މުސްލިމަކީ ކާފަރެއް ކަމަށް ބުނުމާއި ވަކި މީހަކީ ދީނާ ދެކޮޅު މީހެއް ކަމަށް ބުނުން އެއީ ޖިނާއީ ކުށަކަށް ހަދަން ސަރުކާރުން ރައްޔިތުންގެ މަޖިލީހަށް ހުށަހެޅި ބިލް އަނބުރާ ގެންދިއުމަށް ގޮވާލާ ދީނީ އިލްމުވެރިން ހުށަހެޅި ޕެޓިޝަނުގައި ސޮއި ކުރައްވަން ޖަމިއްޔަތުއް ސަލަފުގެ ބައެއް އިސްވެރިން ދެކޮޅު ހައްދަވައިފި އެވެ.
ނަފުރަތުގެ ބިލް އަނބުރާ ގެންދިއުމަށް ގޮވާލާ ރައީސް އިބްރާހިމް މުހައްމަދު ސޯލިހަށް ހުށަހެޅުއްވި ޕެޓިޝަނުގައި ސަލަފް ޖަމިއްޔާގެ ނައިބު ރައީސް ޝެއިހު ހަސަން މޫސާ ފިކުރީ ހިމެނިވަޑައިގަންނަވާ ގޮތަށް ބައެއް ދީނީ އިލްމުވެރިން ވަނީ ސޮއި ކުރައްވައިފަ އެވެ.
އެކަމަކު އެ ޖަމިއްޔާގެ ރައީސް ޝެއިހު އަބްދުﷲ ބިން މުހައްމަދު އިބްރާހިމް އާއި އިލްމުވެރިންގެ މަޖިލީހުގެ ރައީސް ޝެއިހު އަހުމަދު ސަމީރު އެ ޕެޓިޝަނުގައި ސޮއި ކުރައްވާފައެއް ނުވެ އެވެ.
މި ނޫހާ ވާހަކަ ދައްކަވަމުން ޝެއިހު އަހުމަދު ސަމީރު ވިދާޅުވީ ޕެޓިޝަނުގައި ސޮއި ނުކުރެއްވީ ނަފްރަތުގެ ބިލާ ގުޅޭ ގޮތުން އެ ޕެޓިޝަނުގައި ސޮއި ކުރައްވާފައިވާ ބައެއް އިލްމުވެރިންގެ ވިސްނުން އެއްކޮށް ސާފުނުވާތީ ކަމަށެވެ.
"ސަރުކާރު ކޯލިޝަންގައި ހިމެނޭ ބައެއް ބޭފުޅުން މީގައި އެބަ ސޮއި ކުރައްވާ. އެބޭފުޅުންގެ ވިސްނުންފުޅު އަޅުގަނޑަކަށް ސާފެއް ނޫން ބިލާމެދުގައި. އެބޭފުޅުންނަކީ ސަރުކާރުން ބިލާމެދުގައި ލަފާ އެންމެ ފުރަތަމައިނުން އަހާނެ ބޭފުޅުން އަނެއްހެން ބަލައިފިއްޔާ،" ސަމީރު ވިދާޅުވި އެވެ.
ޝެއިހު ސަމީރު ވިދާޅުވީ ސަރުކާރުގެ ކޯލިޝަނުގައި ހިމެނޭ އަދި އެ ބިލުގައި ސޮއި ކުރައްވާފައިވާ އިލްމުވެރިންގެ ހިޔާލު ބިލާމެދު ބަދަލުނުވާނެ ކަމުގެ ޔަގީންކަން ނެތް ކަމަށެވެ.
"އަޅުގަނޑުމެން އެބޭފުޅުންގެ ފަހަތުގައި ބިލް އެއްކޮށް ނެގުމުގެ ވިސްނުމުގައި ތިއްބާ އެބޭޭޭޭފުޅުން ބިލާ މެދުގައި އެހެން މައުގިފްއެއް ނުވަތަ އެހެން ވިސްނުމެއް އިހްތިޔާރު ކުރައްވާނީ ކޮންއިރަކު ކަމެއް ކިހިނެއް ކަމެއް އަޅުގަނޑުމެންނަކަށް ސާފެއް ނޫން،" އޭނާ ވިދާޅުވި އެވެ.
މޯލްޑިވިއަން ޑިމޮކްރަސީ ނެޓްވޯޓް (އެމްޑީއެން) އިން ނެރުނު ރިޕޯޓު މައްސަލައިގައި ވެސް އެންމެ ފުރަތަމަ މަސައްކަތް ކުރީ ޖަމިއްޔާ އުވާލުމާއެކު އެ މަސައްކަތް ކުރި މީހުންނަށް ފިޔަވަޅު އަޅަން ކަމަށެވެ. ނަމަވެސް ފަހުން އެ މަސައްކަތުގައި އުޅުނު އެއް ބަޔަކު އެއްބަސްވެގެން ހަމައެކަނި ޖަމިއްޔާ އުވާލުމަށްފަހު ފުއްދާލީ ކަމަށް އޭނާ ވިދާޅުވި އެވެ.
"އަނެއްކާ ބައެއް ބޭފުޅުންގެ ވާހަކަތަކުން އޭތި އިސްލާހު ކުރަންޖެހޭނެ ކަމާއި އެ އެއްޗަކީ އަސްލު ހުށަހަޅަންޖެހޭ އެއްޗެއް ކަމާއި އެކަހަލަ ވާހަކަތަކެއް އިވިފައި ހުރީމަ އަޅުގަނޑުމެންނަށް އެއަށް ގެރެންޓީ ނެތީމަ އަޅުގަނޑުމެން އޭގައި ސޮއި ނުކުރީ،" ސަމީރު އިތުރަށް ވިދާޅުވި އެވެ.
މީހުން ކާފަރު ކުރުމާއި އަގީދާއާ ގުޅުވައިގެން އެކި ތުހުމަތުތައް ކުރުން މަނާ ކުރުމުގެ މަސައްކަތް ސަރުކާރުން މި ކުރަނީ ކުރީގެ ރައީސް މުހައްމަދު ނަޝީދު އަވަހާރަކޮށްލަން ބަޔަކު މިދިޔަ މެއި، 6، ގައި ބޮމެއް ގޮއްވާލި ފަހުންނެވެ.
ނަފްރުގެ ބިލު ހުށަހެޅުމާއެކު ކުރިމަތިވި ޕްރެޝަރުތަކަށްފަހު، އިސްލާމް ދީނަށް ފުރައްސާރަ ކުރުމަކީ ވެސް ކުށެއް ކަމަށް ހަދައި އެކަން ތަފްސީލުކޮށް ބިލެއް ތައްޔާރު ކުރައްވަމުން ގެންދަވާ ކަމަށް ބަންޑާރަ ނައިބު އިބްރާހިމް ރިފްއަތު އޮތީ ވިދާޅުވެފަ އެވެ.
