިމާރާތަކަށް ހަމަލާ ދީފައި،" އިޒްރޭލުގެ ސިފައިން ނެރުނު ބަޔާނެއްގައި ބުންޏެވެ.
މިދިޔަ ބުރާސްފަތި ދުވަހު އިޒްރޭލުގެ ފަޔާ ސާވިސްއިން ބުނީ ގާޒާއިން ފޮނުވި އަލިފާން ފުއްޕާހަންތަކެއްގެ ސަބަބުން ދެކުނު އެޝްކޯލް ސަރަހައްދުގެ ހަތަރު ތަނެއްގައި ކުދި އަލިފާންތައް ރޯވި ކަމަށެވެ.
އަލިފާންގަނޑުތައް ވަރަށް "ކުޑަ އަދި ނުރައްކާތެރި ނޫން" ކަމަށާއި ވަރަށް އަވަހަށް ކޮންޓްރޯލް ކުރެވުނު ކަމަށް ފަޔާ ސާވިސްގެ ބަޔާނެއްގައި ބުންޏެވެ.
"އަލިފާން ރޯވުމުގެ ކަންކަން ތަހުގީގު ފަރާތަކުން ބުނެފައިވަނީ އެ ހުރިހާ ތަނެއްގައި ވެސް ރޯވީ ގާޒާއިން ފޮނުވި އިންސެންޑިއަރީ ބެލޫންގެ ސަބަބުން ކަމަށް،" ބަޔާނުގައި ބުންޏެވެ.
އިޒްރޭލާއި ގާޒާ ކޮންޓްރޯލް ކުރާ ހަމާސްއާ ދެމެދު މިދިޔަ މޭ މަހު, 11 ދުވަސް ވަންދެން ހަމަލާ ބަދަލު ކުރި އެވެ. އެތައް ބަޔަކު މަރުވި ފަހުން ހަމަލާތައް ހުއްޓާލީ މޭ 21 ގަ އެވެ.
ހަމަލާތައް ހުއްޓާލަން އެއްބަސްވި ފަހުން ވެސް ދޭތެރެއަކުން ދަނީ ހަމަނުޖެހުން ބޮޑުވަމުންނެވެ. އެގޮތުން މިދިޔަ މަހު ވެސް އަލިފާން ފުއްޕާހަންތައް ފޮނުވުމުން ވައިގެ ހަމަލާ ދިނެވެ.
ޖޫން 18 ވަނަ ދުވަހު ހަމަލާ ބަދަލު ކުރުމަށް ފަހު އިޒްރޭލު ސިފައިންގެ ވެރިޔާ ފައުޖުތަކަށް އެންގީ އަލުން ހަނގުރާމަ ފަށަން ތައްޔާރަށް ތިބުމަށެވެ.
މޭ މަހުގެ ހަމަލާ ބަދަލު ކުރުމުގައި ފަލަސްތީނުން 260 މީހުން މަރުވެ، އިޒްރޭލުން 13 މީހުން މަރުވި އެވެ.
ހަމާސް އިން ގާޒާގެ ކޮންޓްރޯލް ހޯދި 2007 ވަނަ އަހަރުން ފެށިގެން އިޒްރޭލުން ވަނީ އެ ސަރަހައްދު ވަށައިގެން ބަންދުކޮށްލާފަ އެވެ. އިޒްރޭލުން ބުނަނީ ގާޒާގެ ބޯޑަރުތައް ބަންދު ކުރަން ޖެހެނީ އެ ތަނުގައި އުޅޭ ހަނގުރާމަވެރި ގްރޫޕުތައް ކޮންޓްރޯލް ކުރަން ކަމަށެވެ.
