އަމްސްޓެޑަމް (ޖޫން 26) - ޔޫރޯ ފުޓްބޯޅަ މުބާރާތުގެ ނޮކައުޓް ބުރުގެ ފުރަަތަަމަ މެޗުގައި މިރޭ ޑެންމާކާ ދެކޮޅަށް ނުކުންނައިރު، ވޭލްސް އަށް އޮތް އެންމެ ބޮޑު އެެއް ކަންބޮޑުވުމަކީ މި ފަހަރުގެ މުބާރާތުގައި ޑެންމާކުގެ ކްރިސްޓިއަން އެރިކްސަން އަށް ދިމާވި ކަންތައްތަކަށް ފަހު އެ ޓީމަށް ސަޕޯޓްކުރާ މީހުން ގިނަވުމެވެ. ވޭލްސް އިން މިރޭގެ މެޗަށް ނުކުންނާނީ އެ ހުރިހާ ކަމަކަށް ތައްޔާރުވެގެން ކަމަށް އެ ޓީމުން ވަނީ ބުނެފަ އެވެ.
ގްރޫޕް ސްޓޭޖުގައި ޑެންމާކުން ކުޅުނު ފުރަތަމަ މެޗުގައި އެރިކްސަން ހިތްހުއްޓިގެން ވެއްޓުމުން އޭނާ އަށް ފަރުދޭން ހޮސްޕިޓަލަށް ގެންގޮސް މިހާރު ވަނީ އޮޕަރޭޝަނެއް ކުރުމަށް ފަހު ދޫކޮށްލައިފަ އެވެ. އެރިކްސަނަށްޓަކައި ވަރުގަދަ ރޫހެއްގައި ނުކުމެ ގްރޫޕް ސްޓޭޖުގެ ފަހު މެޗުން ރަޝިއާ ބަލިކޮށް ޑެންމާކް ވަނީ ނޮކައުޓް ބުރުން ފުރުސަތު ހޯދައިފަ އެވެ. ޑެންމާކަކީ ގްރޫޕް ސްޓޭޖު ފުރަަތަމަ ދެ މެޗުން ބަލިވެ، ފަހު މެޗުން މޮޅުވެގެން ނޮކައުޓް ބުރުން ފުރުސަތު ހޯދި ހަމައެކަނި ޓީމެވެ.
މިރޭގެ މެޗަކީ ޑެންމާކުން މި ފަހަރުގެ ޔޫރޯގައި އަމިއްލަ ގައުމުން ބޭރުގައި ކުޅޭ ފުރަތަމަ މެޗެވެ. އެކަަމަކު، ޑެންމާކަށް އޮތް ހިތްހަމަޖެހުމަކީ އެރިކްސަން، އޭނާގެ ކްލަބް ކެރިއަރުގައި ޒުވާން އުމުރު ހޭދަކޮށް މުހިއްމު މެޗުތަކެއް ކުޅުނު އަޔަކްސް ޓީމުގެ ދަނޑުގައި މިރޭގެ މެޗު ކުޅުމެވެ. އަޔަކްސްގެ ގިނަ ސަޕޯޓަރުން އެރިކްސަން އަށް ޓަަކައި މިރޭ ޑެންމާކަށް ސަޕޯޓްކުރަން އަންނަނީ ތައްޔާރުވަމުންނެވެ.
"އަހަންނަށް އެނގޭ ހާލަތު އޮތްގޮތުން އެރިކްސަން އަށް ދިމާވި ކަންތައްތަކުގެ ސަބަަބުން ގިނަ ބަޔަކު އިމޯޝަނަލީ (ޖަޒުބާތުގައި ޖެހިގެން) މި ވަގުތު ޑެންމާކަށް ސަޕޯޓްކުރާނެ. އަހަރެމެން ވެސް އެރިކްސަންއާ އެކު މި ތިބީ. އެކަމަކު މި މެޗުގެ މުހިއްމުކަން ވެސް ބޮޑު. އަހަރެމެންނަށް އެނގޭ ދުނިޔޭގެ އެކި ހިސާބުތަކުން ޑެންމާކަށް ހެޔޮއެދޭ މީހުން ތިބިކަން. އެކަމަކު ދަނޑު މައްޗަށް އަރާއިރު ހުރިހާ ކަމެއް އޮންނާނީ ކުޅުންތެރިންގެ އަތްމަތީގައި،" މިރޭގެ މެޗުގެ ކުރިން ވޭލްސްގެ ކެޕްޓަން ގަރެތު ބޭލް ބުންޏެވެ.
މި ފަހަރުގެ ޔޫރޯގެ މެޗެއްގެ ތެރެއިން ބޭލް އެ ޓީމުގެ ބައެއް ކުޅުންތެރިންނާ އެކު.
ބޭލް ބުނީ ގްރޫޕް ސްޓޭޖުގައި ތުރުކީއާ ދެކޮޅަށް އަޒަރުބައިޖާނުގެ ބަކޫ އޮލިމްޕިކް ސްޓޭޑިއަމްގައި ކުޅުނު މެޗަށް 18،000 ސަޕޯޓަރުން ވަންއިރު، އޭގެއިން ގިނައީ ތުރުކީ ސަޕޯޓަރުން ކަމަށާއި އެކަމަކު އޭގެ ސަބަބުން މާ ބޮޑު ތަފާތެއް ދެ ޓީމުން ދަނޑުމަތީގައި ކުރި މަސައްކަތުން ނުފެންނަ ކަމަށެވެ.
ގްރޫޕް ސްޓޭޖުގެ ފަހު މެޗުން އިޓަލީ އަތުން ވޭލްސް ބަލިވިއިރު، އެންމެ ފަހުން އެ ޓީމު ޖެހިޖެހިގެން ދެ މެޗުން ބަލިވީ 2019 ވަނަ އަހަރުގެ ޖޫން މަހު އެވެ.
ވޭލްސްގެ ކޯޗު ރޮބާޓް ޕޭޖް ބުނީ ޑެންމާކާ ދެކޮޅަށް ކުޅެން މި ޖެހޭ މެޗަކީ އޭނާގެ ނަޒަރުގައި ފުޓްބޯޅަ ދަނޑެއްގެ މަތީ ކުރާ ވަރުގަދަ ހަނގުރާމައެއް ކަމަށެވެ. އަދި ވޭލްސް އިން ތިބެން ޖެހޭނީ ހުރިހާ ހާލަތަކަށް ވެސް ތައްޔާރުވެގެން ކަމަށް ޕޭޖް ބުންޏެވެ.
"މިހާރު ދެން މި އޮތީ ހުރިހާ ކަމެއް ފެށިފައި. އަންގި ބާލައިގެން އަހަރެމެން މަސައްކަތަށް ނުކުންނަންވީ، މި ތިބީ ނޮކައުޓް ބުރުގައި،" ޕޭޖް ބުންޏެވެ.
ބްރެޒިލް އަތުން 1958 ވަނަ އަހަރުގެ ވޯލްޑް ކަޕްގެ ކުއާޓާ ފައިނަލުން ބަލިވި ފަހުން ވޭލްސް އިން ބޮޑު މުބާރާތުގެ ނޮކައުޓް ބުރުގައި ކުޅުނީ އެންމެ ފަހުން 2016 ވަނަ އަހަރު ފްރާންސްގައި ބޭއްވި ޔޫރޯގަ އެވެ. އެ ފަހަރުގެ މުބާރާތުގެ ސެމީ ފައިނަލުން ވޭލްސް ބަލިވީ ޕޯޗުގަލް އަތުންނެވެ.
ޑެންމާކަށް ނެދަލެންޑްސްގެ އިން އޮތް ލޯބި ފެންނާނެ މެޗެއް
ޑެންމާކްގެ ކޯޗު ކެސްޕާ ޖޮލްމަންޑްގެ ނަޒަރުގައި ޑެންމާކުގެ ބޯޑަރުން ބޭރުގައި އެ ގައުމުގެ ފުޓްބޯޅަ އަށް ހެޔޮ އެދޭ އެންމެ ގިނަ ބަޔަކު ތިބޭނެ ގައުމަކީ މިރޭގެ މެޗު ކުޅޭ ނެދަލެންޑްސް އެވެ. މިރޭގެ މެޗު ކުރިއަށްދާނެ ނެދަލެންޑްސްގެ އާމްސްޓެޑަމްގެ ޔޯހަން ކްރައިފް އޭރީނާ އަަކީ ޑެންމާކުގެ ގިނަ ޒުވާނުންނަކަށް ފުޓްބޯޅައިން ކުރިއަށްދާން މަގުކޮށައިދިން މަޝްހޫރު ކްލަބް ކަމަށްވާ އަޔަކްސްގެ ހޯމް ސްޓޭޑިއަމެވެ.
"(އަޔަކްސް) އަމްސްޓެޑަމް އާއި ޑެންމާކް އަދި ނެދަލެންޑްސް ވަރަށް ގުޅުން ބޮޑުވާނެ. އެރިކްސަން އޭނަގެ އުމުރުން 16 އަހަރުގައި ޑެންމާކް، އޭނަގެ ފުރަތަމަ ގެ ދޫކޮށްފައި އަޔަކްސް އަށް އައިސް ގަބޫލުކުރީ ނެދަލެންޑްސް އަކީ އޭނާގެ ދެ ވަނަ ގެ ކަމަށް. ދެން ނަން ކިޔަންޏާ ޑޯލްބާގް އާއި ބޮއިލްސަން އަކީ ވެސް އަޔަކްސް އިން ދިން ފުރުސަތުން ކުރިއަރައިގެން ގޮސް މިހާރު ގައުމީ ޓީމުގައި ތިބި ކުޅުންތެރިން. އެހެންވީމަ މި ބުނަނީ މި ދަނޑު. މި ގައުމު އަހަރެމެންނަށް އޮތް ލޯބި ދައްކައިދޭނެއޭ،" މިރޭގެ މެޗުގެ ކުރިން އޮތް ނޫސްވެރިންގެ ބައްދަުވުމުގައި ޖޮލްމަންޑް ބުންޏެވެ.
އެރިކްސަން ޓީމާ އެކު ނެތް ނަމަވެސް ޖޮލްމަންޑް އަތުގައި އެރިކްސަން އަށް ހާއްސަކޮށް ބްރޭސްލެޓެއް ވަނީ އަޅައިފަ އެވެ. ޖޮލްމަންޑް ބުނީ އޭނާގެ ހަޔާތުގައި އަލަށް ވެސް އެ ކަހަލަ އެއްޗެއް އަތުގައި ނާޅާ ކަމަށާއި އެކަމަކު މި ފަހަރު އެ ބްރޭސްލެޓް އެޅުމުގެ މަގުސަދަކީ އެރިކްސަން ޓީމާ އެކު ފިޒިކަލީ ނެތް ކަމުގައި ވިޔަސް އޭނާގެ ރޫހު ޓީމާ އެކު ހުރިކަމުގެ ހަނދާން އާ ކުރުމަށެވެ.
އެންމެ ފަހުން ވޭލްސްއާ ދެކޮޅަށް ޑެންމާކުން ކުޅުނު 10 މެޗުގެ ތެރެއިން ވަނީ މޮޅުވެފަ އެވެ. ވޭލްސް މޮޅުވީ ހަތަރު މެޗުންނެވެ. ޑެންމާކުން ވާދަވެެރި މެޗެއްގައި އެންމެ ފަހުން ވޭލްސްއާ ބައްދަލުކުރީ 2018 ވަނަ އަހަރުގެ ނޭޝަންސް ލީގުގަ އެވެ. އޭގެއިން އެއް މެޗުގައި ޑެންމާކުން 2-0 އިން ވޭލްސް ބަލިކުރިއިރު، ދެ ގޯލު ޖެހީ ވެސް އެރިކްސަން އެވެ.
މިރޭގެ މެޗަކީ ޑެންމާކުން 2004 ވަނަ އަހަރަށް ފަހު ޔޫރޯގެ ނޮކައުޓް ބުރުގައި ކުޅޭ ފުރަތަމަ މެޗެވެ. އެ ފަހަރު އެ ޓީމު ކެޓީ ކުއާޓާ ފައިނަލުގައި ޗެކް ރިޕަބްލިކް އަތުންނެވެ. މިރޭ ވޭލްސްއާ ދެކޮޅަށް ޑެންމާކް ކުޅޭ މެޗު ފަށާނީ ރާއްޖެ ގަޑިން 21:00 ގަ އެވެ.
