ބާސެލޯނާ (ޖުލައި 1) - ބާސެލޯނާގެ ކެޕްޓަން ލިއޮނަލް މެސީ އެ ޓީމާ އެކު ހަދާފައިވާ އެއްބަސްވުން އިއްޔެގެ ނިޔަލަށް މުއްދަތު ހަމަވެއްޖެ އެވެ.
ކޮންޓްރެކްޓް ހަމަވުމާ އެކު ރަސްމީ އުސޫލުން ބަލާކަމަށްވާނަމަ މެސީ އަކީ މިހާރު ބާސެލޯނާ ކުޅުންތެރިއެއް ނޫނެވެ. މިއީ 2000 ވަނަ އަަހަރު ޒުވާން އުމުރުގައި ބާސެލޯނާ އަށް ބަދަލުވި ފަހުން މެސީ އަށް ބާސެލޯނާގައި ކޮންޓްރެކްޓެއް ނެތި ދާ ފުރަތަމަ ފަަހަރެެވެ.
ރިޕޯޓްތައް ބުނާގޮތުން ބާސެލޯނާ އިން މަސައްކަތް ކުރީ މިދިޔަ މަހު 24 ވަނަ ދުވަހު މެސީ އޭނާގެ 34 ވަނަ އުފަން ދުވަސް ފާހަގަކުރިއިރު، ބާސެލޯނާގެ އާ ކޮންޓްރެކްޓްގެ ކަންކަން ރަސްމީކޮށް އިއުލާނުކުރާށެވެ. އެކަމަކު، އެކަން އެ ގޮތަށް ނުކުރެވުނީ ބާސެލޯނާގެ މުޅި ޓީމުގެ މުސާރަތައް މި ވަގުތު ވަރަށް ބޮޑުކޮށް ހުރުމުން އެ ކޮންޓްރޯލް ކުރުމަށް ވަގުތު ބޭނުންވާތީ އެވެ.
މެސީއާ އެކު ބާސެލޯނާ އިން އިތުރު ދެ އަހަރުގެ ކޮންޓްރެކްޓެއް ސޮއިކުރަން ނިންމާފައިވާއިރު، އެކަން ކުރެވެން އޮތީ ބާސެލޯނާގެ މުޅި ސްކޮޑުގެ މުސާރަތައް ލީގުގެ ގަވާއިދު ބުނާ އުސޫލުތަކާ އެއްގޮތަށް ކޮންޓްރޯލް ކުރުމަށް ފަހު އެވެ. މެސީއާ އެކު ބާސެލޯނާ އިން އާ ކޮންޓްރެކްޓްގައި ސޮއިކުރި ނަމަވެސް އެ އެއްބަސްވުން ރަޖިސްޓްރީ ކޮށްދޭން ލަލީގާ އިން ނިންމާފައިވަނީ ބާސެލޯނާގެ މުޅި މާލީ ހާލަތާއި މުސާރައިގެ ކަންތައްތަކުގެ ފުރިހަމަ ރިޕޯޓްތައް ލިބުމުންނެވެ. އެއީ މެސީ އަކީ ބާސެލޯނާގެ އެންމެ ބޮޑު މުސާރަ ލިބޭ ކުޅުންތެރިޔާ ކަމަށްވާތީއާ ވެސް އެކު އެވެ.
ބާސެލޯނާއާ އެކު މެސީ ހަދާފައިވާ ކޮންޓްރެކްޓް އިއްޔެގެ ނިޔަލަށް މުއްދަތު ހަމަވެފައިވާއިރު، މިހާރު މެސީ ބޭނުންނަމަ ހިލޭ ޓްރާންސްފާއެއްގައި ބޭނުން ޓީމަކަށް ސޮއިކުރެވޭނެ. އޭނާ ހޯދަން މީގެ ކުރިން މެންޗެސްޓާ ސިޓީ އާއި ޕީއެސްޖީން މަސައްކަތްކުރި ނަމަވެސް ފަހަކަށް އައިސް އެ ވާހަކަތައް އޮތީ މަޑުޖެހިފަ.
ބާސެލޯނާ ދޫކޮށްލަން ބޭނުންވާކަން މިދިޔަ އަހަރު މެސީ ވަނީ އިއުލާނުކޮށްފަ އެވެ. އެއީ އޭރު އެ ކްލަބްގެ އިސްވެރިންގެ ގޮތުގައި ތިބި ކްލަބްގެ ރައީސް ޖޯސެފް މާރިއާ ބާޓޮމެއުގެ ލީޑަޝިޕާ މެދު ވަރަށް ބޮޑަށް ހިތްހަމަނުޖެހިގެންނެވެ. އެކަމަކު މެސީ އެދުނު ގޮތަށް އޭނާ ވިއްކާލަން ބާޓޮމެއު ދެކޮޅު ހެދި އެވެ.
މިދިޔަ އަހަރު އޮގަސްޓް މަހުގެ 26 ވަނަ ދުވަހު މެސީ ބާސެލޯނާ ދޫކޮށްލަން ހުށަހެޅީ ހިލޭ ޓްރާންސްފާއެއްގަ އެވެ. އެއީ ކޮންޓްރެކްޓްގައިވާ ވަކި މައްދާއެއްގެ ދަށުންނެވެ. އެކަމަކު ބާސެލޯނާ އިން ބުނީ ކޮންޓްރެކްޓްގައިވާ އެ މާއްދާގެ މުއްދަތު ޖޫން 10 ވަނަ ދުވަހު ހަމަވެފައިވާ ކަމަށެވެ. ބާސެލޯނާގެ ވާހަކަތަކަށް ތާއީދުކޮށް ސްޕެނިޝް ލީގުން ވެސް ވަނީ މެސީ އަށް ކްލަބް ބަދަލުކުރެވޭނީ އޭނާ ގެންދަން ބޭނުންވާ ކްލަބަކުން 700 މިލިއަން ޔޫރޯ (624 މިލިއަން ޑޮލަރު) ދެއްކުމުން ކަމަށް ބުނެފަ އެވެ.
ލަލީގާ އާއި ބާސެލޯނާ އިން އެންމެ ފަހު ވަގުތާ ޖެހެންދެން ވެސް މެސީ އަށް ކްލަބް ބަދަލުކުރެވޭނީ އެ އަގު ދައްކައިގެން ކަމަށް ބުނަމުންދިއުމާ އެކު މެސީ އެންމެ ފަހުން ކްލަބްގައި މަޑުކުރަން ނިންމީ އެވެ. ގޯލް.ކޮމް އަށް އޭރު ދިން އިންޓަވިއުއެއްގައި މެސީ ބުނީ ކްލަބްގައި މިދިޔަ ސީޒަނުގެ ނިޔަަލަށް އޭނާ ކޮންޓްރެކްޓް ނިމެންދެން މަޑުކުރަން ނިންމީ ހުރިހާ ގޮތަކަށް ވިސްނުމަށް ފަހު ކަމަށެވެ. އަދި ގަދަބާރުން އޭނާ އެންމެ ލޯބިވާ ކްލަބް ބާސެލޯނާ ދޫކޮށްލަން ބޭނުމެއްނުވާތީ އެ ޓީމުގައި މަޑުކުރީ ކަމަށް މެސީ ބުންޏެވެ.
މީގެ ތިން މަސް ކުރިން ބާސެލޯނާގެ ރައީސް ކަމަށް އިންތިހާބުވި ޖޮއާން ލަޕޯޓާ އަންނަނީ މެސީ އެ ކްލަބާ އެކު އާ ކޮންޓްރެކްޓެއްގައި ސޮއިކުރަން ހުރިހާ ކަމެއް ނިމިފައިވާ ކަމަށް ތަކުރާރުކޮށް ވިދާޅުވަމުންނެވެ. އެކަަމަކު، މިހާތަނަށް މެސީ އާ ކޮންޓްރެކްޓެއްގައި ސޮއިކުރުމުގެ ހުރިހާ ކަމެއް ރަސްމީކޮށް ނުނިމޭތީ ބާސެލޯނާގެ ބައެއް ސަޕޯޓަރުންގެ ކަންބޮޑުވުންތަކެއް ވެސް އެބަހުއްޓެވެ.
މި ވަގުތު އާޖެންޓީނާއާ އެކު ކޮޕަ އެމެރިކާ ފުޓްބޯޅަ މުބާރާތުގައި ކުޅެމުން އަންނަ މެސީގެ އޭޖެންޓް އަދި ބައްޕަ ޖޯޖް މެސީ ވަނީ ބާސެލޯނާގެ ރައީސް ލަޕޯޓާއާ އެކު މެސީގެ މުސްތަގުބަލާ ބެހޭގޮތުން މަޝްވަރާކުރަން މި އަހަރު ފެށި ފަހުން ވެސް 10 އަކަށް ވުރެ ގިނަ ފަހަރު ބައްދަލުކޮށްފަ އެވެ. މުސާރަ ކުޑަކޮށް ދެ އަހަރުގެ އެއްބަސްވުމެއްގައި ސޮއިކުރަން މެސީ އެއްބަސްވެފައިވާ ކަމަށް މި މަހު ފްރާންސް އަދި ސްޕެއިންގެ ނޫސްތަކުން ވަނީ ރިޕޯޓްކޮށްފަ އެވެ.
