ނިޔޯން، ސްވިޒަލެންޑް (ޖޫން 24) - އަންނަ ސީޒަނުން ފެށިގެން ޔުއެފާގެ ކްލަބް ފުޓްބޯޅަ މުބާރާތްތަކުގައި އަމަލުކުރަމުން އައި އަވޭ ގޯލް ރޫލް (ރަށުންބޭރުގައި ޖަހާ ލަނޑުތައް) ގެ ގަވާއިދު ދޫކޮށްލަން ޔޫރަޕްގެ މައި ފުޓްބޯޅަ އިދާރާ ޔުއެފާ އިން ނިންމައިފި އެވެ.
ޔޫރަޕްގެ ކްލަބް ފުޓްބޯޅަ މުބާރާތްތަކުގެ މެޗުތައް ދެ ލެގަށް ކުޅޭއިރު، ފޯރިގަދަ ކުރުމުގެ ގޮތުން އަވޭ ގޯލް ރޫލަށް އަމަލުކުރަން ފެށީ 1965 ފެށިގެންނެވެ. ދެ ޓީމުގެ ދެ ލެގުގެ މެޗު އެގްރިގޭޓުން އެއްވަރު ވެއްޖެނަމަ މޮޅުވާނެ ޓީމެއް ކަނޑައަޅަނީ ރަށުންބޭރުގައި ޖެހި ގޯލުގެ އަދަދުންނެވެ.
ޔޫރަޕްގެ އެންމެ ވަރުގަދަ މުބާރާތްތައް ކަމަށްވާ ޗެމްޕިއަންސް ލީގާއި ޔޫރޮޕާ ލީގު (ކުރިން - ޔުއެފާ ކަޕް)ގައި ޓީމުތަކުގެ ކާމިޔާބީގައި އަވޭ ގޯލް ރޫލް މީގެ ކުރިން ވަނީ މުހިއްމު ދައުރެއް އަދާކޮށްފަ އެވެ. އެކަމަކު އަންނަ ސީޒަނުން ފެށިގެން އެ ގަވާއިދެއް ނޯންނާނެ އެެވެ.
ޔުއެފާގެ ރައީސް އަލެކްސަންޑަ ކެފެރިން ވިދާޅުވީ މި ބަދަލަކީ ޔުއެފާގެ ކްލަބް މުބާރާތުގެ މެޗުތައް އިންސާފުވެރި ގޮތަކަށް ނިމުމަށް ކުރެވޭ ކަމެއް ކަމަށާއި ކޮންމެ ގޯލެއްގެ ވެސް ބުރަދަން ވާން ޖެހޭނީ އެއްވަރެއް ކަމަށެވެ.
"މި ގަވާއިދު 1965 އިން ފެށިގެން އަމަލުކުރަމުން އައިއިރު ވެސް ހުރި ކަންބޮޑުވުންތަކެއް. ދެން ފާއިތުވި އަހަރުތަކުގައި ވަރަށް ފުޅާދާއިރާއެއްގައި މަޝްވަރާ ކުރެވިއްޖެ މި ގަވާއިދު އޮތުމާއި ނެތުމުން މީގެ އަންނާނެ ބަދަލުތަކާ ބެހޭގޮތުން. މި ގަވާއިދު އޮތުމުން މެޗުތަކަށް އެންމެ އިންސާފުވެރި ގޮތަކަށް ނަތީޖާ ކަނޑައެޅޭތޯ ފުޓްބޯޅައިގެ ގިނަ ސްޓޭކްހޯލްޑަރުން ވަނީ ސުވާލު އުފައްދާފައި. އެހެންވީމަ ހުރިހާ މަރުހަލާއެއް ފުރިހަަމަ ކޮށްފައި ނިންމީ މި ގަވާއިދު ދޫކޮށްލަން،" ކެފެރިން ވިދާޅުވި އެވެ.
އޭނާ ވިދާޅުވީ މި ބަދަލުގެ ސަބަބުން އެޓޭކިން ފުޓްބޯޅަ ކުޅެން ޓީމުތަކަށް ވަރަށް ބޮޑު ހިތްވަރެއް ލިބޭނެ ކަމަށާއި މިއީ ފުޓްބޯޅަ ސަޕޯޓަރުން ވެސް ވަރަށް ބޮޑަށް ގަޔާވާނެ ބަދަލެއް ކަން ޔަގީންކުރެވޭ ކަމަށެވެ.
އަވޭ ގޯލް ރޫލްގެ ސަބަބުން އެންމެ ފަހުން ނިމުނު ޗެމްޕިއަންސް ލީގުގައި ޕީއެސްޖީ އާއި ޕޯޓޯ އަށް ވަނީ ފައިދާކޮށްފަ އެވެ. އަދި އަންހެނުންގެ ޗެމްޕިއަންސް ލީގުގައި ޕީއެސްޖީ އަށް ކުރިއަށް ދެވުނީ އެ ގަވާއިދުގެ ތެރެއިންނެވެ.
