ޅ. ނައިފަރުގައި އާންމުންގެ މީހަކަށް އަނިޔާކުރި ތިން ފުލުހަކު ވަޒީފާ އިން ވަކިކޮށްފި އެވެ.
މިދިޔަ މަހުގެ 16 ވަނަ ދުވަހުގެ ރޭ ނައިފަރު ޒުވާނަކަށް ފުލުހުން އަނިޔާކުރީ ފުލުހަކު ކައިވެނި ކޮށްގެން އުޅޭ މީހަކާ "ފޮށުނު" ކަމަށް ބުނެ އެވެ.
އެ މައްސަލަ ފެންމަތިވުމާ އެކު އެ ރަށުގައި ޒުވާނުންތަކެއް ވަނީ ފުލުހުންނާ ދެކޮޅަށް މުޒާހަރާ ވެސް ކޮށްފަ އެވެ.
ފުލުހުން ބުނީ ނައިފަރުގައި އާންމުންގެ މީހަކަށް އަނިޔާކުރި ކަމަށް ތުހުމަތު ކުރެވޭ މައްސަލަ ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑް އިން ތަހުގީގުކުރުމަށް ފަހު، އެ މައްސަލައިގައި ތިން ފުލުހަކު ވަޒީފާއިން ވަކިކޮށް އިތުރު ދެ ފުލުހަކު މިހާރު ހުރި މަގާމުން އެއް ރޭންކު ދައްކޮށްފައިވާ ކަމަށެވެ.
އެ ފުލުހުންނަށް ފިޔަވަޅު އަޅާފައި ވަނީ މި މަހުގެ 22 ވަނަ ދުވަހެވެ.
މީގެ އިތުރުން ފުލުހުން ބުނީ އެ މައްސަލާގައި ފިޔަވަޅު އަޅާފައިވާ ފުލުހުން އެ މައްސަލަ އިސްތިއުނާފު ކުރަން ބޭނުން ވާނަމަ ބަންދު ދުވަސްތައް ނުހިމަނާ ހަތް ދުވަހުގެ މުއްދަތެއް ލިބޭނެ ކަމަށެވެ.
