އަބްހާ، ސައުދީ އަރަބިއްޔާ (ޖޫން 21) - ސައުދީ އަރަބިއްޔާގައި ތިބޭ އެމެރިކާ ސިފައިން މަދު ކުރުމުން ދިފާއީ މަސައްކަތަށް އަސަރެއް ނުކުރާނެ ކަމަށް ސައުދީ އަރަބިއްޔާއިން ބުނެފި އެވެ.
ސައުދީ އަރަބިއްޔާއިން އިސް ނަގައިގެން އުފެއްދި މުސްލިމް ގައުމުތަކުގެ އަސްކަރީ ކޯލިޝަނުން އެހެން ބުނެފައި ވާއިރު، ޔަމަނުގެ ހޫތީ ހަނގުރާމަވެރިން އެއް ދުވަހެއްގެ ތެރޭ އެންމެ ގިނަ ޑްރޯން ހަމަލާ ދިނުމުން، އެ ހަމަލާތައް ވަނީ ހުއްޓުވާފަ އެވެ.
މިދިޔަ ހުކުރު ދުވަހު އެމެރިކާއިން ބުނީ މެދުއިރުމަތީގައި އުޅޭ ސިފައިންނަށް ވައިގެ ޔުނިޓުތައް މަދު ކުރަން ނިންމާފައިވާ ކަމަށެވެ. އޭގެ ތެރޭގައި ސައުދީ އަރަބިއްޔާގައި ހުންނަ އެންޓި މިސައިލް ސިސްޓަމް ވެސް ހިމެނެ އެވެ.
"މީގެ ސަބަބުން ސައުދީގެ ވައިގެ ދިފާއީ މަސައްކަތަށް އަސަރެއް ނުކުރާނެ،" ކޯލިޝަނުގެ ތަރުޖަމާނު ތުރުކީ އަލް މާލިކީ ނޫސްވެރިންނަށް ވިދާޅުވި އެވެ.
"މި ސަރަހައްދުގައި ހުރި ނުރައްކާތަކާ ގުޅޭ ގޮތުން އަޅުގަނޑުމެންގެ ބައިވެރިންނާއެކު އޮތީ ރަނގަޅު ވިސްނުމެއް. މި ގައުމު ދިފާއު ކުރުމުގެ ބާރު އަޅުގަނޑުމެންގެ އަތުގައި އެބަ އޮތް."
އެމެރިކާގެ ނިންމުން އައިސްފައިވާ މި ދަނޑިވަޅަކީ ސައުދީ އަރަބިއްޔާއާ އެންމެ ބޮޑު ހަތުރު، އިރާނާއެކު އޮތް ގުޅުން ރަނގަޅު ކުރަން އެމެރިކާގެ ރައީސް ޖޯ ބައިޑެން މަސައްކަތް ކުރައްވަމުންދާ ދަނޑިވަޅެކެވެ.
ސައުދީގައިވާ އެންޓި މިސައިލް ސިސްޓަމްތައް ހިމެނޭ ގޮތަށް މެދުއިރުމަތީގައި އެމެރިކާގެ އަސްކަރީ ދެމިއޮތުން ކުޑަ ކުރަން ނިންމިއިރު، ޔަމަނުގެ ހޫތީން ފޮނުވާ ހަމަލާތައް ހުއްޓުވަން އެ ސިސްޓަމް މުހިއްމެވެ. އެމެރިކާގެ ސިސްޓަމްތައް ނުލައި، ސައުދީ އަރަބިއްޔާގައި ހުންނާނީ އެފަދަ ކިތައް ސިސްޓަމް ކަމެއް ހާމައެއް ނުކުރެ އެވެ.
އިރާނުގެ އެއްބާރުލުމާއެކު ޔަމަނުގައި ހަނގުރާމަ ކުރަމުންދާ ހޫތީން އިއްޔެ ވަނީ ސައުދީ އަރަބިއްޔާއަށް 17 ޑްރޯން ހަމަލާ ފޮނުވާފަ އެވެ. އެ ހުރިހާ ހަމަލާއެއް ވެސް ހުއްޓުވި އެވެ.
އޭގެ ކުރިން ހުކުރު ދުވަހު 11 ޑްރޯން ހަމަލާ ފޮނުވުމުން، އެ ހަމަލާތައް ވެސް ހުއްޓުވި އެވެ. ނަމަވެސް މި މަހުގެ ކުރީކޮޅު ބޮމަކާއެކު ފޮނުވި ޑްރޯނެއް ސްކޫލެއްގެ ތެރެއަށް ވެއްޓުނެވެ. އެ ހާދިސާގައި އެއްވެސް މީހަކަށް އަނިޔާއެއް ނުވެ އެވެ.
ޔަމަނުގެ ހަ އަހަރުވީ ދާހިލީ ހަނގުރާމަ ނިމުމަކަށް ގެންނަން އދ. އާއި އެމެރިކާ އަދި ސަރަހައްދީ ގައުމުތަކުން ކުރާ ޑިޕްލޮމެޓިކް މަޝްވަރާތަކުން މިހާތަނަށް އަލިމަގެއް ނުފެނެ އެވެ.
ޔަމަނުގެ ދާހިލީ ހަނގުރާމަ 2014 ގައި ފެށީ އިންތިހާބީ ސަރުކާރާ ދެކޮޅަށް ހޫތީ ހަނގުރާމަވެރިން ތެދުވުމުންނެވެ. އިރާނުން ހޫތީންނަށް އެހީވާއިރު، ސަރުކާރުގެ ފައުޖުތަކާއެކު ސައުދީ އަރަބިއްޔާގެ ކޯލިޝަނުން އަންނަނީ ހަނގުރާމަ ކުރަމުންނެވެ.
ހަނގުރާމައިގެ ނޭދެވޭ އަސަރު އާއްމުންނަށް ވަރަށް ބޮޑަށް ކޮށްފައި ވާއިރު، މިލިއަނަކަށް ވުރެ ގިނަ މީހުން އުޅެނީ ބަނޑުހައި ހޫނުކަމުގައި ކަމަށް އދ. އިން ބުނެފައި ވެ އެވެ.
