ގުދުސް (ޖޫން 28) - އަލުން ކަރަންޓުގެ ހިދުމަތް ދޭން ބޭނުންވާ ތެޔޮ ގާޒާއަށް އެތެރެ ކުރަން ހުއްދަ ދޭން ނިންމާފައިވާ ކަމަށް އިޒްރޭލުން ބުނެފި އެވެ.
"އެ ނިންމުން ނިންމީ ސެކުއިރިޓީ އެސެސްމެންޓަކަށް ފަހު، ހުއްދަ ހޯދަން ޖެހޭ ތަންތަނުގެ ހުއްދަ ލިބިގެން،" ފަލަސްތީނުގެ ރައްޔިތުންގެ ކަންކަމުގައި ގޮތް ނިންމާ އިޒްރޭލުގެ އިދާރާއިން ބުންޏެވެ.
ގާތްގަނޑަކަށް ދެ މިލިއަން މީހުން ދިރިއުޅޭ ގާޒާއަށް ވަދެ ނުކުމެވެން އޮންނަން ހުރިހާ ދިމާލެއް ކޮންޓްރޯލް ކުރަނީ 2007 އިން ފެށިގެން އިޒްރޭލެވެ.
މިދިޔަ މޭ މަހު ގާޒާގައި ވެރިކަން ކުރާ ހަމާސް އާއި އިޒްރޭލާ ދެމެދު 11 ދުވަސް ވަންދެން ކުރި ހަމަލާ ބަދަލު ކުރުންތަކުގައި ކުރިއަށް ވުރެ ގިނަ ފިޔަވަޅުތައް އިޒްރޭލުން އެޅި އެވެ.
އޭރު އެޅި ފިޔަވަޅުތަކަށް މިހާރު ލުއި ދޭން ފަށާފައި ވާއިރު، މިދިޔަ ހަފްތާގައި ވަނީ ގާޒާއަށް ޕޯސްޓަލް ހިދުމަތް ދިނުމަށާއި އެ ތަނުގައި އުފައްދާ މޭވާ އާއި ތަރުކާރީ އެކްސްޕޯޓް ކުރަން ހުއްދަ ދޭން ނިންމާފަ އެވެ.
ގާޒާގެ ރައްޔިތުންނަށް މަސް ބޭނޭނެ ސަރަހައްދު ހަ ނޯޓިކަލް މޭލުން ނުވަ ނޯޓިކަލް މޭލަށް ފުޅާކޮށް، ފެކްޓްރީތަކަށް ބޭނުންވާ ސަޕްލައި އެތެރެ ކުރުމުގެ ހުއްދަ ވެސް ވަނީ ދީފަ އެވެ.
އިޒްރޭލާއި ހަމާސްއާ ދެމެދު ހަމަލާ ބަދަލު ކުރުން ހުއްޓާލީ މޭ 21 ގަ އެވެ. އޭރު ފަލަސްތީނުގެ 260 މީހުންނާއި އިޒްރޭލުގެ 13 މީހުން ހަމަލާތަކުގައި މަރުވެއްޖެ އެވެ.
