ގާޒާ، ފަލަސްތީނު (ޖޫން 21) - ގާޒާއަށް ދިމާވެފައިވާ އިންސާނީ ކާރިސާ ނިމުމަކަށް ގެންނަން އިޒްރޭލުން ބޭނުން ނުވާ ކަމަށާއި އޭގެ ސަބަބުން އދ. އާއެކު ކުރިއަށްދާ މަޝްވަރާތަކުން ކުރިއެރުން ނުލިބޭ ކަމަށް ހަމާސް ޖަމާއަތުން ބުނެފި އެވެ.
ގާތްގަނޑަކަށް ދެ މިލިއަން ފަލަސްތީނު ރައްޔިތުން ދިރިއުޅޭ ގާޒާ އޮންނަނީ 2007 އިން ފެށިގެން ހުރިހާ ފަރާތަކުން ބައްދާލާފަ އެވެ. ގާޒާއަށް ވަދެ ނުކުތުމަށް އޮންނަ ހުރިހާ ރޫޓެއް ކޮންޓްރޯލް ކުރަނީ އިޒްރޭލުންނެވެ.
ގާޒާގައި ވެރިކަން ކުރާ ހަމާސް އާއި އިޒްރޭލާ ދެމެދު މިދިޔަ މަހު 11 ދުވަސް ވަންދެން ހަމަލާ ބަދަލު ކުރުމުން ގާޒާއަށް ބޮޑެތި ގެއްލުންތަކެއް ވަނީ ވެފަ އެވެ.
ހަމަލާ ބަދަލު ކުރުން ހުއްޓާލަން އެއްބަސްވިތާ އެއް މަސް ފަހުން އދ. ގެ މަންދޫބު ޓޯ ވެނެސްލޭންޑް އިއްޔެ ވަނީ ގާޒާއަށް ވަޑައިގެންފަ އެވެ. ނަން ހާމަ ނުކުރާ ހަމާސްގެ އޮފިޝަލަކު ބުނީ މަންދޫބު އެންމެ ފުރަތަމަ ވެސް ދެއްވީ އިޒްރޭލުގެ ފަރާތުން "ނެގެޓިވް މެސެޖެއް" ކަމަށެވެ.
"ބައްދަލުވުން ވަރަށް ގޯސް. ޕޮޒިޓިވް އެއްވެސް ކަމެއް ނުފެނޭ،" ހަމާސްގެ ސިޔާސީ ގޮފީގެ ވެރިޔާ ޔަހްޔާ ސިންވާރް ނޫސްވެރިންނަށް ވިދާޅުވި އެވެ.
"އެ މީހުން ވަރަށް ކަނުލާ އަޑުއެހި. އެކަމަކު ގާޒާގައި އޮތް އިންސާނީ ކާރިސާއަށް ހައްލު ހޯދުމަށް ބޭނުންވާ ކަމުގެ އެއްވެސް ނިޝާނެއް ނުފެނުނު".
އދ. އިން ވަނީ އެކަމާ ގުޅޭ ގޮތުން ވަކި އެއްޗެއް ބުނަން ދެކޮޅު ހަދާފަ އެވެ.
ގާޒާގެ ދަނޑުތަކުގައި އުފައްދާ ބައެއް ތަކެތި ލިމިޓަކާއެކު އެކްސްޕޯޓް ކުރުމުގެ ހުއްދަ އިޒްރޭލުން އިއްޔެ ދިން ނަމަވެސް އެއީ މާ ބޮޑު ފައިދާއެއް އޮތް ކަމެއް ނޫން ކަމަށް ސިންވާރް ފާހަގަކުރެއްވި އެވެ.
އޭނާ ތުހުމަތު ކުރެއްވި ގޮތުގައި އިޒްރޭލުން ދަނީ ބައިނަލްއަގްވާމީ އިންސާނީ އެހީއަށް ހުރަސް އަޅައި، ކަރަންޓު ދިނުމަށް ބޭނުންވާ ތެޔޮ ލިބެން ހުރި މަގުތައް ވެސް ބަންދު ކުރަމުންނެވެ.
"ވަރަށް ސާފުކޮށް ފެންނަމުން ދަނީ އިޒްރޭލުގެ އިސްތިއުމާރީ ސިޔާސަތު ގާޒާ އާއި ފަލަސްތީނު ރައްޔިތުންނާ ދެކޮޅަށް ހިންގަމުންދާ މަންޒަރު،" އޭނާ ވިދާޅުވި އެވެ.
"އަަޅުގަނޑުމެން އދ. ގެ މަންދޫބުންނަށް ދެންނެވީ މިކަން ގަބޫލު ނުކުރާނެ ކަމަށް."
އިޒްރޭލާއި ހަމާސްއާ ދެމެދު ހަމަލާ ބަދަލު ކުރުން ހުއްޓާލަން އެއްބަސްވީ މޭ 21 ގަ އެވެ. އެ ހަމަލާތަކުގައި 260 ފަލަސްތީނު މީހުންނާއި އިޒްރޭލުގެ 13 މީހުން މަރުވި އެވެ. ހަމަލާތައް ހުއްޓާލި ނަމަވެސް، މިދިޔަ ބުރާސްފަތި އަދި ހުކުރު ދުވަހު އަލުން ހަމަލާ ބަދަލުކޮށްފައި ވެ އެވެ.
