މާލެ ސަރަހައްދުގައި ކޮވިޑް ކޮންޓްރޯލް ކުރަން އަޅާފައިވާ ފިޔަވަޅުތަކުގެ ތެރެއިން ވިޔަފާރިތައް ހުޅުވާ ގަޑިތަކަށާއި ބައެއް ކަަހަލަ ފިޔަވަޅުތަކަށް ދޭން ނިންމާފައިވާ ލުއިތައް މިއަދު އިއުލާންކުރާނެ ކަމަށް މައުލޫމާތު ލިބިއްޖެ އެވެ.
ކޮވިޑް ބަލިމަޑުކަމުގެ ހަތަރުވަނަ ރާޅުގެ ތެރޭގައި ވިޔަފާރިތަކަށް އެޅި ފިޔަވަޅުތަކުގެ ތެރެއިން ކެފޭތަކާއި ސެލޫންތައް ފަދަ ބައެއް ކަހަލަ ވިޔަފާރިތައް ހުޅުވައިގެން ހިދުމަތް ދިނުން މަނާކޮށް، އެހެން ވިޔަފާރިތައް ހުޅުވައިގެން ހިދުމަތް ދެވޭ ގަޑިތައް މަދުކުރި އެވެ. އަދި އޮފީސްތަކަށް ވެސް ޒަރޫރީ ނޫން ބޭނުންތަކަށް ހުޅުވައިގެން މަސައްކަތްކުރުން މަނާކުރި އެވެ.
މިހާރު އެ ފިޔަވަޅުތައް އެޅިތާ މަހެއް ވާން ގާތްވެފައިވީ ނަމަވެސް އެންމެ ފަހުން ލުއިދިން އިރު ގިނަ ފިޔަވަޅުތަކަށް ބަދަލެއް ނާދެ އެވެ. ފިޔަވަަޅުތައް އެޅިއިރު މި ބައްޔަށް ފަރުވާ ހޯދަމުން ދިޔަ މީހުންގެ އަދަދުތައް 20،000 އިން މަތީގައި ހުރި ނަމަވެސް މިހާރު މި ބަލިން ފަރުވާ ހޯމަދުންދާ މީހުންގެ އަދަދުތައް ވަނީ 5،300 އަށް ތިރިވެފަ އެވެ.
އަދި، ކޭސްތަކުގެ އަދަދު ދަށަށް ދިޔަ ނަމަވެސް ލުއި ނުދޭތީ ވިޔަފާރިވެރިންގެ ޝަކުވާތައް ގިނަ އެވެ. ކޮވިޑުގައި ގިނަ ވިޔަފާރިތަކަށް ވަނީ ބޮޑެތި ގެއްލުންތަކެއް ލިބިފަ އެވެ.
ވިޔަފާރިވެރިންގެ ޝަކުވާތަކާއި ގުޅިގެން އިތުރު ލުއިތަކެއް ދޭން ނިންމާފައިވާ ވޭތޯ "އަދަދު" އިން ސުވާލުކުރުމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވި ގޮތުގައި މިއަދުގެ ވަގުތެއްގައި އިތުރު ލުއިތައް އިއުލާންކުރާނެ އެވެ. އަދި މި ހަފުތާގެ ތެރޭގައި ހުރިހާ ވިޔަފާރިއަކަށް ލުއި ނުލިބުނަސް އަންނަ ހަފުތާގައި އިތުރު ލުއިތައް އިއުލާން ކުރާނެ ކަމަށް ވިދާޅުވި އެވެ.
ހެލްތް ޕްރޮޓެކްޝަން އެޖެންސީ (އެޗްްޕީއޭ) އިން އެންމެ ފަހުން ދިން ލުއިތަކުގެ ތެރޭގައި ވިޔަފާރިތަކުގެ ތެރެއިން ހުއްދަ ދެވުނީ ސެލޫންތަކާއި ބޯކޮށާ ތަންތަން އުސޫލެއްގެ ތެރެއިން ހުޅުވައިގެން ހުއްދަ ދިނުމަށެވެ. އެހެން އެއްވެސް ވިޔަފާރިއަކަށް އިތުރު ލުއިތަކެއް ދީފައެއް ނުވެ އެވެ.
މިހާރުގެ ލުއިތައް އިއުލާންކުރަން ބޭއްވި ނޫސްވެރިންގެ ބައްދަލުވުމުގައި އެޗްޕީއޭއިން ބުނި ގޮތުގައި މިފަހަރު ލުއިތައް ދޭނީ އެއްފަހަރަކާ ނޫނެވެ. އޭގެ ބަދަލުގައި މިފަހަރު ލުއި ދޭނީ ދެމުންދެމުން ގޮސް ފިޔަވަޅުތައް ފަސޭހަކުރާ ގޮތަށް ކަމަށް ބުންޏެވެ.
މިހާރު އަޅާފައިވާ ފިޔަވަޅުތަކުގެ ސަބަބުން އެންމެ ބޮޑަށް ހީނަރުވަމުން އަންނަނީ ހިދުމަތުގެ ވިޔަފާރިތަކެވެ. އޭގެ ތެރޭގައި ކާބޯތަކެތީގެ ހިދުމަތް ދޭ ތަންތަނުން ފެށިގެން ސެލޫންތަކާއި ޖިމްތައް ހިމެނެ އެވެ.
