ގުދުސް (ޖޫން 21) - އިޒްރޭލާއި ޔޫއޭއީއާ ދެމެދު ޑިޕްލޮމެޓިކް ގުޅުން ގާއިމް ކުރަން ނިންމި ފަހުން އިޒްރޭލުގެ ފޮރިން މިނިސްޓަރު ޔެއާ ލަޕިދް ފުރަތަމަ ފަހަރަށް ޔޫއޭއީއަށް އަންނަ ހުކުރު ދުވަހު ވަޑައިގަންނަވާނެ ކަމަށް އިއުލާނުކޮށްފި އެވެ.
ޔޫއޭއީ އާއި ބަހްރެއިނުން އިޒްރޭލާއެކު ގުޅުން ގާއިމް ކުރީ މިދިޔަ ސެޕްޓެމްބަރު މަހު އެވެ. އޭގެ އިތުރުން މޮރޮކޯ އާއި ސޫދާނާއެކު ގުޅުން ގާއިމްކުރަން ވެސް މިދިޔަ އަހަރު ފަހުކޮޅު އިޒްރޭލުން ނިންމި އެވެ.
"ފޮރިން މިނިސްޓަރު ޔެއާ ލަޕިދްގެ މި ދަތުރަކީ އިޒްރޭލުގެ ތާރީހުގައި ފޮރިން މިނިސްޓަރަކު އެ ގައުމަށް ކުރައްވާ ފުރަތަމަ ތާރީހީ ދަތުރު،" އިޒްރޭލުގެ ފޮރިން މިނިސްޓްރީން ނެރުނު ބަޔާނުގައި ވެ އެވެ.
ޖޫން 29 އިން 30 އަށް ކުރައްވާ ދަތުރުގައި ލަޕިދްއަށް މަރުހަބާ ދަންވަނާނީ ޔޫއޭއީގެ ފޮރިން މިނިސްޓަރު ޝެއިހް އަބްދުﷲ ބިން ޒައިދު އަލް ނަހްޔާން އެވެ.
މި މަހު ވެރިކަމަށް އައި އިޒްރޭލުގެ ކޯލިޝަން ސަރުކާރު އުފެއްދުމުގެ ފަހަތުގައި ހުންނެވީ ލަޕިދް އެވެ. މީގެ ކުރިން އިޒްރޭލުގެ މިނިސްޓަރުން ޔޫއޭއީއަށް ވަޑައިގެންފައި ވެ އެވެ. ނަމަވެސް ލަޕިދްއަކީ އެ ދަތުރު ކުރައްވާ އެންމެ އިސް އޮފިޝަލެވެ.
އެ ދަތުރުގައި އަބޫ ދާބީގައި އިޒްރޭލުގެ އެމްބަސީ ހުޅުވައި، ދުބާއީގައި އިޒްރޭލުގެ ކޮންޒިއުލޭޓް ޖެނެރަލް ހުޅުވާނެ އެވެ. އޭގެ އިތުރުން އިޒްރޭލުގެ އައި24ނިއުސް ޓެލެވިޝަން ނެޓްވޯކްގެ އޮފީހެއް ވެސް ދުބާއީގައި ހުޅުވަން ވަނީ ނިންމާފަ އެވެ.
