ހިތްފަސޭހަކޮށްލަން ވަރަށް ގިނަ ބަޔަކު ބޭނުން ކުރާ، މިއުޒިއަމް ކުރިމަތީގައި އޮންނަ ކުޑަ ހިއްތަން މައިޒާނުގައި ހުންނަ، ހިމާޔަތްކޮށްފައިވާ ރީތި ގަހަށް ގެއްލުންވާ ގޮތަށް ފުޑް ކިއޯސްކެއް ހަދަން، ދެކޮޅުކަން ކުރީގެ ހެރިޓޭޖު މިނިސްޓަރު ޔުމްނާ މައުމޫނު ހާމަކުރައްވައިފި އެވެ.
ޔުމްނާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ދާރުލްއާސާރު އާމާރާތް ކުރިމަތީގައި ހުރި، 200 އަހަރަށްވުރެ ގިނަ ދުވަސްވެފައިވާ، ރައްކާތެރިކުރެވިފައިވާ، ރީތި ގަހަށް ގެއްލުން ލިބޭ ގޮތަށް އެއްވެސް މަސައްތެއް ކުރުމަކީ ކުރެވިގެންވާނެ ކަމެއް ނޫން ކަމަށެވެ.
"ހަމަ އެހެންމެ އަޅުގަނޑުމެންގެ ގައުމީ ދާރުލް އާސާރު އެ ހުރީ ރީތި އިމާރާތުގެ ކުރިމަތީ ކެފޭއެއް ހެދީމަ ތަނުގެ ހައިބަތު ގެެއްލި، މަންޒަރު ހުތުރުވާ ކަމަށް އަޅުގަނޑަށް ގަބޫލު ކުރެވޭ،" ޔުމްނާ ވިދާޅުވި އެވެ.
ހިއްތަން މައިޒާނުގައި ކެފޭއެއް ހަދަން ހަވާލުކުރީ މާލީ ސިޓީ ކައުންސިލްގެ މޭޔަރަކަށް އާދަމް ވަޑައިގަތުމުގެ ކުރިންނެވެ. ހުއްދަ ނުހޯދައި އެތަނުގައި ކެފޭގެ މަސައްކަތް ކުރިއަށްގެންދާތީ އެންވަރަމެންޓަލް ޕްރޮޓެކްޝަން އެޖެންސީއިން ވަނީ އެ މަސައްކަތް ހުއްޓުވައިފަ އެވެ. އަދި މާލޭ ސިޓީ ކައުންސިލުން ވެސް ވަނީ އެ މަސައްކަތް ކުރިއަށް ނުގެންދާން އަންގައިފަ އެވެ.
"އަދަދު" އިން ހޮނިހިރު ދުވަހު ގޮސް ބެލިއިރު، އެ މަސައްކަތް ކުރިއަށް ގެންދާ ކުންފުނިން ވަނީ ރީތި ގަސް ބުޑަށް ދަގަނޑުތަކެއް ޖަހައިފަ އެވެ. ގަސް ވަށައިގެން އެ ދަގަނޑުތައް ޖަހާފައި ހުއްޓެވެ.
އެތަނުގައި ފުޑް ކެފޭއެއް ހަދަން ދީފައި ވަނީ 10 އަހަރުގެ މުއްދަތަކަށެވެ. ނަމަވެސް އެތަން ކުއްޔަށް ދިން އަގެއް ނޭނގެ އެވެ.
