އާއްމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުން ފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމާ ގުޅިގެން ދީނީ އިލްމުވެރިންގެ މެދުގައި އުފެދިފައިވާ ކަންބޮޑުވުންތައް ހައްލުކޮށްދެއްވާނެ ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހް ދެއްވައިފި އެވެ.
ނަފްރަތުގެ ބިލާ މެދު އަދާލަތުގެ ޕާޓީގައި ހުރި ކަންބޮޑުވުންތައް ހިއްސާ ކުރުމަށް އެ ޕާޓީގެ އިސް ބޭފުޅުން މިއަދު ވަނީ ރައީސާ ބައްދަލުކުރައްވާފަ އެވެ.
އެ ބައްދަލުވުމަށްފަހު އަދާލަތު ޕާޓީން ބުނީ ނަފްރަތުގެ އަމަލެއް ހިންގުން ކުށަކަށް ހެދުމަށް މަޖިލީހަށް ހުށަހަޅާފައިވާ ބިލާ ބެހޭ ގޮތުން ރައީސާ މަޝްވަރާ ކުރެވުނު ކަމަށާއި، އެ ކަންބޮޑުވުންތަކަށް ހައްލު ހޯއްދަވައި ދެއްވާނެ ކަމަށް ރައީސް ވިދާޅުވި ކަމަށެވެ.
"މި ބިލު ގާނޫނަކަށް ވެގެން އަންނައިރު، ރައްޔިތުންނާއި ދީނީ އިލްމުވެރިންގެ މެދުގައި އުފެދިފައިވާ ކަންބޮޑުވުންތަކަށް ހައްލު ހޯއްދަވާނެ ކަމުގެ ޔަގީންކަން ދެއްވި،" އަދާލަތުން ބުންޏެވެ.
އިލްމުވެރިން ރައީސާ ބައްދަލު ކޮށްފައިވާއިރު، މަޖިލީހަށް ހުށަހެޅި އެ ބިލް އަނބުރާ ގެންދަން 101 އިލްވެރިޔަކު ސޮއި ކުރައްވައި ރައީސަށް ވަނީ ޕެޓިޝަނެއް ފޮނުވާފަ އެވެ.
ޕެޓިޝަނުގައި އިލްމްވެރިން ބުނެފައިވާ ގޮތުގައި، ބިލްގެ ސަބަބުން އިސްލާމްދީނާ ދެކޮޅަށް ހިންގާ ބޮޑެތި މުންކަރާތްތަކާއި ނުރަނގަޅު ގޯސް ކަންތައްތައް ނުކުރުމަށް އިލްތިމާސްކޮށް، އާންމުން ހޭލުންތެރިކުރުމަށް އިލްމްވެރިންނަށް އަދި އެހެން ފަރާތްތަކަށް ވެސް ހުރަސް އެޅިގެންދާނެ އެވެ.
ބިލްގެ ސަބަބުން ނުރަނގަޅު ނަތީޖާއެއް ނުނުކުންނާނެ ކަމުގެ ޔަގީންކަން ރައީސް ދެއްވި ނަަމަވެސް، އެހެން ބަޔަކަށް ސަރުކާރުގެ ބާރުތައް ލިބުމުން ބިލްގެ ޒަރިއްޔާއިން ނުރަނގަޅު ނަތީޖާތަކެއް ނުނެރޭނެ ކަމުގެ ޔަގީންކަން ހުދު ރައީސްއަށް ވެސް ނުދެއްވޭނެ ކަމަށް ޕެޓިޝަންގައިވެ އެވެ.
އެހެންވެ އެއްވެސް ބަޔަކަށް އެފަދަ ކަމެއް ކުރުމަށް މަގު ތަނަވަސްކޮށް ނުދިނުމަށް އިލްތިމާސްކޮށްފައިވެ އެވެ.
