ތެހްރާން، އިރާން (ޖޫން 21) - އިރާނުގެ ދެކުނުގައި ހުންނަ ބުޝޭރް ނިއުކްލިއާ ޕަވާ ޕްލާންޓަށް ޓެކްނިކަލް މައްސަލައެއް ދިމާވެ ވަގުތީ ގޮތުން ހުއްޓުމަކަށް ގެނެސްފައިވާ ކަމަށް އެ ގައުމުގެ އެޓޮމޮކް އެނޭޖީއާ ގުޅޭ އިދާރާއިން ބުނެފި އެވެ.
"ބުޝޭރް ޕަވާ ޕްލާންޓުގައި ދިމާވި ޓެކްނިކަލް މައްސަލައަކަށް ފަހު އަދި އަދި އެނާޖީ މިނިސްޓްރީއަށް އެއް ދުވަހުގެ ނޯޓިސް ފޮނުވުމަށް ފަހު، ޕްލާންޓް ވަނީ ވަގުތީ ގޮތުން ބަންދުކޮށްފައި،" އެޓޮމިކް އެނާޖީ އޯގަނައިޒޭޝަން އޮފް އިރާނުގެ ވެބްސައިޓުގައި ބުންޏެވެ.
ވެބްސައިޓުގައި ޝާއިއު ކުރި ބަޔާނުގައި އިތުރަށް ބުނީ ކުޑަ ދުވަސްކޮޅެއްގެ ތެރޭގައި މައްސަލަ ހައްލުވާނެ ކަމަށާއި އޭރުން ޕްލާންޓުގެ މަސައްކަތް އަލުން ފަށާނެ ކަމަށެވެ.
އިއްޔެ އިރާނުގެ ނޭޝަނަލް އިލެކްޓްރިކް ކުންފުނިން ނެރުނު ބަޔާނެއްގައި އެދިފައިވަނީ ކަރަންޓު ބޭނުން ކުރާ މިންވަރު މަދު ކުރަން މަސައްކަތް ކުރުމަށެވެ. ހޫނުގަދަވުމުގެ ސަބަބުން ޑިމާންޑު ބޮޑުވެފައި ވާއިރު، ބުޝޭރް ޕްލާންޓުގައި މަސައްކަތްތަކެއް ކުރިއަށް ދާތީ، ޕީކް ގަޑިތަކުގައި ކަރަންޓު ބޭނުން ކުރުން މަދު ކުރުމަށް އެ ކުންފުނިން ރައްޔިތުންގެ ކިބައިން އެދުނެވެ.
އެ ކުންފުނިން އިތުރަށް ބުނީ އަންނަ ހުކުރު ދުވަހާ ހަމައަށް ބުޝޭރް ޕްލާންޓުގައި ކުރާ މަސައްކަތްތައް ކުރިއަށް ދާނެ ކަމަށެވެ.
ޖުމްލަ 1000 މެގަވޮޓްގެ ކަރަންޓު އުފައްދާ ބުޝޭރް ޕްލާންޓަކީ ރަޝިއާއިން 2013 ވަނަ ހަދައި ނިންމުމަށް ފަހު އިރާނާ ހަވާލު ކުރި ތަނެކެވެ.
އޭގެ ފަހުން 2016 ވަނަ އަހަރު ރަޝިއާ އާއި އިރާނުގެ ކުންފުނިތަކުން ވަނީ ބުޝޭރްގައި 1000 މެގަވޮޓްގެ އިތުރު ދެ ރިއެކްޓަރު ބެހެއްޓުމުގެ މަސައްކަތް ފަށާފަ އެވެ. އެ މަސައްކަތް ނިންމުމަށް 10 އަހަރު ހޭދަވާނެ ކަމަށް ބެލެވެ އެވެ.
އިރާނާ އަވައްޓެރި އަރަބި ގައުމުތަކުން ވަނީ ބުޝޭރް ޕްލާންޓާ މެދު މީގެ ކުރިން ކަންބޮޑުވުން ފާޅުކޮށްފަ އެވެ. އެގޮތުން އެ ޕްލާންޓުގެ މަސައްކަތް ރަނގަޅަށް ކުރިއަށް ދާނެ ކަމުގެ ޔަގީންކަން ކުޑަ ކަމަށް ގައުމުތަކުން ބުނެ އެވެ. އޭގެ އިތުރުން ބޮޑު ބިންހެލުމެއް ދިމާވެއްޖެ ނަމަ ރޭޑިއޯއެކްޓިވް ލީކެއް އައިސްދާނެ ކަމުގެ ބިރު ވެސް ގައުމުތަކުން ފާހަގަކުރެ އެވެ.
މިދިޔަ އޭޕްރިލް މަހު ބުޝޭރް ޕްރޮވިންސަށް އައި 5.9 މެގްނިޓިއުޑް ބިންހެލުމެއްގައި ފަސް މީހުންނަށް އަނިޔާވި ނަމަވެސް، ނިއުކްލިއާ ޕްލާންޓަށް ގެއްލުމެއް ނުވާ ކަމަށް އިރާނުން ބުނެ އެވެ.
ތެހްރާނާއި ބައެއް އެހެން ސިޓީތަކަށް މިދިޔަ މޭ މަހު ކަރަންޓު ކެނޑުމުގެ މައްސަލަ ދިމާވާން ފެށުމުން، ކަމާ ބެހޭ އިދާރާތަކުން މިހާރު އަންނަނީ ވަކި ގަޑިތަކުގައި ކަރަންޓު ކެނޑޭނެކަން ކުރީ ބައިގައި އިއުލާނު ކުރަމުންނެވެ.
ޑިމާންޑާ އެއް ވަރަށް ކަރަންޓު އުފެއްދުމުގެ މައްސަލަ ދިމާވެފައި ވަނީ އާދަޔާ ހިލާފަށް ހޫނު ގަދަވުމާއި، ވާރޭ ނުވެހި ގިނަ ދުވަސްވުމުން ހައިޑްރޯޕަވާ ނުވަތަ ފެނުން ހަކަތަ އުފެއްދުމަށް ހުރަސް އެޅުން ފަދަ ކަންކަމާ ހެދި ކަމަށް އިރާނުން ބުނެ އެވެ.
