މިނިއަޕޮލިސް، އެމެރިކާ (ޖޫން 26) - މިދިޔަ އަހަރު އެމެރިކާގެ މިނިއަޕޮލިސްގެ މަގެއްގައި ކަޅު ނަސްލުގެ ޖޯޖް ފްލޮއިޑް ނަމަކަށް ކިޔާ މީހަކު ހައްޔަރު ކުރަން އުޅުމުގެ ތެރޭގައި އޭނާ މަރާލި ކަމުގެ ކުށް ސާބިތުވި ކުރީގެ ފުލުސް މީހާ 22.5 އަހަރަށް ޖަލަށް ލާން ހުކުމްކޮށްފި އެވެ.
ހުކުމް އިއްވުމުގެ އަޑު އެހުމުގައި އުމުރުން 45 އަހަރުގެ ޑެރެކް ޗައުވިން ވަނީ ފްލޮއިޑްގެ އާއިލާއަށް ތައުޒިޔާ ފޮނުވާ ކަމަށް ބުނެފަ އެވެ. ނަމަވެސް އޭނާ ކުރި ކުށަށް މައާފަކަށް ނޭދެ އެވެ. ތިރީސް އަހަރުގެ ހުކުމަކަށް ދައުލަތުން އެދުނު ނަމަވެސް ފަނޑިޔާރު ޕީޓާ ކެހިލް އިއްވީ 22.5 އަހަރުގެ ހުކުމެކެވެ.
ގިނަ ބައެއްގެ ސަމާލުކަން ލިބުނު މި ޝަރީއަތުގެ އެންމެ ފަހު އަޑު އެހުމުގައި ފްލޮއިޑުގެ ހަތް އަހަރުގެ އަންހެން ދަރިފުޅުގެ ރިކޯޑުކޮށްފައިވާ މެސެޖެއް އިއްވި އެވެ. އޭގެ އިތުރުން ޗައުވިންގެ މަންމަ ވެސް ވަނީ އަޑު އެހުމުގައި ވާހަކަ ދައްކާފަ އެވެ.
ފްލޮއިޑުގެ އާއިލީ ވަކީލު ބުނީ މިއީ ނަސްލީ ތަފާތު ކުރުމާ ދެކޮޅަށް އެމެރިކާގައި އެޅުނު ތާރީހީ ފިޔަވަޅެއް ކަމަށެވެ.
ޗައުވިން އާއި އިތުރު ތިން ފުލުހަކު ވެގެން އުމުރުން 46 އަހަރުގެ ފްލޮއިޑް ހައްޔަރު ކުރީ މޭ 2020 ގަ އެވެ. އޭނާއަށް ތުހުމަތު ކުރީ ފިހާރައަކަށް 20 ޑޮލަރުގެ ފޭކު ފައިސާ ނޫޓެއް ދިން ކަމަށެވެ. އެ ތަނުގައި އޭނާ ހައްޔަރުކޮށް، އަތުގައި ބިޑި އަޅުވައި، ބިން މައްޗަށް ވައްޓާލި އެވެ.
އޭގެ ފަހުން ޗައުވިން ވަނީ ފްލޮއިޑްގެ ކަރު މައްޗަށް ފައިން އަރައި، 10 މިނެޓު ވަންދެން ހުރެފަ އެވެ. އޭރު ފްލޮއިޑަށް ނޭވާ ނުލެވޭ ކަމަށާއި މަރުވަނީ ކަމަށް ބުނާ އަޑު އިވި، އެ މަންޒަރު ބަލަން ބައެއް މީހުން މަގުމަތީގައި ތިއްބެވެ.
ފްލޮއިޑް މަރުވި ގޮތަށް އެހާ ބޮޑު ސަމާލުކަމެއް ލިބުނީ އެ ތަނުގައި ހުރި ޒުވާން އަންހެނަކު ވީޑިއޯކޮށް، ސޯޝަލް މީޑިއާއާ ހިއްސާ ކުރުމުންނެވެ. އެއާއެކު އެތައް ހާސް ބަޔަކު ވަނީ މަގުތަކަށް ނުކުމެ ނުރުހުން ފާޅުކޮށް، ފުލުހުންގެ އަނިޔާވެރިކަން ނިމުމަކަށް ގެންނަން ގޮވާލާފަ އެވެ.
