ކޮވިޑުން ރައްކާތެރިވާން އަޅާފައިވާ ފިޔަވަޅުތަކަށް ދެމުން އަންނަ ލުއިތަކާ ގުޅިގެން މާލެ ސަރަހައްދުގައި ކާބޯތަކެތީގެ ހިދުމަތްދޭ ތަންތަނުން ޑެލިވަރީ އަދި ޓޭކްއަވޭ ހިދުމަތް ދެވޭ ވަގުތު މިއަދުން ފެށިގެން އިތުރުކުރަން އިކޮނޮމިކް މިނިސްޓްރީން ނިންމައިފި އެވެ.
އިކޮނޮމިކް މިނިސްޓްރީން ބުނި ގޮތުގައި މިއަދުން ފެށިގެން މި މަހުގނިޔަލަށް ސައިހޮޓާ، ކެންޓީން، ކެފޭ، ރެސްޓޯރަންޓްތަކުން ހެނދުނު 8:00 އިން ހަވީރު 6:00 ގެ ނިޔަލަށް ޓޭކްއަވޭ ހިދުމަތް ދެވޭނެ އެވެ. އަދި ހެނދުނު 6:00 އިން މެންދަމު 12:00 އަށް، ފުލުހުންގެ ހުއްދަ ނަގައިގެން ޑެލިވަރީ ހިދުމަތް ދެވޭނެ އެވެ.
މި ތަންތަނުގައި ހިދުމަތްދޭ މުވައްޒަފުން ތިބެން ޖެހެނީ ފުލުހުން އަތުން ނަގަން ޖެހޭ ހުއްދަތައް ނަގައިގެންނެވެ. އަދި ހިދުމަތް ދިނުމުގައި ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އެކުލަވާލާފައިވާ ގައިޑްލައިނާ އެއްގޮތަށް އަމަލުކުރުމަށް މިނިސްޓްރީން އިލްތިމާސްކުރެ އެވެ.
ކާބޯތަކެތީގެ ހިދުމަތްދޭ ތަންތަނުން ޓޭކްއަވޭ އަދި ޑެލިވަރީގެ ހިދުމަތްދެވޭ ވަގުތުތައް އިތުރުކުރި ނަމަވެސް ކާބޯތަކެތީގެ ހިދުމަތްދޭ އެއްވެސް ތަނެއްގެ ތެރޭގައި ތިބެގެން ހިދުމަތް ދިނުން އަދިވެސް މަނަލެވެ. އަދި ޓޭކްއަވޭ ހިދުމަތްދޭ ތަންތަނުގެ ކައިރީގައި މަޑުކޮށްގެން ތިބެ ހިދުމަތް ހޯދުމަކީ ވެސް މަނާ ކަމެކެވެ.
ރެސްޓޯރަންޓް ވިޔަފާރިވެރިން ވަނީ މިހާރު އަޅާފައިވާ ފިޔަވަޅުތަކަށް މިހާރަށް ވުރެ ބޮޑެތި ލުއިތަކެއް ދޭން ރައީސް އިބްރާހިމް މުހައްމަދު ސޯލިހަށް ހުށައަޅުއްވާފަ އެވެ.
އޭގެ ތެރޭގައި 24 ގަޑިއިރަށް ޑެލިވަރީ ހުޅުވާލުމާއި ލިމިޓްކޮށްގެން އެތެރޭގައި ކަސްޓަމަރުންނަށް ހިދުމަތް ދޭން ހުއްދަ ދިނުން ހިމެނެ އެވެ. ނަަމަވެސް މި ލުއިތަކުގެ ތެރޭގައި އެއިން އެއްވެސް ކަމެއް ހިމަނާފައެއް ނުވެ އެވެ.
މިހާރު އެޗްޕީއޭއިން ލުއި ދިނުމުގައި އަމަލުކުރަމުން އަންނަ އުސޫލަކީ އެއްފަހަރާ ލުއިތަކެއް ދިނުމުގައި ބަދަލުގައި ކޮންމެ ހަފުތާއަކުން ވަކިވަރަކަށް ލުއި ދީގެން ކުރިޔަށްދާ ގޮތަށެވެ. އެހެންކަމުން އިތުރު ލުއިތަކެއް ދޭން އިތުރު ހަފުތާއެއް ނަގާނެ ކަމަށް ބެލެވެ އެވެ.
