ރޯމް، އިޓަލީ (ޖޫން 28) - ސީރިއާގައި ހައްޔަރުކޮށްފައި ތިބި އިސްލާމިކް ސްޓޭޓް (އައިއެސް) ގެ މެމްބަރުން އަނބުރާ ގައުމުތަކަށް ގެންދަން އެމެރިކާއިން ގޮވާލައިފި އެވެ.
އެމެރިކާގެ ސެކެޓްރީ އޮފް ސްޓޭޓް އެންޓަނީ ބްލިންކެން އެގޮތަށް ވިދާޅުވީ އައިއެސްއާ ދެކޮޅަށް ހަނގުރާމަ ކުރި 83 ގައުމެއް ހިމެނޭ ކޯޯލިޝަނުގެ ބައްދަލުވުމެއްގަ އެވެ.
އެމެރިކާއިން ލަފާކުރާ ގޮތުގައި ހުޅަނގުގެ ގައުމުތަކުން ތާއީދު ކުރާ ކުރުދީންގެ ހައްޔަރުގައި 10،000 އައިއެސްގެ ހަނގުރާމަވެރިން އުތުރު ސީރިއާގައި އެބަ ތިއްބެވެ.
ބްލިންކެން ވިދާޅުވީ އެ މީހުން އެތަނުގައި ތާ އަބަދަށް ނުބޭތިއްބޭނެ ކަމަށާއި އެމެރިކާއިން އެކުވެރި ގައުމުތަކަށް ބާރު އަޅަނީ އެ ގައުމުގެ ރައްޔިތުން އަނބުރާ ގެންދިޔުމަށް ކަމަށެވެ.
ނަމަވެސް ހައްޔަރުކޮށްފައި ތިބި މީހުން އަނބުރާ ގެންދިޔުމަށް ފްރާންސާއި އިނގިރޭސި ވިލާތް ފަދަ ގައުމުތަކުން ބޭނުމެއް ނުވެ އެވެ.
އެ ގައުމުތަކުން ފަސްޖެހެނީ ހައްދުފަހަނަ އެޅި ފިކުރުގެ، ހަނގުރާމައިގެ ތަމްރީން ލިބިފައިވާ ގިނަ ބަޔަކު އަނބުރާ ގެނެސްގެން ނޭދެވޭ ނަތީޖާއެއް ނުކުތުމުގެ ބިރު އޮތުމުންނެވެ.
ބްލިންކެން ވަނީ އިޓަލީ އާއި ކަޒަކިސްތާން ފަދަ ގައުމުތަކުން ރައްޔިތުން އަނބުރާ ގެންގޮސްފައި ވާތީ އެކަން ފާހަގަކުރައްވާފަ އެވެ. ކަޒަކިސްތާނުން ވަނީ 600 ހަނގުރާމަވެރިންނާއި އެ މީހުންގެ އާއިލާތަށް ގައުމަށް ގެންގޮސް ރިހެބިލިޓޭޝަން ޕްރޮގްރާމެއް ފަށާފަ އެވެ.
ހިޔުމަން ރައިޓްސް ވޮޗް އިން ބުނެފައިވާ ގޮތުގައި ކުރުދީން ހައްޔަރުކޮށްފައި ތިބި މީހުންގެ ތެރޭގައި 63،000 އަންހެނުންނާއި ކުޑަކުދިން ހިމެނެ އެވެ. އެއީ 60 ގައުމަކަށް ނިސްބަތްވާ މީހުންނެވެ. އެ މީހުން ތިބީ ދެ ރެފިއުޖީ ކޭމްޕެއްގަ އެވެ.
