ރާމަﷲ، ފަލަސްތީނު (ޖޫން 28) - ފަލަސްތީނުގެ ސަރުކާރާ ދެކޮޅު މުޒާހަރާތައް އިތުރުވަމުންދާ މި ދަނޑިވަޅުގައި ލޭބާ މިނިސްޓަރު އިސްތިއުފާ ދެއްވަން ނިންމަވައިފި އެވެ.
ރައީސް މަހްމޫދު އައްބާސްގެ އިސްތިއުފާއަށް ގޮވާލާ ފަލަސްތީނުގައި މުޒާހަރާ ކުރާތާ މިހާރު ހަތަރު ދުވަސް ވެއްޖެ އެވެ. މުޒާހަރާތައް ފެށީ އެކްޓިވިސްޓެއްގެ މަރާ ގުޅިގެންނެވެ.
ސެންޓްރަލް ކޮމިޓީ މެމްބަރު އިއްސާމް އަބޫބަކުރު ވިދާޅުވީ ފަތަހް ޕާޓީގެ ސަރުކާރުން "އާއްމުންގެ މިނިވަންކަމާއި ގާނޫނަށް ކުރާ އިހްތިރާމް ކުޑަވެފައި ވާތީ" އެ ސަރުކާރާ ވަކިވާން ފަލަސްތީން ޕީޕަލްސް ޕާޓީން ނިންމާފައިވާ ކަމަށެވެ.
ލޭބާ މިނިސްޓަރު އަދި ސަރުކާރުގައި ޕީޕަލްސް ޕާޓީ ތަމްސީލް ކުރާ ނަސްރީ އަބޫ ޖައިޝް މިއަދުވެ ވަގުތެއްގައި އިސްތިއުފާ ދެއްވާނެ ކަމަށް އަބޫބަކުރު އޭއެފްޕީއަށް ވިދާޅުވި އެވެ.
ފަލަސްތީނުގެ އެކްޓިވިސްޓެއްގެ މަރާ ގުޅިގެން ހުޅަނގު އައްސޭރީގެ ރާމަﷲ ސިޓީގައި ކުރިއަށްދާ މުޒާހަރާތަކުގެ ތެރެއިން ފުލުހުންނާއި އާއްމުންނާ ދެމެދު އަންނަނީ ހަމަނުޖެހުން ހިނގަމުންނެވެ.
ފަލަސްތީނުގެ ސަރުކާރުގެ ކޮރަޕްޝަނާ ދެކޮޅަށް ސޯޝަލް މީޑިއާގައި ވީޑިއޯ ޕޯސްޓު ކުރާ އުމުރުން 43 އަހަރުގެ ނިޒާރް ބަނަތް މަރުވީ މިދިޔަ ބުރާސްފަތި ދުވަހު އެވެ. އޭނާ މަރުވީ ހިބްރޫންގައި އޭނާ ދިރިއުޅޭ ގެޔަށް ފުލުހުން ވަދެގަނެ، ހައްޔަރު ކުރިތާ އިރުކޮޅެއް ފަހުންނެވެ.
މިދިޔަ ބުރާސްފަތި ދުވަހު މަރުވި ބަނަތް ވަނީ އަކީ ޕާލިމެންޓު އިންތިހާބުގައި ވާދަކުރާ ކެންޑިޑޭޓެކެވެ. މިދިޔަ މޭ މަހު ބާއްވަން ހަމަޖެހިފައި އޮތް އިންތިހާބު ވަކި މުއްދަތެއް ނެތް ގޮތަށް ފަސްކުރަން އައްބާސް ވަނީ ނިންމަވައިފަ އެވެ.
ބަނަތްގެ އާއިލާއިން ބުނީ ފުލުހުން ގޭ ތެރެއަށް ވަދެގަނެ، އޭނާއަށް އަމާޒުކޮށް ޕެޕާ ސްޕްރޭ ޖަހައި އަނިޔާ ކުރަމުން ގެއިން ނެރި، އުޅަނދަކަށް ލައިގެން ގެންދިޔެއީ ކަމަށެވެ.
އޭނާގެ އޮޓޮޕްސީ ހެދި ޑރ. ސާމިރް އަބޫ ޒަރްޒޫރް ވިދާޅުވީ ބޮލާއި، މެ އާއި، ކަރު، އަދި ފަޔާއި އަތަށް އަނިޔާކޮށް ބޮޑެތި ޒަހަމްތަކެއް ލިބިފައިވާ ކަމަށެވެ. ބަނަތް މަރުވެފައިވަނީ އޭނާ ހައްޔަރުކޮށްގެން ގެންދިޔަތާ ގަޑިއެއްހާއިރު ތެރޭގަ އެވެ.
އޭނާގެ މަރުގެ ތަހުގީގު ފަށާފައިވާ ކަމަށް ސަރުކާރުން ބުނި ނަމަވެސް އާއްމުން ހިތްހަމައެއް ނުޖެހެ އެވެ. އިއްޔެ ވެސް ގިނަ ބަޔަކު ވަނީ ބަނަތްގެ ފޮޓޯތައް ހިފައިގެން މަގުމައްޗަށް ނުކުމެފަ އެވެ.
ފަލަސްތީން ޖާނަލިސްޓްސް ސިންޑިކޭޓުން ވަނީ މުޒާހަރާ ރިޕޯޓު ކުރަން އުޅޭ ނޫސްވެރިން ރައްކާތެރި ކުރަން ފުލުހުން ފެއިލްވެފައިވާ ކަމަށް ބުނެ، ފުލުހުންގެ ވެރިޔާ މަގާމުން ވަކިކުރުމަށް ސަރުކާރަށް ގޮވާލާފަ އެވެ.
އެމެރިކާ އާއި އދ. އަދި ޔޫރަޕިއަން ޔޫނިއަން (އީޔޫ) އިން ވަނީ ފަލަސްތީނުގެ ސަރުކާރު ކުށްވެރިކޮށްފަ އެވެ. ބޮޑު ވަޒީރު މުހައްމަދު އިޝްތަޔާ ވިދާޅުވީ އެކަން ހިނގާދިޔަ ގޮތުގެ ތަހުގީގެއް ފަށާފައިވާ ކަމަށެވެ.
ފަލަސްތީނުގެ ސަރުކާރުން ވެރިކަން ކުރަނީ 1967 ގެ ހަނގުރާމައިގައި އިޒްރޭލުގެ ބާރުގެ ދަށަށް ދިޔަ ހުޅަނގު އައްސޭރީގެ 40 ޕަސެންޓު ސަރަހައްދުގަ އެވެ. އެ ސަރަހައްދުތަކުގައި ވެސް ސަރުކާރަށް އޮންނަނީ ލިމިޓުވެފައިވާ ބާރުތަކެކެވެ.
ހުޅަނގު އައްސޭރިއަށް ވަނުމާއި ނުކުތުން ކޮންޓްރޯލް ކުރާ އިޒްރޭލުގެ ފުރިހަމަ ބާރު ބާކީ 60 ޕަސެންޓު ސަރަހައްދުގައި އޮވެ އެވެ.
