ބާސެލޯނާ (ޖޫން 27) - ބާސެލޯނާ އިން އެ ޓީމުގެ ތަރި ލިއޮނަލް މެސީގެ ކޮންޓްރެކްޓް މަޝްވަރާތައް އަވަސްކުރަން ނިންމައިފި އެވެ.
މެސީ ބާސެލޯނާއާ އެކު ހަދާފައިވާ އެއްބަސްވުން ހަމަވާން ބާކީ އޮތީ ތިން ދުވަހެވެ. އެހެންވެ, ބާސެލޯނާ އިން މެސީގެ ކޮންޓްރެކްޓްގެ މަޝްވަރާތައް ވީ އެންމެ އަވަހަށް ނިންމާލަން ވަނީ އަމާޒުހިފައިފަ އެވެ.
ބާސެލޯނާގެ ރައީސް ޖޮއާން ލަޕޯޓާ އަންނަނީ މެސީ އެ ކްލަބާ އެކު އާ ކޮންޓްރެކްޓެއްގައި ސޮއިކުރަން ހުރިހާ ކަމެއް ނިމިފައިވާ ކަމަށް ވިދާޅުވަމުންނެވެ. އެކަަމަކު، މިހާތަނަށް މެސީ އާ ކޮންޓްރެކްޓެއްގައި ސޮއިކުރުމުގެ ހުރިހާ ކަމެއް ނުނިމެ އެވެ. އެހެންވެ، ބާސެލޯނާގެ ބައެއް ސަޕޯޓަރުންގެ ކަންބޮޑުވުންތަކެއް ވެސް އެބަހުއްޓެވެ.
ރިޕޯޓްތައް ބުނާގޮތުން ބާސެލޯނާ އިން މަސައްކަތް ކުރީ މީގެ ތިން ދުވަސް ކުރިން މެސީ އޭނާގެ 34 ވަނަ އުފަން ދުވަސް ފާހަގަކުރިއިރު، ބާސެލޯނާގެ އާ ކޮންޓްރެކްޓްގެ ކަންކަން ރަސްމީކޮށް އިއުލާނުކުރާށެވެ. އެކަމަކު އެކަން ނުކުރެވުނީ ބާސެލޯނާގެ މުސާރަތައް މި ވަގުތު ވަރަށް ބޮޑުކޮށް ހުރުމުން އެ ކޮންޓްރޯލް ކުރުމަށް ވަގުތު ބޭނުންވާތީ އެވެ.
މެސީއާ އެކު ބާސެލޯނާ އިން އިތުރު ދެ އަހަރުގެ ކޮންޓްރެކްޓެއް ސޮއިކުރަން ނިންމާފައިވާއިރު، އެކަން ކުރެވެން އޮތީ ބާސެލޯނާގެ މުޅި ސްކޮޑުގެ މުސާރަތައް އުސޫލުތަކާ އެއްގޮތަށް ކޮންޓްރޯލް ކުރުމަށް ފަހު އެވެ. މެސީއާ އެކު ބާސެލޯނާ އިން އާ ކޮންޓްރެކްޓްގައި ސޮއިކުރި ނަމަވެސް އެ އެއްބަސްވުން ރަޖިސްޓްރީ ކޮށްދޭން ލަލީގާ އިން ނިންމާފައިވަނީ ބާސެލޯނާގެ މުޅި މާލީ ހާލަތާއި މުސާރައިގެ ކަންތައްތަކުގެ ފުރިހަމަ ރިޕޯޓްތައް ލިބުމުންނެވެ. އެއީ މެސީ އަކީ ބާސެލޯނާގެ އެންމެ ބޮޑު މުސާރަ ލިބޭ ކުޅުންތެރިޔާ ކަމަށްވާތީއާ ވެސް އެކު އެވެ.
މި ފަހަރުގެ ޓްރާންސްފާ މާކެޓްގައި ބާސެލޯނާ އިން ވަނީ ހަތަރު ކުޅުންތެރިން ސޮއިކޮށްފަ އެވެ. އެއީ ހިލޭ އެއްބަސްވުމެއްގެ ދަށުން އެ ޓީމާ ގުޅުނު މެންޗެސްޓާ ސިޓީގެ ސާޖިއޯ އަގުއޭރޯ އާއި އެރިކް ގާސިއާ އަދި ލިޔޯނުން އައި މެމްފިސް ޑިިޕާއިގެ އިތުރުން ރެއާލް ބެޓިސް އިން ގަތް އެމަސަން އެެވެ. ހަތަރު ކުޅުންތެރިން ގެނައި ނަމަވެސް ބާސެލޯނާ އިން މިހާތަނަށް ކުޅުންތެރިއަކު ވިއްކާފައި ނުވެ އެވެ.
ބާސެލޯނާ އިން އަލަށް ސޮއިކުރި ހަަތަރު ކުޅުންތެރިންގެ ރަޖިސްޓްރީ ކަންކަން ފުރިހަމަ ކުރަން ހުށަހަޅަން ނިންމާފައިވަނީ މެސީގެ ކޮންޓްރެކްޓްގެ ކަންކަން ވެސް ނިންމުމަށް ފަހު ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ.
މި ވަގުތު އާޖެންޓީނާއާ އެކު ކޮޕަ އެމެރިކާ ފުޓްބޯޅަ މުބާރާތުގައި ކުޅެމުން އަންނަ މެސީ ހޯދަން މެންޗެސްޓާ ސިޓީ އާއި ޕީއެސްޖީން ޝައުގުވެރިވާ ކަމަށް މީޑިއާގައި މީގެ ކުރިން އަޑުފެތުރުނު ނަމަވެސް ރަސްމީކޮށް އެއްވެސް މަޝްވަރާއެއް މިދިޔަ އޭޕްރީލް މަހަށް ފަހު ބާއްވާފައި ނުވެ އެެވެ. މެސީގެ އޭޖެންޓް އަދި ބައްޕަ ޖޯޖް މެސީ ވަނީ ބާސެލޯނާގެ ރައީސް ލަޕޯޓާއާ އެކު މެސީގެ މުސްތަގުބަލާ ބެހޭގޮތުން މަޝްވަރާކުރަން މި އަހަރު ފެށި ފަހުން ވެސް 10 ފަހަރަށް ވުރެ ގިނައިން ބައްދަލުކޮށްފަ އެވެ.
