ރާއްޖޭގެ ވެރި ރަށް މާލެ އާއި އެހެން ރަށްތަކުގައި ކޮވިޑް-19 ހަލުވިކަމާއެކު ފެތުރެމުންދިޔުމުން މެއި މަހު އިއުލާން ކުރި ފިޔަވަޅުތަކަށް މާދަމާ އިން ފެށިގެން ލުއިތަކެއް ދޭ އިރު ވެކްސިން ޖެހި މީހުންނަށް ދަތުރު ކުރުމުގެ ފުރުސަތު ނުދީ ބަލިން ރަނގަޅުވެފައި ތިބި މީހުންނަށް އެ ފުރުސަތު ދިނީ އެ މީހުންނަށް ލިބޭ ރައްކާތެރިކަން ބޮޑުވާތީ ކަމަށް ހެލްތު ޕްރޮޓެކްޝަން އެޖެންސީ އިން ބުނެފި އެވެ.
ހެލްތު އެމަޖެންސީ އޮޕަރޭޝަންސް ސެންޓަރުގެ ކޮމިއުނިކޭޝަން ޑިޕާޓްމަންޓުގެ ތަސްލީމާ އުސްމާން ވިދާޅުވީ ވެކްސިނުން ރައްކާތެރިކަން ލިބެނީ ވަކި ޕަސެންޓޭޖަކަށް ކަމަށެވެ. އެކަމަކު އެއާހިލާފަށް ބަލިޖެހި ރަނގަޅުވާތާ 60 ދުވަހުގެ ތެރޭގައި އަލުން އިންފެކްޓްވުމުގެ ފުރުސަތު ނެތް ކަމަށް އޭނާ ވިދާޅުވި އެވެ.
ދިރާސާތަކުން ދައްކާ ގޮތުގައި ކޮވިޑް-19 ޖެހި ރަނގަޅުވާ މީހުން 60 ދުވަހުގެ ތެރޭގައި އަލުން ބަލިވުމަކީ ވަރަށް ނާދިރުކަމެކެވެ. އަދި މުޅި ދުނިޔޭގައި ވެސް އެފަދަ ކޭސްތައް ވަރަށް މަދެވެ.
ރާއްޖޭގައި އެންމެ ގިނައިން ޖަހާފައި ވަނީ އެސްޓްރާޒެނަކާގެ ވެކްސިނެވެ. ޗައިނާގެ ސައިނޮފާމް އާއި ފައިޒާ ވެކްސިން ވެސް ރާއްޖޭގައި ޖެހި އެވެ. ކޮވިޑް-19 ގެ އެކި ވޭރިއަންޓުތަކަށް ވެކްސިނުން ލިބޭ ރައްކާތެރިކަން އެކި މިންވަރަށް ހުންނައިރު އެވްރެޖްކޮށް އަސްޓްރަޒެނަކާ ވެކްސިން ޖަހާ މީހުން ބަލިބޮޑުވާ މިންވަރު 80 ޕަސެންޓު ދަށްކޮށްދެ އެވެ.
ވެކްސިން ޖަހާފައި ތިބި މީހުންނަށް ލުއި ނުދެވުނީ ބޭނުންވާ މިންވަރަށް އާބާދީގެ މީހުން ވެކްސިން ޖަހާފައި ނެތުމުން ކަމަށް ހެލްތު މިނިސްޓަރު އަހުމަދު ނަސީމް އިއްޔެ ވިދާޅުވި އެވެ. ވެކްސިން ޖަހާފައި ތިބި މީހުންނަށް ލުޔެއް ދެވޭނީ އާބާދީގެ 75 ޕަސެންޓު މީހުންނަށް ވެކްސިން ޖަހައިގެން ކަމަށް ވެސް އޭނާ ވިދާޅުވި އެވެ.
ރާއްޖޭގައި މިހާތަނަށް ދެ ޑޯޒު ޖަހާފައިވަނީ އާބާދީގެ 38 ޕަސެންޓް މީހުން ކަމަށް މިނިސްޓަރު ވިދާޅުވި އެވެ.
މިހާރު އިއުލާންކޮށްފައިވާ ހަރުކަށި ފިޔަވަޅުތައް އިއުލާން ކުރުމުގެ ކުރިން ވެކްސިންގެ ދެ ޑޯޒު ޖަހާފައި ތިބި މީހުންނަށް އޮތީ ލުއިތަކެއް ދީފަ އެވެ. އެގޮތުން ރަށް ރަށަށް ދަތުރު ކުރުމުގެ ފުރުސަތު ވެސް އޮތެވެ. އެކަން މަނާ ކުރީ މެއި 26، ގައި އިއުލާން ކުރި ފިޔަވަޅުތަކާއެކު އެވެ.
އިއްޔެ ރައީސް އިބްރާހިމް މުހައްމަދު ސޯލިހު އިއުލާން ކުރެއްވި ލުއިތަކުގެ ތެރޭގައި ކާފިއު ގަޑި ރޭގަނޑު 8:00 ފެށިގެން ފަތިހު 4:00 ލުއި ކުރުން ހިމެނެ އެވެ. ރެސްޓޯރަންޓު އަދި ކެފޭތަކުގެ ހިދުމަތް ކާފިއު ނޫން ގަޑީގައި ހުޅުވާލުމުގެ ހުއްދަ ވެސް އިއްޔެ ސަރުކާރުން ދިނެވެ. އަދި ގައި ދުރުކޮށްގެން ތިބެ މިސްކިތްތަކުގައި ނަމާދު ކުރުމުގެ ހުއްދަ ވެސް ދިނެވެ.
