މިއުނިކް (ޖުލައި 2) - ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި މިރޭ ބެލްޖިއަމާ ދެކޮޅަށް ކުޅެން ޖެހުނު ނަމަވެސް އިޓަލީން ތައްޔާރުވާނީ ކުރިން މެޗުތަކުގައި ވެސް އަމަލުކުރި ގޮތަށް އަމިއްލަ ޕްލޭނާ އެއްގޮތަށް ކަމަށާއި ބެލްޖިއަމާ ކުޅެން ޖެހުނު ކަމުގައި ވިޔަސް ވަކި ހާއްސަ ގޮތަކަށް ނުވިސްނާނެ ކަމަށް އިޓަލީގެ ކޯޗު ރޮބާޓޯ މަންޗިނީ ބުނެފި އެވެ.
އިޓަލީން ކުއާޓާގެ ފުރުސަތު ހޯދީ ދެ ވަނަ ބުރުގައި އިތުރު ވަގުތުގެ ދެ ހާފް ކުޅެގެން އޮސްޓްރިއާ 2-1 އިން ބަލިކޮށްގެންނެވެ. ބެލްޖިއަމް ވަނީ 1-0 އިން އެންމެ ފަހުގެ ޗެމްޕިއަން ޕޯޗުގަލް ކަޓުވާލައިފަ އެެވެ. ބެލްޖިއަމާއި އިޓަލީ އަކީ ޔޫރޯގެ ކޮލިފައިން އިން ފެށިގެން މިހާތަނަށް ސައްތަ އިން ސައްތަ ރެކޯޑަކާ އެކު އައި ހަމައެކަނި ދެ ޓީމެވެ.
"އަހަރެމެން ކުޅޭނީ އަހަރެމެންގެ އަމިއްލަ ގޭމް. އަހަރެމެންނަށް ވަރަށް ރަނގަޅަށް އެނގޭ ކުޅެން މި ޖެހެނީ ދުނިޔޭގައި މި ވަގުތަށް ބަލާއިރު އޮތް އެންމެ ވަރުގަދަ ޓީމާ ދެކޮޅަށް ކަން. އެ މީހުން (ބެލްޖިއަމް) ދުނިޔޭގެ ރޭންކިން އެއް ވަނައިގައި މިދިޔަ ތިން އަހަރު ވެސް އޮތީމަ އޭގެއިން ދޭހަވަނީ ވަރަށް ގިނަ ދުވަސްތަކެއް ވަންދެން އެ މީހުން އޮތީ ވަރުގަދަ ކޮށޭ. އެކަން އެހެން އޮތަސް އަހަރެމެން އަމިއްލަ ވިސްނުން ވަކި ގޮތަކަށް ބަދަލެއް ކުރާކަށް ނެތިން،" މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި މަންޗިނީ ބުންޏެވެ.
އަނިޔާގެ ސަބަބުން ބެލްޖިއަމްގެ އެންމެ މުހިއްމު ދެ ކުޅުންތެރިން ކަމަށްވާ ކެވިން ޑި ބްރޭނާ އާއި އެޑެން ހަޒާޑަށް މިރޭގެ މެޗުގައި އިޓަލީއާ ދެކޮޅަށް ނުކުޅެވުމުގެ ފުރުސަތު އެބައޮތެވެ. އެކަމަކު މަންޗިނީ ބުނީ އެއީ އެޑްވާންޓޭޖަކަށް ވުރެ މުޅި މެޗަށް ލިބޭނެ ގެއްލުމެއް ކަމަށެވެ.
"ސަޕޯޓަރުން އެންމެ ބޭނުންވާނީ ދެ ޓީމުގައި ތިބި އެންމެ މޮޅެތި ކުޅުންތެރިން ދަނޑުމަތިން ފެންނަން. އެއީ ފުޓްބޯޅަ އެންމެ ހާއްސަވާނެ ސަބަބަކީ. އަހަރެން އުއްމީދުކުރަނީ އެ ކުޅުންތެރިން ކުޅޭނެ ކަމަށް،" މަންޗިނީ ބުންޏެވެ.
މިއީ ބެލްޖިއަމާއި އިޓަލީ ބޮޑު މުބާރާތެއްގައި ކުޅޭ ފަސް ވަނަ ފަހަރެވެ. އެކަމަކު ނޮކައުޓް ބުރުގައި ކުޅޭ ފުރަތަމަ ފަހަރެވެ. އިޓަލީ އަދި މެޗަކުން ބަލިނުވެ އެވެ. ތިން މެޗުން މޮޅުވިއިރު، ދެ މެޗު ނިމުނީ އެއްވަރުވެގެންނެވެ.
ބައިނަލްއަގުވާމީ މެޗުތަކުގެ ނަތީޖާ އަށް ބަލާއިރު، އިޓަލީ އެންމެ ފަހުން މެޗަކުން ބަލިވީ 2018 ވަަނަ އަހަރުގެ ސެޕްޓެމްބަރު މަހުގަ އެވެ. އެންމެ ފަހުން ކުޅުނު 31 މެޗުގައި ވެސް އިޓަލީ ބަލިވެފައިނުވެ އެވެ. އޮސްޓްރިއާއާ ދެކޮޅަށް އިޓަލީ ކުޅުނު މެޗުގައި އެ ޓީމު ކޮޅަށް ވަން ގޯލަކީ އެންމެ ފަހުން އިޓަލީ ކުޅުނު މެޗުތަކުގައި ޖުމްލަ އެއްކޮށް ބަލާއިރު، 19 ގަޑިއިރާއި 28 މިނިޓް ތެރޭ ވަން ފުރަތަމަ ގޯލެވެ.
އަނިޔާގެ ސަބަބުން އެންމެ ފަހުން މެޗުގައި ނުފެނުނު އިޓަލީގެ ތަޖުރިބާކާރު ޑިފެންޑަރު ޖިއޮޖިއޯ ކިއެލީނީ މިރޭގެ މެޗުގައި ކުޅޭނެ ކަމަށް ބެލެވެ އެވެ. މެޗުގެ ކުރިން އޭނާ ބުނީ އިޓާލިއަން ލީގުގައި އިންޓަ މިލާނަށް މި ފަހަރު ލީގު ކާމިޔާބުކޮށްދީ ލީގުގެ މޮޅު ކުޅުންތެރިއަކަށް ހޮވުނު ބެލްޖިއަމްގެ ފޯވާޑް ރޮމެލޫ ލުކާކޫއާ މެދު ސަމާލުވާން ޖެހޭނެ ކަމަށެވެ.
އިޓަލީ އާ ދެކޮޅަށް ޗެލެންޖަކަށް ނުކުންނަން ބެލްޖިއަމް ތައްޔާރު
ބެލްޖިއަމްގެ ޓީމުގައި މިހާރު އޮތީ އެ ގައުމުގެ ފުޓްބޯޅައިގެ ރަން ޖީލެވެ. އެކަމަކު މިހާތަނަށް އެ ޓީމަށް ބޮޑު މުބާރާތެއްގެ ފައިނަލުގައި ވެސް ނުކުޅެވެ އެވެ. އެންމެ ފަހުން ބޭއްވި ވޯލްޑް ކަޕްގެ ތިން ވަނަ ހޯދިޔަސް އެއީ އެ ޓީމުން އެންމެ ބޭނުންވާ ކާމިޔާބެއް ނޫނެވެ. ދުނިޔޭގެ ރޭންކިންގެ އެއް ވަނައިގައި އޮތް ނަމަވެސް ބެލްޖިއަމްގެ އަސްލު ޓާގެޓަކީ ބައިނަލްއަގުވާމީ ބޮޑު މުބާރާތެއްގެ ތަށްޓެވެ.
މި ފަހަރުގެ ޔޫރޯ ދެ ވަނަ ބުރުގައި އެންމެ ފަހުގެ ޗެމްޕިއަން ޕޯޗުގަލް ބަލިކުރެވުމަކީ ބެލްޖިއަމުން ބޭނުންވާ މިސްރާބަށް ދާން ފިޔަވަޅެއް ކުރިއަށް އެޅުން ކަމުގައި ގިނަ ބަޔަކު ގަބޫލުކުރެ އެވެ. ބެލްޖިއަމްގެ ކޯޗު ރޮބާޓޯ މާޓީނޭޒް ބުނީ ޕޯޗުގަލް އަތުން ލިބުނު މޮޅަށް ފަހު ބެލްޖިއަމުން ކުރިމަތިލާން ޖެހިފައި މި އޮތީ އުނދަގޫ ޗެލެންޖަކާ ކަމަށެވެ.
"އިޓަލީ އަކީ ވަރަށް ރަނގަޅު ސިސްޓަމަކަށް އަހުލުވެރިވެފައި އޮތް ޓީމެއް. އަހަރެމެން މި މެޗުގައި ނަތީޖާ ނެރެން ބަރޯސާވާން ޖެހޭނެ އެއް ބަޔަކީ އަހަރެމެންގެ ޑިފެންސް. އަހަރެމެންނަށް އެޓޭކްކޮށްގެން ކޮންމެ ކަމެއް ވެސް ހާސިލްކުރެވިދާނެ. ސުވާލަކީ ވަރުގަދަ ޗެލެންޖްތައް ނެގޭ ވަރަށް އަހަރެމެންގެ ޑިފެންސް ތައްޔާރުތޯ. އޭގެ މަސައްކަތް މި ކުރަނީ. އިޓަލީއާ ކުޅުމަކީ ޗެލެންޖެއް. އެ އަށް އަހަރެމެން ތައްޔާރު،" މާޓީނޭޒް ބުންޏެވެ.
ބެލްޖިއަމްގެ ކޯޗު މާޓީނޭޒް (ވ) އެ ޓީމުގެ ޑި ބްރޭނާއާ ވާހަކަ ދައްކަނީ.
އެންމެ ފަހުން ބެލްޖިއަމް ކުޅުނު މެޗުގައި އެ ޓީމުގެ ހަޒާޑާއި ޑި ބްރޭނާ އަށް އަނިޔާވެފައިވާއިރު، އެ ޓީމުން އަންނަނީ އެންމެ ފަހު ވަގުތާ ހަމައަށް ވެސް އެ ކުޅުންތެރިން ބޭނުންކުރެވޭތޯ ގޮތްތަކެއް ހޯދަން މަސައްކަތް ކުރަމުންނެވެ. މާޓީނޭޒް ބުނީ ޔަގީނުން ވެސް އެ ދެ ކުޅުންތެރިން މި މެޗަށް 100 ޕަސެންޓް ފިޓްނުވާނެ ކަމަށާއި ހޯދަން ޖެހޭނީ ގޮތްތަކެއް ކަމަށެެވެ.
"މެޑިކަލް ޓީމުން ގޮތެއް ނިންމާނީ. އަހަރެން މި ހުރީ އެންމެ ފަހު ވަގުތާ ޖެހެންދެން ވެސް ފުރުސަތެއް އޮތްތޯ ބަލަން،" މާޓީނޭޒް ބުންޏެވެ.
ބެލްޖިއަމުން އެންމެ ފަހުން ޔޫރޯގެ ސެމީ ފައިނަލުގައި ކުޅުނީ 1980 ވަނަ އަހަރު އިޓަލީގައި ބޭއްވި މުބާރާތުގަ އެވެ. އެ ފަހަރު ފައިނަލުގައި އެ ޓީމު ވަނީ ވެސްޓް ޖާމަނީ އަތުން 2-1 އިން ބަލިވެފަ އެވެ. އެންމެ ފަހުން ޔޫރޯގައި ބެލްޖިއަމް ކެޓީ ކުއާޓާ ފައިނަލްގައި ވޭލްސް އަތުންނެވެ.
ބެލްޖިއަމުން ވަނީ 2015 ވަނަ އަހަރު އެކުވެރިކަމުގެ މެޗެއްގައި 3-1 އިޓަލީ ބަލިކޮށްފަ އެވެ. އެކަމަކު، އެންމެ ފަހުން 2016 ވަނަ އަހަރު ބޭއްވި ޔޫރޯގެ ގްރޫޕް ސްޓޭޖުގައި އިޓަލީން ވަނީ 2-0 އިން ބެލްޖިއަމްގެ މައްޗަށް ކުރިހޯދައިފަ އެވެ. ޖަރުމަނުގެ މިއުނިކް ސްޓޭޑިއަމްގައި މިރޭ ބެލްޖިއަމާއި އިޓަލީ ކުޅޭ މެޗު ފަށާނީ ރާއްޖެ ގަޑިން 00:00 ގަ އެވެ.
