މޮސްކޯ، ރަޝިއާ (ޖޫން 20) - އެމެރިކާ އާއި ރަޝިއާގެ ރައީސުން މިދިޔަ ހަފްތާގައި ބޭއްވި ބައްދަލުވުމުގައި އެއްބަސްވި ގޮތަށް ރަޝިއާގެ ސަފީރު އަނބުރާ އެމެރިކާއަށް ވަޑައިގެންފި އެވެ.
އެމެރިކާއާ އޮތް ގުޅުން ގޯސްވެ ސަފީރު އެނެޓޮލީ އެންޓޮނޮވް މިދިޔަ މާޗް މަހު ވަނީ މޮސްކޯއަށް ވަޑައިގެންފަ އެވެ. ނަމަވެސް މިއަދު ހެނދުނު އޭނާ ވަނީ އަލުން ވޮޝިންޓަނަށް ވަޑައިގެންފަ އެވެ.
"ދެ ރައީސުންގެ މެދުގައި ދެކެވުނު ވާހަކަތަކުން ނުކުމެފައިވާ ނަތީޖާއަށް ބަލާއިރު، އަޅުގަނޑަށް ފެންނަނީ ހަމަހަމަ އަދި އެއްބާރުލުންދެވޭ ގުޅުމެއް ދެ ގައުމުގެ މެދުގައި ބޭއްވިދާނެ ކަމަށް،" އާރްއައިއޭ ނޮވޮސްތީ ނިއުސް އޭޖެންސީއަށް އެންޓޮނޮވް ވިދާޅުވި އެވެ.
މިދިޔަ ބުދަ ދުވަހު ރަޝިއާގެ ރައީސް ލެޑިމިއަ ޕޫޓިން އާއި އެމެރިކާގެ ރައީސް ޖޯ ބައިޑެންއާ ދެމެދު ބޭއްވި ބައްދަލުވުމަށް ފަހު އެއްބަސްވީ އަލުން ސަފީރުން ބޭތިއްބުމަށެވެ.
އެމެރިކާގެ އިންތިހާބަށް ނުފޫޒު ފޯރުވި ކަމަށާއި ސައިބަ ހަމަލާތަކުގެ ފަހަތުގައި ވަނީ ރަޝިއާ ކަމަށް ބައިޑެން ތުހުމަތު ކުރައްވާފައި ވާތީ، އޭގެ ކުރިން ދެ ގައުމުގެ ގުޅުން އޮތީ ވަރަށް ބޮޑަށް ހީނަރުވެފަ އެވެ.
ޕޫޓިންއަކީ "މީހުން މަރާ މީހެއްގެ" ގޮތުގައި ސިފަކުރެއްވުމުން އެންމެ ފަހުން ވޮޝިންޓަނުގައި ހުރި ސަފީރު އެންޓޮނޮވް އަނބުރާ މޮސްކޯއަށް ގެންދަން ނިންމި އެވެ. އަދި މޮސްކޯގައި ހުންނަ އެމެރިކާގެ ސަފީރު ޖޯން ސަލިވަން ވެސް އެމެރިކާއަށް ފޮނުވާލި އެވެ.
އެމެރިކާގެ އެމްބަސީގެ ތަރުޖަ،ާނު ޖޭސަން ރެބޯލްޒް ސަފީރު ސަލިވަންއާ ހަވާލަދީ ކުރެއްވި ޓްވީޓެއްގައި ވިދާޅުވީ ވަރަށް އަވަހަށް މޮސްކޯއަށް އެނބުރި ވަޑައިގަންނަވާނެ ކަމަށެވެ.
