ދުނިޔޭގެ ފިނިހޫނުމިން ހިފަހައްޓަަން މުހިއްމު ރޯލެއް އަދާކުރާާ އޯޒޯން ފަށަލައަށް ގެއްލުންދޭ މާއްދާއެއް ކަމުގައިވާ ހައިޑްރޯކްލޯރޯފުލޯރޯކާބަން (އެޗްސީއެފްސީ) ބޭނުންކުރުން ހުއްޓާލި، ތަރައްގީވަމުން އަންނަ ފުރަތަމަ ގައުމަކަށް ދިވެހިރާއްޖެ ވެއްޖެ އެވެ.
އޯޒޯން ފަށަލައަށް ގެއްލުންދޭ މާއްދާއެއް ކަމުގައިވާ އެޗްސީއެފްސީ ބޭނުންކުރުން ހުއްޓާލަން ދުނިޔޭގެ ގައުމުތަކުން އެއްބަސްވީ 1989 ވަނަ އަހަރުގެ މޮންޓްރިއާލް ޕްރޮޓޯކޯލްގެ ތެރެއިންނެވެ. މި އެއްބަސްވުމުގައި 197 ގައުމަކުން ސޮއިކޮށްފައިވާއިރު، ތަރައްގީވަމުން އަންނަ ގައުމުތަކަށް އެޗްސީއެފްސީ ބޭނުންކުރުން ހުއްޓާލަން ކަނޑައެޅީ 2030 ވަނަ އަހަރުގެ ކުރިންނެވެ.
އެހެން ނަމަވެސް ރާއްޖެއިން ވަނީ 2010 ގައި ފެށި އެޗްސީއެފްސީ ފޭސް-އައުޓް މެނޭޖްމަންޓް ޕްލޭން (އެޗްޕީއެމްޕީ) މަޝްރޫއުގެ ތެރެއިން، ޕްރޮޓޮކޯލްގައި އެއްބަސްވެވުނު މުއްދަތަށް ވުރެ ދިހަ އަހަރު ކުރިން މި ވިހަ ގޭސް ބޭނުންކުރުން ހުއްޓާލާފަ އެވެ. މި މަޝްރޫއަށް ފަންޑުކުރީ މޮންޓްރިއާލް ޕްރޮޓޮކޯލްގައި ކަނޑައެޅި ލަނޑުދަނޑިތަކަށް ވާސިލުވާން ފަހިކޮށްދިނުމުގެ ގޮތުން އެކުލަވާލި މަލްޓިލެޓެރަލް ފަންޑް (އެމްއެލްއެފް)ގެ ހިލޭ އެހީންނެވެ.
ރާއްޖެއިން މި ހާސިލުކުރި ކާމިޔާބީ ފާހަގަކުރަން މިއަދު ބޭއްވި "އަ ކޫލް މޫވް: މޯލްޑިވްސް ކުއިޓްސް އެޗްސީއެފްސީ" ރަސްމިއްޔާތުގައި މި މަސައްކަތުގައި އުޅުނު ރާއްޖޭގެ ވުޒާރާތަކާއި އޮފީސްތަކުގެ އިސްބޭފުޅުންނާއި މި މަސައްކަތަށް އެކި ގޮތްގޮތުން އެހީތެރިވެދިން ބޭރުގެ ފަރާތްތަކުން ބައިވެރިވި އެވެ.
އޭގެ ތެރޭގައި އދ. ގެ ކަމާބެހޭ ޖަމިއްޔާތަކުގެ އިސްފަރާތްތަކާއި ރާއްޖޭގެ ވުޒާރާތަކުގެ ވަޒީރުންގެ އިތުރުން މި ގޭސް އެންމެ ގިނައިން ބޭނުންކުރަމުން ދިޔަ މަސްވެރިކަމުގެ ސިނާއަތުގައި ހަރަކާތްތެރިވާ ބައެއް ކުންފުނިތަކުގެ އިސްބޭފުޅުން ބައިވެރިވެވަޑައިގެން ވާހަކަ ދެއްކެވި އެވެ.
މިއީ މޫސުމަށް އަންނަ ބަދަލުތަކާއި ދުނިޔެ ހޫނުވުމާ ގުޅިގެން ގުދުރަތީ އަރައްކާތައް ގިނަވަމުން އަންނަ ރާއްޖެ ފަދަ ތިރި ޖަޒީރާ ގައުމަކުން އެހެން ގައުމުތަކަށް މިސާލު ދައްކަން ކުރި މުހިއްމު މަސައްކަތަކަށް ވާނެ ކަމަށް އެންވަޔަރަމަންޓް މިނިސްޓަރު އައިޝަތު ޝައުނާ ވިދާޅުވި އެވެ. އަދި ރާއްޖެއިން މި ލަނޑުދަނޑި ހާސިލުކުރުމަކީ 2030 ވަނަ އަހަރުގެ ކުރިން އެޗްސީއެފްސީ ބޭނުންކުރުން ހުއްޓާލަން، ތަރައްގީވަމުން އަންނަ ގައުމުތަކަށް ނަމޫނާއަކަށް ވާނެ ކަމަށް ވިދާޅުވި އެވެ.
ރާއްޖެއިން އެޗްސީއެފްސީ ބޭނުންކުރުން ހުއްޓާލުމުގެ ޕްލޭން ތަންފީޒުކުރަން ފެށި 2010 ވަނަ އަހަރު 67 މެޓްރިކް ޓަނުގެ އެޗްސީއެފްސީ ގޭސް އެތެރެކުރި އެވެ. އެކަމަކު މިދިޔަ އަހަރު މި އަދަދު ވަނީ ސުމަކަށް ތިރިވެފަ އެވެ.
