ބްރެޒީލިއާ (ޖޫން 22) - ކޮޕަ އެމެރިކާ ފުޓްބޯޅަ މުބާރާތުގައި ރޭ 1-0 އިން ޕެރަގުއޭ ބަލިކޮށް އާޖެންޓީނާ އިން މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފި އެވެ.
އާޖެންޓީނާގެ އިތުރުން މިހާތަނަށް ކުއާޓާ ފައިނަލުން ފުރުސަތު ހޯދި އަނެއް ދެ ޓީމަކީ އެންމެ ފަހުގެ ޗެމްޕިއަން ބްރެޒިލް އާއި ޗިލީ އެވެ.
ގްރޫޕް އޭގެ އެއް ވަަނައިގައި އާޖެންޓީނާ އޮތީ ތިން މެޗުން ހަތް ޕޮއިންޓާ އެކު އެވެ. ދެ ވަނައިގައި އޮތީ ތިން މެޗުން ފަސް ޕޮއިންޓް ހޯދި ޗިލީ އެވެ. ރޭ މި ގްރޫޕްގައި ޗިލީ އާއި އުރުގުއޭ ކުޅުނު މެޗު ނިމުނީ 1-1 އިން އެއްވަރުވެގެންނެވެ.
އެސްޓަޑިއޯ ނަސިއޮނާލްގައި ރޭ ކުޅުނު މެޗު ފަށައިގެން ހަތް ވަނަ މިނިޓްގައި އާޖެންޓީނާ އަށް ލީޑުނަަގައިދޭން ސާޖިއޯ އަގުއޭރޯ ޖެހި ބޯޅަ ދިޔައީ ހުރަސްދަނޑިމަތިންނެވެ. އޭގެ ތިން މިނިޓް ފަހުން އެންހެލް ޑި މާރިއާ ދިން ބޯޅައަކުން އަލެހަންދްރޯ ގޯމޭޒް (ޕަޕޫ ގޯމޭޒް) ވަނީ އާޖެންޓީނާގެ ގޯލު ޖަހައިދީފަ އެވެ. މެޗުގެ 17 ވަނަ މިނިޓްގައި އޭރިއާ ކައިރިން ލިބުނު ހިލޭ ޖެހުމަކުން އާޖެންޓީނާގެ ކެޕްޓަން ލިއޮނަލް މެސީ ޖެހި ބޯޅަ ދިޔައީ ދަނޑިކައިރިން ބޭރުންނެވެ.
ފުރަތަމަ ހާފުގެ އިތުރު ވަގުތުގައި ޕެރަގުއޭގެ ޖޫނިއާ އަލޮންސޯ އަތުން ބައިކޮޅަށް ވަން ގޯލުން އާޖެންޓީނާ އިން ލީޑުފުޅާކުރި އެވެ. އެކަމަކު އެ ބޯޅަ ފޮނުވާލަން އަރައި ހުރި މެސީ އޮފްސައިޑް ކަމަށް ނިންމައި އެ ގޯލު ބަލައިނުގަތެވެ.
ދެ ވަނަ ހާފްގައި ޕެރަގުއޭ އިން ކުޅުން ރަނގަޅުކޮށް ގިނަ ހަަމަލާތަކެއް އުފެއްދި އެވެ. އެކަމަކު އާޖެންޓީނާ ގޯލުގައި ހުރި އެމިލިއާނޯ މާޓީނޭޒް ވަނީ ރަނގަޅު ކުޅުމެއް ދައްކައި ޕެރަގުއޭގެ އެޓޭކްތައް ހުއްޓުވައިފަ އެވެ.
މިއީ އާޖެންޓީނާގެ ކެޕްޓަން މެސީ އަށް ހާއްސަ މެޗެކެވެ. އޭނާ ވަނީ ގައުމީ ޓީމަށް 147 މެޗު ކުޅެދީގެން ހަވިއޭ މަޝެރާނޯ ހަދާފައިވާ ރެކޯޑާ ހަމަކޮށްފަ އެވެ. އާޖެންޓީނާ ފަހު މެޗުގައި ބައްދަލުކުރާނީ ބޮލިވިއާއާ އެެވެ. އެ މެޗުގައި ކުޅެގެން މެސީ އަށް ގައުމީ ޓީމަށް އެންމެ ގިނަ މެޗު ކުޅެދިނުމުގެ ރެކޯޑް ގާއިމްކުރެވޭނެ އެވެ.
ރޭ ކުޅުނު އަނެއް މެޗުގައި އެޑުއާޑޯ ވާގާސްގެ ގޯލުން ޗިލީން ލީޑުނެގި އެވެ. އުރުގުއޭ އިން އެއްވަރުކުރީ ޗިލީގެ އާޓޫރޯ ވިޑާލް އަތުން ބައިކޮޅަށް ވަން ގޯލުންނެވެ.
