ވޮޝިންޓަން، އެމެރިކާ (ޖޫން 21) - އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށް ބޭނުންވާ ހަކަތަ އިތުރު ކުރަން ސޯލާ ޕެނެލް ހަރު ކުރުމުން ފްރާންސާއި އެމެރިކާގެ އެސްޓްރޮނޯޓަކު ހަ ގަޑިއިރު ވަންދެން ޖައްވުގައި "ހިނގާލައިފި" އެވެ.
"ކޮންމެ ފަހަރަކު ވެސް މިއީ ޓީމުގެ ބުރަ މަސައްކަތެއް. އެމެރިކާގެ އެސްޓްރޮނޯޓް [ޝޭން] ކިމްބްރޯ އާއެކު އެނބުރި އުޅަނދުގެ ތެރެއަށް ދިޔުމަަށް ވުރެ ވަކި ބޮޑު އުފަލެއް ނެތް،" ފްރާންސްގެ އެސްޓްރޮނޯޓު ތޯމަސް ޕެސްކުއޭ ކުރި ޓްވީޓެއްގައި ބުންޏެވެ.
ޕެސްކުއޭ މަސައްކަތް ކުރަނީ ޔޫރޮޕިއަން ސްޕޭސް އޭޖެންސީއާ އެކު އެވެ. ކިމްބްރޯއަކީ ނާސާގެ އެސްޓްރޮނޯޓެކެވެ. އެ ދެ އެސްޓްރޮނޯޓުން ވެސް ދުނިޔެއިން ބޭރަށް ދަތުރުކޮށް އައިއެސްއެސްއަށް ދިޔެއީ އޭޕްރިލް މަހުގެ ފަހުކޮޅު އެވެ.
މިއަދު އައިއެސްއެސްގައި ހަރުކުރި 60 ފޫޓު ދިގު ސޯލާ ޕެނެލްތައް ޖައްވަށް ފޮނުވީ މި މަހު ކުރީކޮޅު ސްޕޭސް އެކްސްއިން ކުރި ދަތުރެއްގަ އެވެ. އަންނަ ހުކުރު ދުވަހު ވެސް އިތުރު ޕެނަލްއެއް ހަރު ކުރަން އެސްޓްރޮނޯޓުން ޖައްވުގެ ތެރެއަށް ނުކުންނަން ޖެހޭނެ އެވެ.
އައިއެސްއެސްގައި ހިންގާ ދިރާސާ އަދި ސައިންސް ޕްރޮޖެކްޓުތަކަށް ހަކަތަ ހޯދަން ބޭނުންވާ މި ޕެނެލްތައް ކުރިއަށް އޮތް 15 އަހަރު ބޭނުން ކުރެވޭނެ އެވެ. ސޯލާ ޕެނެލް ހަރު ކުރުމުގެ މަސައްކަތަށް މި ދެ އެސްޓްރޮނޯޓުން މިދިޔަ ބުދަ ދުވަހު ވެސް ޖައްވުގެ ތެރެއަށް ނުކުތެވެ.
ނަމަވެސް ކިމްބްރޯގެ ސްޕޭސް ސޫޓަށް މައްސަލަތަކެއް ދިމާވެ، އެނބުރި އައިއެސްއެސްއަށް ދާން ޖެހުނީ އެވެ. މިއަދު މި ދެ އެސްޓްރޮނޯޓުން ކާމިޔާބުކަމާއެކު މަސައްކަތް ނިންމާލިއިރު، މިއީ އެ ދެ މީހުން އެކުގައި ޖައްވުގައި މަސައްކަތް ކުރި ހަތަރު ވަނަ ފަހަރެވެ.
މިހާތަނަށް އައިއެސްއެސްގެ އެކި މަސައްކަތްތަކަށް 240 ފަހަރަކު އެސްޓްރޮނޯޓުން ސްޓޭޝަނުން ބޭރަށް ނުކުމެ ޖައްވުގައި ހިނގާލާފައި ވެ އެވެ.
