މާލޭ ސިޓީ ކައުންސިލްގެ ޑެޕިއުޓީ މޭޔަރަކަށް މާފަންނު މެދު ދާއިރާގެ މެމްބަރު އަހުމަދު ނަރީޝް އިންތިހާބު ކުރަން ޕީޕީއެމުން މިއަދު ނިންމައިފި އެވެ.
ޕީޕީއެމުން މިއަދު އެގޮތަށް ނިންމީ އެ ޕާޓީން މާލޭ ސިޓީ ކައުންސިލަށް އިންތިހާބުވެފައިވާ މެމްބަރުންގެ މެދުގައި ނެގި ސިއްރު ވޯޓަކުންނެވެ. ނަރީޝަށް ލިބިވަޑައިގަތީ، ފަސް ވޯޓެވެ.
ޑެޕިއުޓީ މޭޔަރު ކަމަށް ވާދަ ކުރި މެމްބަރުންގެ ތެރެއިން ވިލިމާލެ ދާއިރާގެ މެމްބަރު ނަހުލާ އަލީއަށް 4 ވޯޓް ލިބިވަޑައިގަތް އިރު ހުޅުމާލެ ދާއިރާގެ ކައުންސިލަރު އިބްރާހިމް ސުޖާއަށް ލިބިވަޑައިގަތީ 4 ވޯޓެވެ.
ނަރީޝް: އޭނާ ހޮވިވަޑައިގަތީ ވޯޓުގައި ބައިވެރިވެވަޑައިގަތް 13 މެމްބަރުންގެ ތެރެއިން ފަސް ވޯޓުން.
ޑެޕިއުޓީ މޭޔަރު އިންތިހާބު ކުރުމަށް ސިޓީ ކައުންސިލްގެ މެމްބަރުންގެ މެދުގައި ވޯޓް ނެގުން އޮތީ މާދަމާ އެވެ. ޑެޕިއުޓީ މޭޔަރު އިންތިހާބު ކުރަނީ ކައުންސިލްގެ މެމްބަރުންގެ މެދުގައި ނަގާ ސިއްރު ވޯޓަކުންނެވެ.
މާލޭ ސިޓީ ކައުންސިލްގެ މޭޔަރު ހިމެނޭ ގޮތަށް 19 މެމްބަރުން އިންތިހާބު ކޮށްފައިވާއިރު އޭގެ ތެރެއިން 12 ގޮނޑި ކާމިޔާބު ކޮށްފައިވަނީ އިދިކޮޅު ކޯލިޝަން ޕީޕީއެމް/ޕީއެންސީ އިންނެވެ. އަދި ޖުމްހޫރީ ޕާޓީން ހޮވުނު މެމްބަރަކު ފަހުން ޕީޕީއެމާ ގުޅުމުން އެ ޕާޓީގެ 13 މެމްބަރުން ކައުންސިލްގައި ތިއްބަވަ އެވެ. އެހެން ކަމުން ޑެޕިއުޓީ މޭޔަރަކަށް އަންނާނީ ޕީޕީއެމުން ކަނޑައަޅާ މެމްބަރެކެވެ.
