ރިއޯ ޑި ޖަނެއިރޯ (ޖޫން 29) - ކޮޕަ އެމެރިކާ ފުޓްބޯޅަ މުބާރާތުގައި ރޭ ލިއޮނަލް މެސީގެ ދެ ގޯލާ އެކު 4-1 އިން ބޮލިވިއާ ބަލިކޮށް އާޖެންޓީނާ އިން ގްރޫޕްގެ އެއް ވަނަ ހޯދައިފި އެވެ.
އާޖެންޓީނާ އިން ގްރޫޕް އޭގެ އެއް ވަނަ ހޯދީ 10 ޕޮއިންޓާ އެކު އެވެ. ދެ ވަނައިގައި ނިންމާލީ ރޭ ޕެރަގުއޭ އަތުން 1-0 އިން މޮޅުވި އުރުގުއޭ އެވެ. އެ ޓީމަށް ވަނީ ހަތް ޕޮއިންޓް ލިބިފަ އެވެ. ތިން ވަނަ އަށް ދިޔައީ ހަ ޕޮއިންޓް ހޯދި ޕެރަގުއޭ އެވެ. މި ގްރޫޕުން ހަތަރު ވަނަ ޓީމުގެ ގޮތުގައި ކުއާޓާގެ ޖާގަ ހޯދީ ފަސް ޕޮއިންޓް ހޯދި ޗިލީ އެވެ. އެންމެ ފުލަށް ދިޔަ ބޮލިވިއާ އަށް ޕޮއިންޓެއް ނުލިބި ވަނީ ކަޓައިފަ އެވެ.
ބޮލިވިއާއާ ދެކޮޅަށް ރޭ އާޖެންޓީނާ އިން ކުޅުނު މެޗު ފަށައިގެން ހަ މިނިޓް ތެރޭ އެ ޓީމުން ވަނީ ލީޑުނަގައިފަ އެވެ. މި ގޯލު މެސީ ދިން ބޯޅައަކުން ވޮލީ އަކުން ކާމިޔާބުކުރީ ޕާޕޫ ގޯމޭޒް އެވެ. އެހާ ކުރިން ގޯލު ޖަހައި އާޖެންޓީނާ އިން މެޗުގެ ކޮންޓްރޯލް ނެގި އެެވެ. މެޗުގެ 31 ވަަނަ މިނިޓްގައި އާޖެންޓީނާގެ ދެ ވަނަ ގޯލު ޖެހީ ޕެނަލްޓީ އަކުން މެސީ އެވެ. މިއީ ޕާޕޫ ގޯމޭޒް އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
އޭގެ 10 މިނިޓް ފަހުން ސާޖިއޯ އަގުއޭރޯ ދިން ބޯޅައަކުން މެސީ ވަނީ އިތުރު ގޯލެއް ޖަހައިފަ އެވެ. ފުރަތަމަ ހާފު ނިމުމުގެ ކުރިން މެސީ ޖެހި މި ދެ ގޯލާ އެކު މި ފަހަރުގެ ކޮޕަ އެމެރިކާގައި އޭނާ ވަނީ ތިން ގޯލު ޖަހައިފަ އެވެ. މެސީ އަކީ މުބާރާތުގެ ލަނޑު ލިސްޓުގެ ކުރީގައި އޮތް ކުޅުންތެރިޔާ އެެވެ. މި މެޗަކީ މެސީ އަށް ހާއްސަ މެޗެކެވެ. މެސީ ގައުމީ ޓީމަށް 148 ވަނަ މެޗު ކުޅެދިންއިރު، އޭނާ އަކީ އާޖެންޓީނާ އަށް އެންމެ ގިނަ މެޗު ކުޅެދިން ކުޅުންތެރިޔާ އެވެ.
ދެ ވަނަ ހާފްގެ ކުޅުން ފެށިގެން 15 މިނިޓް ތެރޭ ބޮލިވިއާ އިން ގޯލެއް ޖެހި އެވެ. މެޗުގެ 60 ވަނަ މިނިޓްގައި ލިއޯނެލް ޖަސްޓިނިއާނޯ ދިން ބޯޅައަކުން މި ގޯލު ޖެހީ އާވިން ސާވެޑްރާ އެވެ. ބޮލިވިއާ އިން ގޯލު ޖެހިތާ ފަސް މިނިޓް ތެރޭ އަކޫނިއާ ދިން ބޯޅައަކުން ލަޓާރޯ މާޓީނޭޒް ވަނީ އާޖެންޓީނާގެ ހަތަރު ވަނަ ގޯލު ޖަހައިފަ އެވެ.
ރޭ ޕެރަގުއޭ އަތުން އުރުގުއޭ މޮޅުކޮށްދިން ގޯލު ޖެހީ މެޗުގެ 21 ވަނަ މިނިޓްގައި ޕެނަލްޓީ އަކުން އެޑިންސަން ކަވާނީ އެވެ. މިިއީ މި ފަހަރުގެ މުބާރާތުގައި ކަވާނީ ޖެހި ދެ ވަނަ ގޯލެވެ.
ކުއާޓާ ފައިނަލްގެ މެޗުތައް:
ޕެރޫ - ޕެރަގުއޭ (2 ޖުުލައި 2021)
ބްރެޒިލް - ޗިލީ (2 ޖުލައި 2021)
އުރުގުއޭ - ކޮލަމްބިއާ (3 ޖުލައި 2021)
އާޖެންޓީނާ - އެކުއެޑޯ (3 ޖުލައި 2021)
