ދޯހާ، ގަތަރު (ޖޫން 21) - އަންނަ އަހަރު ގަތަރުގައި ބާއްވާ ފީފާ ވޯލްޑް ކަޕް ފުޓްބޯޅަ މުބާރާތުގެ މެޗުތައް ބަލަން ދަނޑަށް ވަދެވޭނީ ކޮވިޑް-19 ގެ ވެކްސިން ދެ ޑޯޒް ފުރިހަމަކޮށްފައިވާ މީހުންނަށް ކަމަށް ގަަތަރު ސަރުކާރުން ނިންމައިފި އެވެ.
ގަތަރުގެ ބޮޑުވަޒީރު ޝެއިހް ހާލިދު ބިން ހަލީފާ ބިން އަބްދުލް އަޒީޒް އަލް ތާނީ އިއްޔެ އެ ގައުމުގެ މީޑިއާ އަށް ވިދާޅުވީ ވޯލްޑް ކަޕް މެޗުތައް ބަލަން އަންނަން ބޭނުންވާ ފަރާތްތަކަށް ހާއްސަކޮށް ގަތަރުން އިސްވެ އެއް މިލިއަން ޑޯޒުގެ ވެކްސިން ޕްރޮގްރާމެއް ހިންގުމުގެ ވިސްނުން ގެންގުޅުއްވާ ކަމަށެވެ.
"ފީފާ ވޯލްޑް ކަޕްގެ ސީދާ ތާރީހުތައް އިއުލާނުކުރެވުމާ އެކު ގިނަ ގައުމުތަކުން ތިބޭނީ އެ ގައުމުގެ ރައްޔިތުންގެ ގަޔަށް ވެކްސިން ޖަހައިގެން. ފަހަރެއްގައި ވެކްސިން ނުލިބިގެން ބައެއް ގައުމުތަކުން ބައެއް މީހުން ގަޔަށް ވެކްސިން ނުޖެހިފައި ވެސް ހުރެދާނެ. ގަތަރުން ދެ ޑޯޒު ފުރިހަމަނުކުރާ އެއްވެސް ސަޕޯޓަރެއް މެޗު ބަލަން ދަނޑަށް ނުވައްދާނެ،" ގަތަރުގެ ބޮޑުވަޒީރު ޝެއިހް ހާލިދު ބިން ހަލީފާ ބިން އަބްދުލް އަޒީޒް ވިދާޅުވި އެވެ.
ގަތަރުގެ ވޯލްޑް ކަޕް ސްޓޭޑިއަމެއްގެ ތެރެއިން.
ގަތަރު ވޯލްޑް ކަޕް ފަށަން ފީފާ އިން މި ވަގުތު ކަނޑައަަޅާފައިވާ ތާރީހަކީ އަންނަ އަހަރުގެ ނޮވެމްބަރު އެއް ވަނަ ދުވަހެވެ. އާންމު ގޮތެއްގައި ޖޫން/ޖުލައި ގައި ބާއްވާ ވޯލްޑް ކަޕް ގަތަރުގައި އަހަރު ފަހު ކޮޅުގައި ކުޅޭ ގޮތަށް ނިންމި އެންމެ ބޮޑު ސަބަބަކީ ޖޫން މަހު ގަތަރުގެ ހޫނުމިން އާންމު ގޮތެއްގައި ވަރަށް ބޮޑަށް މައްޗަށް ދާތީ އެވެ. ޖޫން މަހާއި ޖުލައި މަހު ގަތަރުގެ ފިނިހޫނުމިން އުޅޭނީ 50 ޑިގްރީ ސެލްސިއަސްގަ އެވެ. އަދި އަހަރު ފަހު ކޮޅަށް ބަދަލުކޮށްފިނަމަ އުޅޭނީ 15-30 ޑިގްރީ ސެލްސިއަސްއާ ދެމެދުގަ އެވެ.
ވޯލްޑް ކަޕަށް ތައްޔާރުވުމުގެ ގޮތުން ގަތަރުން އަޅާ ސްޓޭޑިއަމްގެ ތަކުގެ މަސައްކަތްތަކުގެ ތެރެއިން މިހާތަނަށް 37 މީހެއް މަރުވެފައިވާ ކަމަށް އިނގިރޭސި މީޑިއާއެއް ކަމަށްވާ ދި ގާޑިއަން އިން ވަނީ ރިޕޯޓްކޮށްފަ އެވެ. އޭގެ ތެރޭގައި ގިނައިން ހިމެނެނީ ދެކުނު އޭޝިއާގެ ބަންގްލަދޭޝް އާއި އިންޑިއާގެ މީހުން ކަމަށް އެ ރިޕޯޓްގައިވެ އެވެ.
ގަތަރު ވޯލްޑް ކަޕް މަސައްކަތުގެ ތެރެއިން މީހުންނަށް އެކި ކަހަލަ ގެއްލުންތައް ވާތީ ޔޫރަޕްގެ ވޯލްޑް ކަޕް ކޮލިފައިން މެޗުތައް ފެށިއިރު، ގިނަ ގައުމުތަކުން ވަނީ ގަތަރުގެ ވޯލްޑް ކަޕް މަސައްކަތް އިންސާނީ ހައްގުތައް ކަށަވަރުކުރެވޭނެ ގޮތަށް ކުރިއަށް ގެންދިއުމަށް ގޮވާލައި ކެމްޕެއިނެއް ފަށައިފަ އެވެ.
އެ ގޮތުން އެންމެ ފުރަތަމަ ނޯވޭ އާއި ޖަރުމަނު ގައުމީ ޓީމުން ވަނީ ވޯލްޑް ކަޕް ކޮލިފައިން މެޗުތަކަށް ނުކުތުމުގެ ކުރިން ޓީޝާޓްތަކެއްގައި ހިއުމަން ރައިޓްސްގެ މެސެޖްތަކެއް ޖަހައިގެން ޝުއޫރުފާޅުކޮށްފަ އެވެ. އޭގެ ފަހުން ގިނަ ގައުމުތަކަކުން އަންނަނީ އެ ކެމްޕެއިންގައި ބައިވެރިވަމުންނެވެ.
