ގުދުސް (ޖޫން 21) - އިޒްރޭލާއި ގާޒާ ކޮންޓްރޯލް ކުރާ ހަމާސްއާ ދެމެދު 11 ދުވަސް ވަންދަން ކުރި ހަމަލާ ބަދަލު ކުރުން ހުއްޓާލިތާ އެއް މަސް ފަހުން ގާޒާގެ ދަނޑުތަކުގައި ހައްދާ ތަކެތި ލިމިޓަކާއެކު އެކްސްޕޯޓް ކުރަން ހުއްދަ ދޭނެ ކަމަށް އިޒްރޭލުން ބުނެފި އެވެ.
ގާތްގަނޑަކަށް ދެ މިލިއަން ފަލަސްތީނު ރައްޔިތުން ދިރިއުޅޭ ގާޒާ އޮންނަނީ 2007 އިން ފެށިގެން ހުރިހާ ފަރާތަކުން ބައްދާލާފަ އެވެ. ގާޒާއަށް ވަދެ ނުކުތުމަށް އޮންނަ ހުރިހާ ރޫޓެއް ކޮންޓްރޯލް ކުރަނީ އިޒްރޭލުންނެވެ.
މިދިޔަ މަހުގެ ހަމަލަ ބަދަލު ކުރުމާ ދިމާކޮށް އިތުރު ފިޔަވަޅުތައް އެޅުމުގެ ސަބަބުން ގާޒާގެ ދަނޑުވެރިންގެ މަސައްކަތަށް ވަނީ ބުރޫ އަރާފަ އެވެ. ޓޮމާޓޯ އާއި ސްޓްރޯބެރީ ފަދަ ގިނަ އުފެއްދުންތަކުގެ ސަޕްލައި ގާޒާގައި މާ ބޮޑަށް އިތުރުވެ، އަގު ވަނީ ވެއްޓިފަ އެވެ.
ފަލަސްތީނު ރައްޔިތުންގެ ކަންކަމުގައި ބަސް ކިޔަން އޮންނަ އިޒްރޭލުގެ އިދާރާއިން ނެރުނު ބަޔާނެއްގައި ބުނީ ހޯމަ ދުވަހުން ފެށިން ވަކި މިންވަރަކަށް ތަކެތި އެކްސްޕޯޓް ކުރެވޭނެ ކަމަށެވެ. އެ ތަކެތި ގާޒާއިން ބޭރު ކުރަނީ ކެރެމް ޝަލޫމް މަގުންނެވެ.
އިޒްރޭލާއި ހަމާސްއާ ދެމެދު ހަމަލާ ބަދަލު ކުރުން ހުއްޓާލަން އެއްބަސްވީ މޭ 21 ގަ އެވެ. އެ ހަމަލާތަކުގައި 260 ފަލަސްތީނު މީހުންނާއި އިޒްރޭލުގެ 13 މީހުން މަރުވި އެވެ. ހަމަލާތައް ހުއްޓާލި ނަމަވެސް، މިދިޔަ ބުރާސްފަތި އަދި ހުކުރު ދުވަހު އަލުން ހަމަލާ ބަދަލުކޮށްފައި ވެ އެވެ.
