މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް ހެދި ކޮމިޝަނަށް ދެ އަހަރުވެފައިވަނިކޮށް، އެންމެ މުހިންމު ކަމެއް ދީގެން ބަލަމުން އަންނަ ނޫސްވެރިޔާ އަހުމަދު ރިލްވާން އަބްދުﷲ މައްސަލައާ ގުޅޭ މައުލޫމާތު ހިއްސާކޮށް ދިނުމަށް އަނެއްކާވެސް އެދިއްޖެ އެވެ.
ކޮމިޝަނުން މިއަދު ވަނީ ރިލްވާން ގެއްލުވާލި ރޭ ކަންހިނގައިދިޔަ ގޮތް ކިޔައިދީ ތައްޔާރުކޮށްފައިވާ ރީއެނެކްޓްމެންޓް ވީޑިއޯއެއް އާންމުކޮށްފަ އެވެ. އެ ވީޑިއޯގައި ހާމަކޮށްފައިވާ މައުލޫމާތުތަކަކީ މީގެކުރިން ކޮމިޝަނުން ވެސް އާންމުކޮށްފައިވާ މައުލޫމާތުތަކެވެ.
އެގޮތުން ރިލްވާންގެ އެންމެ ފަހުގެ މަންޒަރުތަކާއި، ރަތް ކާރަކަށް ރިލްވާން ގަދަކަމުން އަރުވައިގެން ގެންދިޔަ ކަމަށް އެ ވީޑިއޯގައި ބުނެ އެވެ.
މި ކާރާ ގުޅިގެން ގ. ހިލްޓަން، އާލިފް ރައޫފާއި ގދ. ވާދޫ، ކަރަންކާގޭ، މުހައްމަދު ނޫރައްދީންގެ މައްޗަށް ދައުވާކޮށް ޝަރީއަތް ހިންގި ނަމަވެސް، އެ މައްސަލަ ކުރިމިނަލް ކޯޓުގައި ސާބިތުވެފައެއް ނުވެ އެވެ.
މިއަދު އާންމުކުރި ވީޑިއޯގައި ރިލްވާން އެޕާޓްމެންޓް ކައިރިން ފެނުނު ވަޅިއާ ގުޅޭ މައުލޫމާތު ވެސް ކޮމިޝަނުން ހޯދަމުންދާ ކަމަށް ބުނެފައިވެ އެވެ. އެ ވަޅި ފުލުހުންގެ ބެލުމުގެ ދަށުގައި އޮތްވައި، އެ ބޭރަށް ފޮނުވައިގެން ކޮމިޝަނުން ތަހުލީލުތަކެއްކުރި އެވެ.
އޭގެން ތަހުގީގަށް ކުރިއެރުންތަކެއް ހޯދިފައިވާ ކަމަށް ބުނެފައިވީ ނަމަވެސް، އިތުރު މައުލޫމާތެއް ހާމަކޮށްފައެއް ނުވެ އެވެ.
ކޮމިޝަނުން މިއަދު ބުނި ގޮތުގައި ރިލްވާންގެ މައްސަލާގައި މައުލޫމާތު އެނގޭ މީހުން އާންމުންގެ ތެރޭ ތިބެދާނެ ކަމަށް އެ ކޮމިޝަނަށް އަދިވެސް ގަބޫލުކުރެވެ އެވެ. އެހެންވެ، އެފަދަ މީހެއްވާނަމަ އަވަހަށް އެ މައުލޫމާތެއް ކޮމިޝަނަށް ހިއްސާކޮށްދިނުމަށް ވަނީ އެދިފަ އެވެ.
މައްސަލާގައި ޝަރީއަތަށް ސާބިތު ކުރެވޭ ފަދަ މައުލޫމާތެއް ހިއްސާކުރާ މީހުންނަށް ފަސް ލައްކަ ރުފިޔާގެ ފައިސާގެ އިނާމެއް ވެސް ކޮމިޝަނުން ހުށަހަޅާފައިވެ އެވެ.
ރިލްވާންގެ ދައްތަ ފާތިމަތު ޝެހެނާޒު ވެސް ވީޑިއޯގައި އެދިފައިވަނީ ކޮމިޝަނުން ކުރަމުންދާ ތަހުގީގަށް ބޭނުން ހިފޭނެ އެއްވެސް މައުލޫމާތެއްވާ މީހަކު ނަމަ، އެ މައުލޫމާތެއް އަވަހަށް ހިއްސާކޮށްދީ ރިލްވާންއަށް އިންސާފު ހޯދައިދިނުމަށެވެ.
ކޮމިޝަނުން ވަނީ ރިލްވާންގެ މައްސަލާގައި ތަހުގީގު ހިންގައި މީގެކުރިން ރިޕޯޓެއް އެކުލަވާލާފަ އެވެ. އެ ކޮމިޝަނުން ހިންގި ތަހުގީގުގައި ބައެއް މީހުންގެ ޕާސްޕޯޓް ހިފަހައްޓައި ބައެއް ގެތައް ފާސް ވެސް ކުރި އެވެ. ނަމަވެސް، މިހާތަނަށް އެ މައްސަލާގައި މީހަކަށް ދައުވާ ކުރެވޭވަރު ވެފައެއް ނުވެ އެވެ.
ރިލްވާން ގެއްލުވާލި ރޭ އޭނާގެ އެޕާޓްމެންޓް ކައިރިން ހަޅޭލަވާ އަޑު އިވުނު ކަމަށް ބުނެ ކުރިމިނަލް ކޯޓުގައި ބައެއް މީހުން ހެކިބަސް ދީފައި ވެސް ވެ އެވެ. ކޮމިޝަނުގެ ރިޕޯޓްގައި ބަޔާންކޮށްފައިވާ ގޮތުގައި ލިބިފައިވާ ހެކިތަކަށް ބަލާއިރު ބެލެވެނީ އެ ރޭ ރިލްވާން ކިޑްނެޕްކޮށްގެން ގެންގޮސް، އޭނާ މަރާލީ އެވެ.
