ނިއު ޔޯކް، އެމެރިކާ (ޖޫން 29) - ޔުނައިޓެޑް އެއާލައިންސްގެ ތާރީހުގައި މިހާތަނަށް އެންމެ ބޮޑު އޯޑަރު ދީފައިވާ ކަމަށް އެ އެއާލައިނުން ބުނެފި އެވެ.
އެމެރިކާގެ އެއާލައިނުން ވަނީ ބޮއިންގް މަރުކާގެ 270 އާ ބޯޓާއި 70 އެއާބަސް ޖެޓު ގަންނަން އޯޑަރު ދީފި އެވެ. އެ އޯޑަރުގެ ޖުމްލަ އަގަކީ 35.4 ބިލިއަން ޑޮލަރެވެ.
ޔުނައިޓެޑް އެއާލައިންސްގެ ބޯޑުން އެކަން ސިފަކުރީ ކޮވިޑް ވެކްސިނާ ގުޅިގެން ބަލިމަޑުކަމަށް ފަހު ވައިގެ ދަތުރުފަތުރަށް އިންގިލާބީ ބަދަލެއް އައުމުގެ ގޮތުގަ އެވެ.
އެހެން ނަމަވެސް، މި އަހަރުގެ އޭޕްރިލް މަހުން ޖޫން މަހުގެ ނިޔަލަށް ވެސް ޔުނައިޓެޑާއި އެހެން ބޮޑެތި އެއާލައިންތަކަށް ގެއްލުން ވާނެ ކަމަށް ބެލެވެ އެވެ.
ޔުނައިޓެޑުން ކުރާ ދަތުރުތައް 60 ޕަސެންޓު މަދުވެފައި ވާއިރު، އެންމެ ބޮޑަށް އަސަރުކޮށްފައިވަނީ ބައިނަލްއަގްވާމީ ދަތުރުތަކަށެވެ.
އެ އެއާލައިނުން ދިން އޯޑަރުގެ އެންމެ ބޮޑު ބަޔެއް ހިއްސާ ކުރަނީ ބޮއިންގް އިން އެންމެ ފަހުން އުފެއްދި 737 މެކްސް 10 އެވެ. އޭގެ 150 ބޯޓަށް އޯޑަރު ދީފައި ވެ އެވެ.
ނުރައްކާތެރި ދެ ހާދިސާއަށް ފަހު އެ ބޯޓު އުދުހުން 20 މަހަށް ސަސްޕެންޑުކޮށްފައި ވާއިރު، ޔުނައިޓެޑުން ދިން އޯޑަރަކީ ބޮއިންގް ކުންފުންޏަށް ލިބުނު ކުރިއެރުމެވެ.
ބޮއިންގްއިން މިހާރު ދަނީ 737 މެކްސް 10 ގެ އިތުރު ޓެސްޓުތައް ހަދަމުންނެވެ. އޭގެ އިތުރުން ބޮއިންގް 737 މެކްސް 8 ގެ 50 ބޯޓާއި، އެއާބަސް އޭ321ނިއޯ ގެ 70 ބޯޓަށް ވެސް އޯޑަރު ދީފައި ވެ އެވެ.
