ރާމަﷲ، ފަލަސްތީން (ޖޫން 28) - ފަލަސްތީނުގައި ކުރި މުޒާހަރާތައް ކަވަރުކުރި ނޫސްވެރިންނަށް އެކި ހަމަލާތަކާ ކުރިމަތިވި މައްސަލާގައި ނޫސްވެރިން އިހްތިޖާޖުކޮށްފި އެވެ.
ނޫސްވެރިން އިހްޖިތާޖުކޮށްފައި ވަނީ ރާމަﷲ ގައި ހުންނަ އދ. ގެ އިމާރާތެއްގެ ބޭރުގަ އެވެ. ނޫސްވެރިންނަށް ހުރަސްތަކާ ދިމާވީ އެކްޓިވިސްޓެއްގެ މަރަށް ފަހު ހިނގި އެއްވުންތައް ރިޕޯޓު ކުރަން އުޅުމުގެ ތެރޭގަ އެވެ.
ފަލަސްތީނުގެ ސަރުކާރުގެ ކޮރަޕްޝަނާ ދެކޮޅަށް ސޯޝަލް މީޑިއާގައި ވީޑިއޯ ޕޯސްޓު ކުރާ އުމުރުން 43 އަހަރުގެ ނިޒާރް ބަނަތް މަރުވީ މިދިޔަ ބުރާސްފަތި ދުވަހު އެވެ. އޭނާ މަރުވީ ހިބްރޫންގައި އޭނާ ދިރިއުޅޭ ގެޔަށް ފުލުހުން ވަދެގަނެ، ހައްޔަރު ކުރިތާ އިރުކޮޅެއް ފަހުންނެވެ.
މުޒާހަރާ ކުރާ މީހުންނާއި ފުލުހުންނާ ދެމެދު ހިނގާ ހަމަނުޖެހުންތަކުގައި ނޫސްވެރިންނަށް ވެސް ދަނީ އަނިޔާވަމުންނެވެ.
ރިޕޯޓާޒް ވިތައުޓް ބޯޑާޒް އިން ބުނީ ފާއިތުވި ހަފްތާ ބަންދުގައި ހުޅަނގު އައްސޭރީގައި ހިނގި ހަމަނުޖެހުމުގައި 12 ނޫސްވެރިއަކަށް އަނިޔާވި ކަމަށެވެ. އޭގެ ތެރެއިން ފަސް މީހުންނަކީ އަންހެނުންނެވެ. އެ އެންމެންނަށް ވެސް ހަމަލާ ދިނީ ފުލުހުންނެވެ.
ދަ ނިއު އަރަބް ނޫހުގެ ރިޕޯޓަރު ނާއިލާ ހަލީލް ބުނީ ނޫސްވެރިކަމުގެ މިނިވަންކަން ރައްކާތެރި ކުރަން "އަވަސް މުހިއްމު ފިޔަވަޅު އަޅަން" ގޮވާލާ އދ. އަށް ސިޓީއެއް ފޮނުވާފައިވާ ކަމަށެވެ.
އަލްޓްރާ ފަލަސްތީނުގެ ނޫސްވެރިޔާ މުހައްމަދު ގަރަފީ ބުނީ ފުލުހުން އޭނާއަށް ބިރު ދައްކައި، ވީޑިއޯ ކުރުން ހުއްޓާ ނުލައިފި ނަމަ ފޯނު އަތުލާނެ ކަމުގެ އިންޒާރު ދިން ކަމަށެވެ.
ފަލަސްތީނުގެ ރަސްމީ ވަފާ ނިއުސް އޭޖެންސީން ބުނީ ބަނަތުގެ މަރުގެ ފަހަތުގައިވާ މީހުން ޖަވާބުދާރީ ކުރުވާނެ ކަމަށް ބޮޑު ވަޒީރު މުހައްމަދު އިޝްތަޔާ ވިދާޅުވެފައިވާ ކަމަށެވެ.
އޮޓޮޕްސީއިން ދެއްކި ގޮތުގައި ބަނަތުގެ ބޮލާއި، މެ އާއި، ކަރު، އަދި ފަޔާއި އަތަށް އަނިޔާކޮށް ބޮޑެތި ޒަހަމްތަކެއް ލިބިފައި ވެ އެވެ. ބަނަތް މަރުވެފައިވަނީ އޭނާ ހައްޔަރުކޮށްގެން ގެންދިޔަތާ ގަޑިއެއްހާއިރު ތެރޭގަ އެވެ.
މިދިޔަ ބުރާސްފަތި ދުވަހު މަރުވި ބަނަތް ވަނީ އަކީ ޕާލިމެންޓު އިންތިހާބުގައި ވާދަކުރާ ކެންޑިޑޭޓެކެވެ. މިދިޔަ މޭ މަހު ބާއްވަން ހަމަޖެހިފައި އޮތް އިންތިހާބު ވަކި މުއްދަތެއް ނެތް ގޮތަށް ފަސްކުރަން އައްބާސް ވަނީ ނިންމަވައިފަ އެވެ.
