ރާމަﷲ، ފަލަސްތީން (ޖޫން 27) - ފަލަސްތީނުގެ އެކްޓިވިސްޓެއްގެ މަރާ ގުޅިގެން ހުޅަނގު އައްސޭރީގެ ރާމަﷲ ސިޓީގައި ކުރިއަށްދާ މުޒާހަރާތަކުގެ ތެރެއިން ފުލުހުންނާއި އާއްމުންނާ ދެމެދު ބޮޑު ހަމަނުޖެހުންތަކެއް ހިނގައިފި އެވެ.
ފަލަސްތީނުގެ ސަރުކާރުގެ ކޮރަޕްޝަނާ ދެކޮޅަށް ސޯޝަލް މީޑިއާގައި ވީޑިއޯ ޕޯސްޓު ކުރާ އުމުރުން 43 އަހަރުގެ ނިޒާރް ބަނަތް މަރުވީ މިދިޔަ ބުރާސްފަތި ދުވަހު އެވެ. އޭނާ މަރުވީ ހިބްރޫންގައި އޭނާ ދިރިއުޅޭ ގެޔަށް ފުލުހުން ވަދެގަނެ، ހައްޔަރު ކުރިތާ އިރުކޮޅެއް ފަހުންނެވެ.
އެ މައްސަލާގައި މުޒާހަރާ ކުރަމުންދާތާ އިއްޔެއަކީ ތިން ވަނަ ދުވަހެވެ. އިއްޔެ ރާމަﷲ ގެ މަގުތަކަށް ނުކުމް ގިނަ ބަޔަކު ވަނީ ރައީސް މަހްމޫދް އައްބާސްގެ އިސްތިއުފާއަށް ގޮވާފަ އެވެ. މުޒާހަރާގެ ބައިވެރިން ބުނަނީ ސަރުކާރު ވަނީ ކޮރަޕްޓްވެފައި ކަމަށާއި އިންތިހާބް ފަސްކުރަނީ ވެސް އެހެންވެ ކަމަށެވެ.
މުޒާހަރާގެ ބައިވެރިން ހުއްޓުވުމަށް ރަޔަޓް ގިއަރުގެ ފުލުހުން ވެސް މަގުތަކަށް ނުކުތެވެ. މުޒާހަރާ ކުރަމުން ދިޔަ މީހުން ފުލުހުންނަށް އަމާޒުކޮށް ގާ އުކާފައި ވާއިރު، ފުލުހުން ވަނީ ރައްދުގައި ކަރުނަ ގޭސް ޖަހާފަ އެވެ. އިއްޔެގެ އެއްވުމުގައި އެއްވެސް އަނިޔާއެއްވި ކަމެއް އަދި ސާފެއް ނޫނެވެ.
މިދިޔަ ބުރާސްފަތި ދުވަހު މަރުވި ބަނަތް ވަނީ އަކީ ޕާލިމެންޓު އިންތިހާބުގައި ވާދަކުރާ ކެންޑިޑޭޓެކެވެ. މިދިޔަ މޭ މަހު ބާއްވަން ހަމަޖެހިފައި އޮތް އިންތިހާބު ވަކި މުއްދަތެއް ނެތް ގޮތަށް ފަސްކުރަން އައްބާސް ވަނީ ނިންމަވައިފަ އެވެ.
ބަނަތްގެ އާއިލާއިން ބުނީ ފުލުހުން ގޭ ތެރެއަށް ވަދެގަނެ، އޭނާއަށް އަމާޒުކޮށް ޕެޕާ ސްޕްރޭ ޖަހައި އަނިޔާ ކުރަމުން ގެއިން ނެރި، އުޅަނދަކަށް ލައިގެން ގެންދިޔެއީ ކަމަށެވެ.
އޭނާގެ އޮޓޮޕްސީ ހެދި ޑރ. ސާމިރް އަބޫ ޒަރްޒޫރް ވިދާޅުވީ ބޮލާއި، މެ އާއި، ކަރު، އަދި ފަޔާއި އަތަށް އަނިޔާކޮށް ބޮޑެތި ޒަހަމްތަކެއް ލިބިފައިވާ ކަމަށެވެ. ބަނަތް މަރުވެފައިވަނީ އޭނާ ހައްޔަރުކޮށްގެން ގެންދިޔަތާ ގަޑިއެއްހާއިރު ތެރޭގަ އެވެ.
މަރުގެ ހަބަރު ފެތުރުމާއެކު ބުރާސްފަތި ދުވަހު 300 މީހުން ރާމަﷲ ގެ މަގުތަކަށް ނުކުތެވެ. ހިބްރޫންގައި ވެސް މީހުން އެއްވި އެވެ. ހުކުރު ދުވަހު ބަނަތްގެ ޖަނާޒާއަށް ފަހު ވެސް ހިބްރޫން އާއި އިރުމަތީ ގުދުސްގެ އަލް އަގްސާ މިސްކިތް ބޭރުގައި ސަރުކާރުގެ އިސްތިއުފާއަށް ގޮވައި މީހުން އެއްވި އެވެ.
އެމެރިކާ އާއި އދ. އަދި ޔޫރަޕިއަން ޔޫނިއަން (އީޔޫ) އިން ވަނީ ފަލަސްތީނުގެ ސަރުކާރު ކުށްވެރިކޮށްފަ އެވެ. ބޮޑު ވަޒީރު މުހައްމަދު އިޝްތަޔާ ވިދާޅުވީ އެކަން ހިނގާދިޔަ ގޮތުގެ ތަހުގީގެއް ފަށާފައިވާ ކަމަށެވެ.
ފަލަސްތީނުގެ ސަރުކާރުން ވެރިކަން ކުރަނީ 1967 ގެ ހަނގުރާމައިގައި އިޒްރޭލުގެ ބާރުގެ ދަށަށް ދިޔަ ހުޅަނގު އައްސޭރީގެ 40 ޕަސެންޓު ސަރަހައްދުގަ އެވެ. އެ ސަރަހައްދުތަކުގައި ވެސް ސަރުކާރަށް އޮންނަނީ ލިމިޓުވެފައިވާ ބާރުތަކެކެވެ.
ހުޅަނގު އައްސޭރިއަށް ވަނުމާއި ނުކުތުން ކޮންޓްރޯލް ކުރާ އިޒްރޭލުގެ ފުރިހަމަ ބާރު ބާކީ 60 ޕަސެންޓު ސަރަހައްދުގައި އޮވެ އެވެ.
