އަބޫ ދާބީ، ޔޫއޭއީ (ޖޫން 21) - ޔޫއޭއީއަށް އެތެރެވާ ފަތުރުވެރިންނަށް ހިލޭ ކޮވިޑް ވެކްސިން ދޭން ފަށައިފި އެވެ.
ރަސްމީކޮށް އެކަން އިއުލާނު ނުކުރި ނަމަވެސް މި މަހު ކުރީކޮޅު ނެރުނު ކުރު ބަޔާނެއްގައި ބުނީ "އެންޓްރީ ވިސާ" އޮތް ކޮންމެ މީހަކަށް ހިލޭ ވެކްސިން ދޭން ނިންމާފައިވާ ކަމަށެވެ.
މީގެ ކުރިން ޔޫއޭއީގައި ވެކްސިން ދިނީ ހަމައެކަނި އައިޑީ ކާޑެއް އޮތް އެ ތަނުގައި ދިރިއުޅޭ މީހުންނަށް އެކަންޏެވެ. ނަމަވެސް މިހާރު އަބޫ ދާބީގެ ހެލްތުކެއާ އެޕުގައި ގައުމަށް ޒިޔާރަތް ކުރާ މީހުންނަށް ހާއްސަ ބައެއް ވަނީ ހިމަނާފަ އެވެ.
އެގޮތުން އެޕް މެދުވެރިކޮށް ފައިޒާ ނުވަތަ ސިނޮފާމް ވެކްސިނަށް ރަޖިސްޓްރީ ކުރެވޭނެ އެވެ. އަދި ޕާސްޕޯޓްގެ މައުލޫމާތު ބޭނުންކޮށްގެން ވެކްސިން ޖަހަން އެޕޮއިންޓްމަންޓް ހަމަޖެއްސޭނެ އެވެ.
ވެކްސިން ޖެހުމުގެ ކުރިން ވިސާ ނުވަތަ އެންޓްރީ ސްޓޭމްޕް ދައްކަން ޖެހޭނެ އެވެ. ވެކްސިން ޓޫރިޒަމް ފަށާފައި ވާއިރު، އެކަމާ ބެހޭ އިތުރު މައުލޫމާތު ޔޫއޭއީން އާއްމެއް ނުކުރެ އެވެ.
ޔޫއޭއީގައި ކޮވިޑާ ދެކޮޅަށް ދަނީ ކާމިޔާބު ވެކްސިން ޕްރޮގްރާމެއް ހިންގަމުންނެވެ. އެ ގައުމުގެ ގިނަ ކަންކަން އާދައިގެ މަތިން ކުރިއަށް ދިޔަ ނަމަވެސް، މާސްކު އެޅުމާއި ގައިދުރުކަން ބަހައްޓަން ޖެހެ އެވެ.
ކޮވިޑުގެ ބަލިމަޑުކަމަށް ފަހު ކުރި ލޮކްޑައުން ނިމުމާއެކު މިދިޔަ ޖުލައި މަހުން ފެށިގެން ޔޫއޭއީގެ ދުބާއީ އޮތީ ހުރިހާ އެންމެންނަށް ޒިޔާރަތް ކުރެވޭނެހެން ހުޅުވާލާފަ އެވެ. އެއާ ހިލާފަށް އަބޫ ދާބީގެ ބޯޑަރު ހުޅުވާލީ މިދިޔަ ޑިސެމްބަރު މަހު އެވެ.
ޔޫއޭއީގައި މިހާތަނަށް 613،993 ކޮވިޑް ކޭސް ފެނިފައި ވާއިރު، މަރުވެފައި ވަނީ 1،763 މީހުންނެވެ.
