ގައުމީ ޓެކްސް އިދާރާ، މީރާގެ ޓެކްސް އޮޑިޓަރުންގެ ކެޕޭސިޓީ ބިލްޑިން ޕްރޮގްރާމެއް ހިންގަން ޓެކްސް އިންސްޕެކްޓާސް ވިތައުޓް ބޯޑާސް (ޓީއައިޑަބްލިޔުބީ)އާ އެކު އެއްބާރުލުންދިނުމުގެ އެއްބަސްވުމެއްގައި އިއްޔެ ސޮއިކޮށްފި އެވެ.
މީރާގެ ޓެކްސް އޮޑިޓަރުންނަށް އަމާޒުކޮށްގެން ހިންގާ މި ޕްރޮޖެކްޓަކީ ދެ އަހަރު ދުވަހުގެ ޕްރޮގްރާމެކެވެ. މި ޕްރޮޖެކްޓުގެ ތެރެއިން މީރާގެ އޮޑިޓަރުންގެ ފަންނީ ގާބިލުކަން އިތުރުކުރުމާއި، ޓޫރިޒަމް ދާއިރާގެ އިންޓަނޭޝަނަލް ޓެކްސް ގޮންޖެހުންތައް ހައްލުކުރާނެ ގޮތްތައް ދަސްކޮށްދޭނެ އެވެ.
ޓީއައިޑަބްލިޔުބީއާ ގުޅިގެން މީގެ ޕްރޮގްރާމެއް މީރާއިން އެންމެ ފުރަތަމަ ހިންގީ 2018 ގައެވެ.
އެ އެއްބަސްވުމާ ގުޅިގެން ބޭއްވި ބައްދަލުވުމުގައި ކޮމިޝަނާ ޖެނެރަލް އޮފް ޓެކްސޭޝަން ފަތުހުﷲ ޖަމީލް ޓީއައިޑަބްލިޔުއާ ގުޅިގެން ހިންގި މި ޕްރޮގްރާމުގެ ކާމިޔާބީއާ ގުޅޭގޮތުން ވާހަކަ ދައްކަވާފަ އެވެ. އަދި ކުރިން ބޭއްވި ޕްރޮގްރާމްގެ ތެރެއިން ޓްރާންސްފާ ޕްރައިޒިން މަސައްކަތުގެ އުކުޅުތައް މީރާގެ އޮޑިޓަރުން އުނގެނުނުކަން ފާހަގަކުރައްވާފަ އެވެ.
ޓެކްސް އިންސްޕެކްޓާސް ވިތްއައުޓް ބޯޑާސްއާ ގުޅިގެން މީރާއިން ފެށި ޓެކްސް އޮޑިޓަރުންގެ ކެޕޭސިޓީ ބިލްޑިން ޕްރޮގްރާމް: މި ޖަމިއްޔާއާ ގުޅިގެން 2018 ގައި ހިންގި ޕްރޮގްރާމް ވަރަށް ކާމިޔާބު -- ފޮޓޯ: މީރާ
ޓެކްސް ކޮމިޝަނަރުގެ ވާހަކަތަކަށް ތާއީދުކުރައްވާ ޓީއައިޑަބްލިޔުބީގެ ވެރިޔާ ރުސުދާން ކެމުލެރިއާ ވިދާޅުވީ އަލަށް ފަށާ ޕްރޮޖެކްޓްގައި ކުރީ ޕްރޮޖެކްޓުގައި ކުރިޔަށް ގެންގޮސްފައިވާ މަސައްކަތްތައް އިތުރަށް ކުރިއަރުވާ ހަރުދަނާވާނެ ކަމަށެވެ.
މި ޕްރޮގްރާމްގެ ބައިވެރިންނަށް ކިޔަވައިދެނީ އޮޑިޓް ދާއިރާގެ ފަންނީ ތަޖުރިބާކާރެއް ކަމުގައިވާ ކޮލިން ހަޗްކިންސް އެވެ. އޭނާ ވަނީ 2012 ވަނަ އަހަރުން ފެށިގެން އަހަރެއްހާ ދުވަސް ވަންދެން މީރާއަށް އިންޓަނޭޝަނަލް އޮޑިޓް ކޮންސަލްޓަންސީ ފޯރުކޮށްދީފަ އެވެ.
ޓީއައިޑަބްލިއުބީ އަކީ އޯގަނައިޒޭޝަން ފޯ އިކޮނޮމިކް ކޯޕަރޭޝަން އެންޑް ޑިވެލޮޕްމަންޓް (އޯއީސީޑީ) އާއި އދ. ގެ ތަރައްގީއާ ބެހޭ ޖަމިއްޔާ ޔޫއެންޑީޕީ ގުޅިގެން ޓެކުހާ ގުޅޭ އޮޑިޓްތައް ކުރިއަށް ގެންދިއުމަށް ބޭނުންވާ އިލްމާއި ހުނަރު، ތަރައްގީވަމުން އަންނަ ގައުމުތަކަށް ފޯރުކޮށްދިނުމުގެ ގޮތުން ފައްޓާފައިވާ ހަރާކާތެކެވެ.
ޓީއައިޑަބްލިއުބީން އަންނަނީ މިހާރު ވެސް ދުނިޔޭގެ 45 ގައުމެއްގައި ޓެކްސް އޮޑިޓް ކެޕޭސިޓީ އިތުރުކުރުމުގެ ޕްރޮގްރާމްތައް ހިންގަމުންނެވެ. އެ ޖަމިއްޔާގެ އީޖާދީ އުކުޅުތައް ބޭނުންކޮށްގެން ގިނަ ގައުމުތަކެއްގެ ޓެކްސް އާމްދަނީ އަދި ކޮމްޕްލަޔަންސް އިތުރުވެފައިވާ ކަމަށް ޓީއައިޑަބްލިއުބީން ބުނެ އެވެ.
