ސެވިލް (ޖޫން 28) - އަނިޔާގެ ސަބަބުން ބެލްޖިއަމްގެ މުހިއްމު ދެ ކުޅުންތެރިން ކަމަށްވާ އެޑެން ހަަޒާޑާއި ކެވިން ޑި ބްރޭނާ އަށް މުބާރާތުގެ ކުއާޓާ ފައިނަލުގައި އިޓަލީއާ ދެކޮޅަށް ކުޅޭ މެޗުގައި ނުކުޅެވުމުގެ ފުރުސަތު ބޮޑު ކަމަށް މީޑިއާ ރިޕޯޓްތައް ބުނެފި އެވެ.
ޑި ބްރޭނާ އާއި ހަޒާޑަށް އަނިޔާވީ މުބާރާތުގެ ދެ ވަނަ ބުރުގައި ރޭ ޕޯޗުގަލް އަތުން 1-0 އިން ބެލްޖިއަމް މޮޅުވި މެޗުގަ އެވެ. ޑި ބްރޭނާ ކުޑަ ހުޅަށް އަނިޔާވީ ފުރަތަމަ ހާފުގަ އެވެ. މެޗުގައި އިތުރަށް ނުކުޅެވިގެން އޭނާ ބަދަލުކުރީ ދެ ވަނަަ ހާފްގަ އެވެ. ހަޒާޑްގެ ފަލަމަސްގަނޑަށް އަނިޔާވެގެން މެޗުގެ ފަހު ކޮޅު ބަދަލުކުރަން ޖެހުނެވެ.
އަނިޔާގެ ސަބަބުން ޑި ބްރޭނާ އާއި ހަޒާޑަށް މި ފަހަރުގެ ޔޫރޯ ނިމުނީ ކަމަށް ބެލެވުނު ނަމަވެސް ބެލްޖިއަމްގެ ކޯޗު ރޮބާޓޯ މާޓިނޭޒް ބުނީ އެއީ ހަގީގަތެއް ނޫން ކަމަށެވެ.
"މާ ބޮޑު ގެއްލުމެއް ލިބިފައި ނެތް. އޭގެ މާނަ އަކީ އެ މީހުންނަށް (ހަޒާޑާއި ޑި ބްރޭނާ) މުބާރާތުގައި އަދި ކުރިއަށް ފުރުސަތު އެބައޮތޭ. އެ މީހުންނަށް ޔޫރޯ އެއް ނުނިމޭ،" މާޓީނޭޒް ބުންޏެވެ.
ބެލްޖިއަމްގެ ނޫސްތަކުން ރިޕޯޓްކުރާ ގޮތުގައި އިޓަލީ މެޗުގައި ކުޅެވުމުގެ ފުރުސަތު އޮތީ ޑި ބްރޭނާ އަށެވެ. ހަޒާޑް އެ މެޗުގައި ފެނުމުގެ ފުރުސަތު ކުޑަ އެވެ. ރިކަވަރީ ރަނގަޅަށް ގޮސްފިނަމަ ހަޒާޑަށް ކިރިޔާ ވެސް ކުޅެވޭ ވަރުވާނީ ބަދަލު ކުޅުންތެރިއެއްގެ ގޮތުގައި ކަމަށް ރިޕޯޓްތައް ބުނެ އެވެ.
ހަޒާޑަށް އޭނާގެ އެންމެ ރަނގަޅު ކުޅުން ފަހަކަށް އައިސް ނުދެއްކޭ އެންމެ ބޮޑު ސަބަބަކީ ވެސް އަނިޔާއާ ހެދި ފާއިތުވި ދެ އަހަރު ގިނަ މެޗުތަކެއް ގެއްލިފައިވާތީ އެވެ. ހަޒާޑުގެ އަނިޔާގެ މައްސަލަތަކާ ހެދި މި ފަހަރު ޔޫރޯ ވެސް އޭނާ އަށް ގެއްލިދާނެ ކަަމަށް ބެލެވުނެވެ.
މި ފަހަރުގެ މުބާރާތުގައި ބެލްޖިއަމުން ކުޅުނު ފުރަތަމަ މެޗުގައި ޑި ބްރޭނާ ނުކުޅެ އެވެ. ބެލްޖިއަމުން ރަޝިއާއާ ދެކޮޅަށް ކުޅުނު މެޗުގައި ޑި ބްރޭނާ ނުކުޅުނީ ޗެމްޕިއަންސް ލީގު ފައިނަލުގައި ލޮލު ކައިރީ ކަށިގަނޑަށް ލިބުނު އަނިޔާއަކުން ރަނގަޅުވާން ކުރި އޮޕަރޭޝަނަށް ފަހު ރަނގަޅަށް ރިކަވާވުމުގެ ގޮތުންނެވެ. ހަޒާޑް ފުރަތަމަ ދެ މެޗުގައި ކުޅެން އެރީ ބަދަލު ކުޅުންތެރިއެއްގެ ގޮތުގަ އެވެ. އެއީ ފިޓްނަސް މައްސަލައެއްގެ ސަބަބުން ފުރަތަމަ އެގާރައިގައި ނުހިމަަނާތީ އެވެ.
