މާލެ ސަރަހައްދުގައި ކޮވިޑުން ރައްކާތެރިވާން އެޅި ފިޔަވަޅުތަކުގެ ނަތީޖާ ފެނުމާއި ގުޅިގެން, ބުރާސްފަތި ދުވަހުން ފެށިގެން ކާބޯތަކެތީގެ ހިދުމަތްދޭ ތަންތަނުގެ ތެރޭގައި ތިބިގެން ހިދުމަތް ދެވޭ ގޮތަށް ލުއި ދޭން ސަރުކާރުން މިއަދު ނިންމައިފި އެވެ.
ކާބޯތަކެތީގެ ހިދުމަތްދޭ ހޮޓާ، ކެފޭ، ރެސްޓޯރަންޓް އަދި ކެންޓީންތައް ހިމެނޭގޮތަށް ސަރުކާރުން ދިން ލުޔާއި ގުޅިގެން ކާފިއު ނޫން ވަގުތުތަކުގައި އިން-ޑައިނިން ހިދުމަތް ދެވޭނެ އެވެ. ބުރާސްފަތި ދުވަހުން ފެށިގެން ތަންފީޒުކުރާ ލުއިތަކުގެ ތެރެއިން ސަރުކާރުން ވަނީ ކާފިއު ހިންގާ ވަގުތު ބަދަލުކޮށް، ރޭގަނޑު 8:00 އިން ފަތިހު 4:00 އަށް ކާފިއު ހިންގާ ގޮތަށް ހަމަޖައްސާފަ އެވެ.
ކާބޯތަކެތީގެ ހިދުމަތްދޭ ތަންތަން އިން-ޑައިނިންއަށް ހުޅުވާލަން ސަރުކާރުން ނިންމީ، އެ ވިޔަފާރިތައް ހިންގާ ފަރާތްތަކުން ކަންބޮޑުވުން ފާޅުކޮށް އިއްޔެ އިހުތިޖާޖުކޮށްފައި ވަނިކޮށެވެ.
އެ އިހުތިޖާޖުގައި ވެސް އެ ވިޔަފާރިވެރިންގެ މައިގަނޑު ގޮތެއްގައި ފާޅުކުރީ އިން-ޑައިނިންއަށް ފުރުސަތު ނެތުމުގެ ސަބަބުން ވިޔަފާރިތައް ބަނގުރޫޓުވަމުންދާ މައްސަލަ އެވެ. އަދި އެތަންތަނަށް އެންމެ ބޮޑު އާމްދަނީއެއް ލިބެނީ ތަނުގައި ތިބެގެން ހިދުމަތް ހޯދާ ކަސްޓަމަރުންގެ ފަރާތުން ކަމުގައިވާތީ، އެ ފުރުސަތު ހުޅުވާލަން ގޮވާލި އެވެ.
ކޮވިޑް ކޭސް ނަމްބަރުތައް އުފުލެމުން ދިޔުމާ ގުޅިގެން ކާބޯތަކެތީގެ ހިދުމަތްދޭ ތަންތަނުގެ ތެރޭގައި ތިބެގެން ހިދުމަތް ދިނުން މަނާކުރީ ހުސްވި މެއި މަހުގެ 11 ގައެވެ. މިހާރު ދިން ލުއިތަކާއެކު ފެބްރުއަރީ މަހުގެ ފަހުކޮޅުން ފެށިގެން ހިދުމަތް ދެމުން ދިޔަ ގޮތަށް ހިދުމަތް ދެވޭނެ އެވެ.
