ވޮއިސް ޗެޓް ރޫމް ނުވަތަ އަޑު ބޭނުންކޮށްގެން ޗެޓު ކުރެވޭ ގޮތަށް ތައާރަފުކޮށްފައިވާ މުޅިން އާ ބާވަތެއްގެ ސޯޝަލް ނެޓްވޯކިން ޕްލެޓްފޯމް، ކްލަބްހައުސްއިން ތައްޔާރު ކުރަމުންދާ އާ ފަންކްޝަނެއް އޮޅިގެން ލީކު ކުރެވިއްޖެ އެވެ.
ކްލަބްހައުސްގެ އޯޑިއޯ ޗެޓަށް ބޮޑު މަގްބޫލުކަމެއް ލިބެމުން ދާތީ ސްޕޮޓިފައި އަދި ފޭސްބުކް ފަދަ ޕްލެޓްފޯމުތަކުން ވެސް މިހާރު އަވަސްވެގަނެފައި ވަނީ އެފަދަ ފަންކްޝަނެއް ކޮޕީ ކުރުމަށެވެ.
ނަމަވެސް ރިޕޯޓުތައް ބުނާ ގޮތުން ކްލަބްހައުސްއިން ދަނީ ލައިވް އޯޑިއޯ ތަޖުރިބާއާ ދުރަށް ދިޔުމަށް ދިރާސާތައް ކުރަމުންނެވެ. އެގޮތުން ދަ ވާޖްގައިވާ ގޮތުން "ބެކްޗެނަލް" ގެ ނަން ދީފައިވާ ފީޗާއެއް މިދިޔަ ހަފްތާގައި ވަނީ އޮޅިގެން ލީކުކުރެވިފަ އެވެ.
މުޅިން އަލަށް ތައްޔާރު ކުރަމުންދާ ކަމަށް ބެލެވޭ "ބެކްޗެނަލް" ފީޗާ މިދިޔަ ހަފްތާގައި ބައެއް މީހުންނަށް ބޭނުން ކުރަން ލިބުނެވެ. އެ ފީޗާ ލިބުނު މީހުން ޕޯސްޓުކޮށްފައިވާ ބައެއް ޓްވީޓުތަކަށް ބަލާއިރު، ބެކްޗެނަލްއަކީ އޯޑިއޯގެ ބަދަލުގައި ޓެކްސްޓު ނުވަތަ ލިޔުމުން މުއާމަލާތް ކުރެވޭނެ ގޮތް ފަހިކޮށްދޭ ފީޗާއެކެވެ.
ބައެއް މީހުންނަށް އެ ފީޗާ ބޭނުން ކުރަން ލިބުނުތާ މާ ގިނައިރުތަކެއް ނުވެ، އަލުން ވަނީ އެ ބޭނުން ނުކުރެވޭނެ ގޮތް ހަދާފަ އެވެ. އެކަމާ ގުޅޭ ގޮތުން ކްލަބްހައުސްގެ ތަރުޖަމާނަކު ދަ ވާޖްއަށް ބުނީ "ކުންފުނިން ދަނީ ގަވާއިދުން އާ ފީޗާތައް އުފައްދާ ޓެސްޓު ކުރަމުން" ކަމަށެވެ.
