ދީނީ އިލްމުވެރިޔާ އަދި ގައުމީ ޔުނިވާސިޓީގެ އެސިސްޓެންޓް ޕްރޮފެސާ ޑރ. މުހައްމަދު އިޔާޒް އަބްދުއްލަތީފް އަންހެން ކުދިން ހިތާނުކުރުމަށް ހިތްވަރުދެއްވި ކަމަށް ބުނެ، އެ މައްސަލަ ރައްޔިތުންގެ މަޖިލީހުގެ ކަމާގުޅޭ ކޮމިޓީން ބަލައި ދިނުމަށް ހުށަހަޅައިފި އެވެ.
މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް މަޖިލީހަށް ފޮނުއްވި ސިޓީގައި ވިދާޅުވެފައިވަނީ، އަންހެނުން ހިތާނުކުރުމުގެ ނަމުގައި ހިންގާ، "ފީމޭލް ޖެނިޓަލް މިއުޓިލޭޝަން (އެފްޖީއެމް)"އަށް ހިތްވަރު ދެއްވައި ޑރ. އިޔާޒް މިއަދުގެ ހެނދުނުގެ ވަގުތެއް ޓްވީޓެއް ކުރައްވާފައިވާ ކަމަށެވެ.
ދިވެހި މުއައްސަސާތަކުގެ ޒިންމާދާރު މަގާމުތަކުގައި ތިއްބަވާ ބޭފުޅުން މިފަދަ ނުރައްކާތެރި އަމަލުތަކަށް ހިތްވަރު ލިބޭ ގޮތަށް މަސައްކަތް ކުރުމަކީ އަންހެނުން ނުރައްކަލަށް ހުށަހެޅި، އަންހެނުންގެ ހައްގުތައް ރައްކާތެރިކުރުމަށް ހުރަސް އެޅޭނެ ކަމެއް ކަމަށް މީކާއީލް ވިދާޅުވެފައިވެ އެވެ.
އެހެންކަމުން، އެ މައްސަލަ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީ މެދުވެރިކޮށް ބަލައި ދިނުމަށް، މީކާއީލް ވަނީ މަޖިލީހުގެ ރައީސްގެ އަރިހުން އެދިވަޑައިގެންފަ އެވެ.
މީކާއީލް އެ އިޝާރާތް ކުރެއްވީ އަންހެނުން ހިތާނުކުރުމުން ލިބޭ ފައިދާތަކާ ގުޅޭގޮތުން، އިސްލާމީ ސުވާލާއި ޖަވާބުތައް ޝާއިއުކުރާ ވެބްސައިޓެއްގެ ލިންކު އިޔާޒް ޓްވީޓު ކުރެއްވުމަށެވެ.
އެ ލިންކު ޓްވީޓު ކުރެއްވުމާއެކު، ގިނަ ބަޔަކު ވަނީ ޑރ. އިޔާޒަށް ވަރަށް ބޮޑަށް ފާޑުކިޔަމުންނެވެ.
ޑރ. އިޔާޒަށް ރައްދު ދެއްވައި ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވީ އަންހެނުން ހިތާނުކުރުމަކީ އިސްލާމްދީނުގައި ހިތްވަރުދޭ ކަމެއް ނޫން ކަން ދިރާސާތަކުން ފެންނަ އޮންނަ ކަމަށެވެ.
އަދި އެއީ ރާއްޖޭގެ ތާރީހުގައި އެއްވެސް ޒަމާނެއްގައި ކުރަމުން އައި ކަމެއް ނޫން ކަމަށް މިނިސްޓަރު ވިދާޅުވި އެވެ.
އެ ފާޑުކިޔުންތަކާ ގުޅިގެން ޑރ. އިޔާޒް ވިދާޅުވީ އިލްމީ ދިރާސާއެއްގެ މައްޗަށް ބިނާކޮށް ހިޔާލެއް ފާޅުކުރުމުން، އެ މީހަކު ވަޒީފާއިން ވަކިކޮށް ފިޔަވަޅު އަޅަން ގޮވުމަކީ ވަރަށް ނާތަހުޒީބީ ކަމެއް ކަމަށެވެ.
"ނިކަން އެއާ ދެކޮޅަށް ޕްރޫފްތައް ގެނެސް ބައްލަވަ. ސިކުނޑި ދެއްވި ފަރާތުން ކަނޑައަޅުއްވާފައިވާ ކަންތަކަށް ފާޑުކިޔަން ނޫޅުއްވާ،" ޑރ. އިޔާޒް ވިދާޅުވި އެވެ.
އެޗްއާރްސީއެމްއިން ދާދިފަހުން ބުނެފައިވާ ގޮތުގައި ރާއްޖޭގައި އަންހެން ކުދިން ހިތާނަކުރުމުގެ މައްސަލަތައް އިތުރުވަމުންދާކަން ވަނީ ފާހަގަކުރެވިފަ އެވެ. އެހެންވެ، އެކަން އެ ކޮމިޝަނުން ބަލަމުންދާ ކަމަށް ވެސް ބުނެފައިވެ އެވެ.
މިދިޔަ މާޗް މަހުގެ ތެރޭގައި ވެސް އެމްއެންޔޫ އިން ޑރ. އިޔާޒް ސަސްޕެންޑުކުރި އެވެ.
އެފަހަރު ވެސް އިޔާޒް ސަސްޕެންޑުކުރީ ސޯޝަލް މީޑިޔާގައި ކުރެއްވި ޕޯސްޓުތަކަކާ ގުޅިގެން އާއްމުންގެ ފަރާތުން ލިބުނު ޝަކުވާތަކަކާ ގުޅިގެން ކަމަށް އެމްއެންޔޫއިން ބުންޏެވެ.
އެ ސަސްޕެންޝަން އުވާލި ފަހުން ވެސް، ޑރ. އިޔާޒް ގެންދަވަނީ ދީނީ ގިނަ ކަންކަމުގައި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
އެގޮތުން، ކޮވިޑާ ގުޅިގެން މިސްކިތްތަކުގައި ގައިދުރުކޮށްގެން ނަމާދު ކުރުމާއި، އާއްމު ތަނެއްގައި މުސްލިމަކު ކާފަރެއްގެ ގޮތުގައި ސިފަ ކުރުން ޖިނާއީ ކުށަކަން ހަދަން ސަރުކާރުން މިހާރު ހުށަހަޅައިގެން އުޅޭ އިސްލާހާ ދެކޮޅަށް ފާޅުގައި އެންމެ ބޮޑަށް ފާޑުވިދާޅުވަމުން ގެންދަވާ އެއް ބޭފުޅަކީ ޑރ. އިޔާޒެވެ.
