ޒިއުރިކް (ޖޫން 25) - މި ފަހަރުގެ ޔޫރޯ އާއި ދެން ޔުއެފާ އިން ދެން ކުރިއަށްގެންދާ މުބާރާތްތަކުގައި ނޫސްވެރިންގެ ބައްދަލުވުންތަކުގެ ތެރެއިން މުސްލިމް ކުޅުންތެރިންގެ ކުރިމަތީގައި ބިޔަރު އިސްތިހާރު ނުކުރަން ޔުއެފާ އިން ނިންމައިފި އެވެ.
ޔުއެފާގެ ގިނަ މުބާރާތްތަކުގެ އެއް ސްޕޮންސަރުންނަކީ ނެދަލެންޑްސްގެ މަޝްހޫރު ބިޔަރު ބްރޭންޑް ހެނިކެން އެވެ. އޭގެ ފުޅިއެއް ކޮންމެ ނޫސްވެރިންގެ ބައްދަލުވުމެއްގެ ތެރެއިން އިސްތިހާރު ކުރުމަށް ކުޅުންތެރިންނާއި ކޯޗުން ކައިރީގައި ހުންނަ މޭޒުމަތީގައި ބަހައްޓާފައި ހުރެ އެވެ.
އެ ގޮތުން މި ފަހަރުގެ މުބާރާތުގައި އެހެން ބަހައްޓާފައި ހުރި ހެނިކެން ބިޔަރުފުޅިއެއް ފްރާންސްގެ މިޑްފީލްޑަރު ޕައުލް ޕޮގްބާ ވަނީ ދުރަށްލައިފަ އެވެ. އެއީ ޕޮގްބާ އަކީ މުސްލިމަކަށް ވެފައި ރަލާއި ބިޔަރަކީ މުސްލިމުންނަށް ހަރާމް އެއްޗެއް ކަމަށްވާތީ އެވެ.
ޕޮގްބާ މިގޮތަށް ކަންތައް ކުރީ މި ފަހަރުގެ މުބާރާތުގެ މެޗެއްގެ ކުރިން ޕޯޗުގީސް ތަރި ކްރިސްޓިއާނޯ ރޮނާލްޑޯ ނޫސްވެރިންގެ ބައްދަލުވުމެއްގައި ހުރި ކޯކް ފުޅިއެއް ދުރަށްލި ފަހުންނެވެ. ރޮނާލްޑޯ، ކޯކް ފުޅި ދުރަށްލީ އެއީ ސިއްހަތަށް ގެއްލުން ހުރި އެއްޗެއްކަން ދައްކައިދީ ފެން ބުއިމަށް ހިތްވަރު ދިނުމަށެވެ.
ޔުއެފާ އިން އޭގެ ފަހުން ވަނީ އެ ގޮތަށް ހުންނަ ސްޕޮންސަރުންގެ ޕްރޮޑަކްޓް ދުރަަށްލާނަމަ ޓީމަށް އަދަބު ދޭނެ ކަމަށް ބުނެފަ އެވެ.
އެކަމަކު ފަހުން މުސްލިމް ކުޅުންތެރިންގެ ކަންކަމަށް ބަލައި، ޔުއެފާ އިން މިހާރު ނިންމާފައިވަނީ ކުޅުންތެރިން ކުރިމަތީގައި ނޫސްވެރިންގެ ބައްދަލުވުމުގައި ބިޔަރު އިސްތިހާރު ނުކުރާށެވެ. އެ ގޮތުން ކޮންމެ ނޫސްވެރިންގެ ބައްދަލުވުމަކަށް އައުމުގެ ކުރިން މުސްލިމް ކުޅުންތެރިއަކު އެ ތަނަށް އަންނަ ނަމަ ކުރިން އެ މައުލޫމާތު ދޭން ޓީމުތަކަށް ޔުއެފާ އިން ވަނީ އަންގައިފަ އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި ވާދަކުރާ 24 ޓީމުގެ ތެރެއިން ގިނަ ޓީމުތަކަށް މުސްލިމް ކުޅުންތެރިން ކުޅެ އެވެ. އެންމެ ގިނައިން މުސްލިމް ކުޅުންތެރިން ތިބި ޓީމުތަކުގެ ތެރޭގައި ފްރާންސް ހިމެނެ އެވެ.
