އިންޑިއާގައި ކުރިއަށްދިޔަ އިންޓަ ސްޓޭޓްސް އެތުލެޓިކްސް ޗެމްޕިއަންޝިޕްގައި ވާދަކުރި ރާއްޖޭގެ އަންހެން ރިލޭ ޓީމުގައި ހިމެނިގެން އިންޑިއާގެ އެތުލީޓަކު ދުވި މައްސަލަ ހޫނުވެފައިވާއިރު، އެ އިވެންޓުގައި ދުވީ ގައުމީ ރިލޭ ޓީމެއް ނޫން ކަމަށާއި އެ ޓީމުން ލައިގެން ތިބީ ގައުމީ ޖޯޒީއެއް ވެސް ނޫން ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
އެތުލެޓިކްސް އެސޯސިއޭޝަން އޮފް މޯލްޑިވްސް އިން ނެރުނު ބަޔާނެއް ހިިމަނައިގެން މިނިސްޓަރު މަހުލޫފް މިރޭ ކުރެއްވި ޓްވީޓެއްގައި ދެންނެވި މި ވާހަކަ އަކީ ސަސްޕެންޝަނެއްގައި ހުރުމުން ރަސްމީ ހައިސިއްޔަތުން ދެއްކި ވާހަކައެއް ނޫން ކަމަށް ވަނީ ވިދާޅުވެފަ އެވެ. ޔޫތު މިނިސްޓަރުގެ ޒިންމާ އިން މަހުލޫފް އެކަހެރި ކޮށްފައި ހުރީ އެމްއެމްޕީއާރްސީގެ ހިޔާނާތުގެ މައްސަލައިގެ ތަހުގީގުގައި ޕްރޮސިކިއުޓާ ޖެނަރަލްގެ އޮފީހުން ގޮތެއް ނިންމަންދެނެވެ.
އިންޑިއާގައި ކުރިއަށްދިޔަ ސްޓޭޓް ޗެމްޕިއަންޝިޕްގައި ގިނަ ގައުމުތަކެއްގެ އެތުލީޓުން ވާދަކުރިއިރު، އަންހެނުންގެ ހަތަރެއް ގުނަ 100 ގެ ރިލޭގައި ރާއްޖޭގެ ޓީމުގައި ހިމެނޭ ކުޅުންތެރިން ވާދަކުރީ އިންޑިއާ އެތުލީޓަކު ވެސް ޓީމުގައި ހިމަނައިގެންނެވެ. މި މައްސަލައިގައި ގިނަ ބަޔެއްގެ ހިތްހަމަނުޖެހުން ބޮޑުވެފައިވާއިރު، ގިނަ ބަޔަކު ވަނީ ގައުމީ ޖޯޒީ ލައިގެން އިންޑިއާ އެތުލީޓަކު ލައްވައި ވާދަނުކުރެވޭނެ ކަމަށް ބުނެފަ އެވެ.
އެތުލެޓިކްސް އެސޯސިއޭޝަނުން ނެރުނު ބަޔާނެއްގައި ބުނެފައިވަނީ ދިމާވި ހާލަތެއްގެ ސަބަބުން އެއީ ގައުމީ ޓީމުން ވާދަކުރި އިވެންޓެއް ނޫން ކަމަށާއި އެއީ ގައުމީ ޓީމުގެ އެތުލީޓުންނަށް ލިބުނު ފުރުސަތެއްގައި އިންޑިއާ އެތުލީޓަކު ހިމެނޭ ގޮތަށް ބައިވެރިވި އިވެންޓެއް ކަމަށެވެ. އަދި ބޭނުންކުރީ ގައުމީ ޖޯޒީއެއް ނޫން ކަމަށާއި އެއީ ޓީމުގެ ޓްރެއިނިން ކިޓެއް ކަމަށް އެސޯސިއޭޝަނުން ވަނީ ބުނެފަ އެވެ.
މިނިސްޓަރު މަހުލޫފް ވިދާޅުވީ އޭނާ އަށް މައުލޫމާތު ލިބިފައިވާ ގޮތުގައި ދުވީ ގައުމީ ޓީމެއް ނޫން ކަމަށާއި އަދި ބޭނުންކުރީ ގައުމީ ޖޯޒީއެއް ވެސް ނޫނެވެ.
"އެކުދިންނާ އެކީ އެހެން ގައުމުތަކުގެ އެތުލީޓުން ބައިވެރިވެ ތަމްރީންތައް ލިބުމަކީ، ކުރިއަށް ތާވަލް ކޮށްފައިހުރި ގައުމީ ޓީމުން ވާދަކުރާ ބައިނަލްއަގުވާމީ މުބާރާތްތަކަށް ލިބޭނެ ކުރިއެރުމެއް. އެހެން ދިމާވީ (އިންޑިއާ އެތުލީޓަކު ބައިވެރިކުރަން ޖެހުނީ) ވެސް ކުއްޖެއް (ކޮވިޑަށް) ޕޮސިޓިވް ވެގެެން،" މިނިސްޓަރު ކުރެއްވި ޓްވީޓްގައިވެ އެވެ.
މަހުލޫފް ވިދާޅުވީ ބައިނަލްއަގުވާމީ މުބާރާތްތަކުގައި އެ ގައުމެއްގެ ރަށްވެހިކަން ނެތް ރައްޔިތެއް ފިޔަވައި އެހެން ގައުމެއްގެ ރައްޔިތަކަށް ވާދައެއް ނުކުރެވޭނެ ކަމަށެވެ. އެކަމަކު އެ ގަވާއިދު އިސްތިސްނާވާ ގޮތަށް ކްރިކެޓްގައި ވަކި އުސޫލެއް އޮންނަކަން މަހުލޫފް ވަނީ ފާހަގަކުރައްވައިފަ އެވެ.
"ހަމައެކަނި އައިސީސީ އިން ދުނިޔޭގައި ކްރިކެޓު ކުރިއަރުވަން ކުރާކަމެއް ގޮތަށް އެ ޖާގަ ގައުމުތަކަށް ދީފައި އޮވޭ،" މަހުލޫފް ވިދާޅުވި އެވެ.
"އެންމެ ކުރީއްސުރެ ރާއްޖޭގެ ކްރިކެޓް ޓީމުގައި އައިސީސީގެ ގަވައިދާ އެއްގޮތަށް ރާއްޖޭގައި ދިރިއުޅޭ ބޭރު ގައުމެއްގެ ދެ ތިން ކުޅުންތެރިން އެހެން ގައުމު ތަކެކޭ އެއްގޮތަށް ހިމަނާ. އެތުލެޓިކްސް ޓީމުން އުޅެނީ ތަމްރީނެއްގައި، އެއީ ބައިނަލްއަގުވާމީ އިދާރާއެއްގެ މުބާރާތެއް ނޫން،"
އިންޑިއާ އެތުލީޓު ލައިގެން މި ފަހަރުގެ މުބާރާތުގައި އަންހެން ރިލޭ ޓީމު ތިން ފަހަރު ދުވުނުއިރު، އޭގެ ތެރެއިން އެއް ފަހަރު ގައުމީ ރެކޯޑަށް ވުރެ އަވަސް ޓައިމިންއެއްގައި ނިންމާފައިވެ އެވެ. އެކަމަކު އެތުލެޓިކްސް އެސޯސިއޭޝަނުން ބުނީ މިއީ ރާއްޖޭގެ ގައުމީ ޓީމު ވާދަކުރި އިވެންޓެއް ކަމަށް ނުވާތީ އެއީ ރާއްޖޭގެ ރެކޯޑް ޓައިމިން ކަމަށް އެތުލެޓިކްސް އެސޯސިއޭޝަނުން ވެސް އަދި ދުނިޔޭގެ ފެޑެރޭޝަނުން ވެސް ބަލައިނުގަންނާނެ ކަމަށެވެ.
