ވެލާނާ އިންޓަނޭޝަނަލް އެއާޕޯޓުގައި މުޒާހަރާ ކޮށްގެން ހުކުމް ކުރި އެމްޑީޕީ އަންހެނުންގެ ރޫހުގެ މެންބަރުންގެ މައްސަލައިގައި އޭރުގެ ޕްރޮސެކިއުޓާ ޖެނެރަލް މުހްތާޒު މުހުސިން މައާފަށް އެދެން ޖެހޭ ކަމަށް ބުނެ އިންތިގާލީ އިންސާފުގެ އޮމްބަޑްސްޕާސަންގެ އޮފީހަށް މައްސަލައެއް ހުށަހަޅައިފި އެވެ.
މާޗް، ފަހެއް، 2015 ގައި އިބްރާހީމް ނާސިރު އިންޓަނޭޝަނަލް އެއާޕޯޓުގައި، ރައީސް މުހުއްމަދު ނަޝީދު މިނިވަން ކުރުމަށް ގޮވާލައި މުޒާހަރާ ކޮށްފައިވާތީ ތިން މަސް ދުވަހުގެ ޖަލު ހުކުމެއް އިއްވާފައިވަނީ އެމްޑީޕީގެ 13 އަންހެނުންނަށާއި އެއް ފިރިހެނަކަށެވެ. އެ ހުކުމް އިއްވީ ތިން އަހަރު ދުވަހުގެ މުއްދަތަށް މިހުކުމް ތަންފީޒުނުކޮށް ފަސްކުރާ ގޮތަށެވެ.
މިދިޔަ އާދިއްތަ ދުވަހު އިންތިގާލީ އޮފީހަށް މައްސަލަ ހުށަހެޅީ އެ ހުކުމް އައިސްފައިވާ މީހުންގެ ތެރެއިން އެމްޑީޕީގެ އަންހެނުންގެ ރޫހުގެ ރައީސާ އަދި މާލޭ ސިޓީގެ ކުރީގެ މޭޔާ ޝިފާ މުހައްމަދާއި، ހ.ވެޔޮވިލާ، ޝަފިއްޔާ ޒުބައިރާއި، ސ.ހުޅުދޫ، ކަޅުމަގިގޭ، މަރްޔަމް ޒުބައިރު (މަންދީ) އާއި ވެމްކޯގެ ޗެއާމަން މުހައްމަދު އިބްރާހިމް މަނިކެވެ.
ހުށަހެޅި މައްސަލައިގައި އެދިފައިވަނީ، މައްސަލަ ހިނގިއިރު ހުރި ޕްރޮސިކިއުޓާ ޖެނެރަލް މުހުތާޒް މާފަށް އެދުމަށް އެންގުމަށާއި، ސުޕްރީމް ކޯޓުން މި މައްސަލަ ބަލައިގަތުމަށް ސުޕްރީމް ކޯޓަށް އަލުން ހުށަހެޅުމަށެވެ.
އޭގެ އިތުރުން ސުޕްރީމް ކޯޓަށް މި މައްސަލަ އިސްތިއުނާފު ކުރުމަށް، ޕޮރޮސިކިއުޓާ ޖެނެރަލްގެ އޮފީހުގައި އަލުން އެދުމަށާއި މި މައްސަލަ ހައްލު ކުރަން މަސައްކަތް ކުރާނެކަމުގެ ޔަގީންކަން މިހާރުގެ ޕީޖީގެ ފަރާތުން ހޯދުމުގެ އިތުރުން ކްރިމިނަލް ރިކޯޑުން އުނިކޮށްދޭން ވެސް އެދިފައިވެ އެވެ.
އެ 14 މީހުންގެ މައްޗަށް ކްރިމިނަލް ކޯޓުން ކުރި ހުކުމަށް ހައި ކޯޓުން ވެސް ވަނީ ތާއީދު ކޮށްފަ އެވެ. އަދި އެ މައްސަލަ ސުޕްރީމް ކޯޓުގައި އިސްތިއުނާފު ކޮށްފައެއް ނުވެ އެވެ.
ދައުލަތުގެ މުއައްސަސާއަކުން ނުވަތަ ދައުލަތުގެ ވެރިއެއްގެ ސަބަބުން އިންސާނީ ނުވަތަ އަސާސީ ހައްގުތައް ގެއްލިފައިވާ މައްސަލަތައް ހުށަހެޅުމަށް އިންތިގާލީ އިންސާފުގެ އޮމްބަޑްސްޕާސަންގެ އޮފީހުން މިމަހު ކުރީކޮޅު ވަނީ ހުޅުވާލައިފަ އެވެ.
އިންތިގާލީ އިންސާފުގެ ގާނޫނުގައި ބުނެފައިވާ ގޮތުން އޮމްބަޑްސްޕަރސަންގެ އޮފީހަށް ތަހުގީގު ކުރެވޭނީ ޖެނުއަރީ 1953، އިން ފެށިގެން ނޮވެމްބަރު، 17، 2018 އާ ހަމައަށް ހިނގާފައިވާ ހާދިސާތަކެވެ.
އިންތިގާލީ އިންސާފުގެ ގާނޫނުގައި ބުނެފައިވާ ގޮތުން ނިޒާމީ ގޮތުން ރާވައިގެން އިންސާނީ ހައްގުތައް ގެއްލުވާލާފައިވާ މައްސަލަތައް "ދެނެގަނެ، އެކަމުގައި ޒިންމާވާ ދައުލަތުގެ މުއައްސަސާތަކާއި އެކަންކުރި ފަރާތްތަކުގެ މައްސަލަތައް ބަލައި، ހަގީގަތާ ހަމައަށް ވާސިލުވުމަކީ" އޮމްބަޑްސްޕަރސަންގެ އޮފީހުގެ ޒިންމާއެކެވެ.
