ތެހްރާން، އިރާން (ޖޫން 19) - މިދިޔަ ހުކުރު ދުވަހު ކުރިއަށް ދިޔަ އިރާނުގެ ރިޔާސީ އިންތިހާބުގައި އިނގިރޭސި ވިލާތުގައި ދިރިއުޅޭ އެ ގައުމުގެ ރައްޔިތުންނަށް ވޯޓުލާ މަރުކަޒުތަކުގައި ހަމަނުޖެހުމާ ކުރިމަތިވި ކަމަށް ބުނެ، އިނގިރޭސި ސަފީރު ހާޒިރުކޮށްފި އެވެ.
އިރާން ފޮރިން މިނިސްޓްރީގެ ތަރުޖަމާނަކު ވިދާޅުވީ ދިމާވި ހަމަނުޖެހުންތަކުގެ ތެރޭގައި ވޯޓުލާން ދިޔަ އަންހެން މީހަކަށް "އަނިޔާކުރުން" ހިމެނޭ ކަމަށެވެ.
ހަމަނުޖެހުން އުފެއްދީ "އިންގިލާބާ ދެކޮޅު، ޑިމޮކްރެސީއާ ދެކޮޅު އަދި ވޯޓުލާ މީހުންނާއި މަރުކަޒުތަކުގެ މުވައްޒަފުންނަށް ފުރައްސާރަ ކުރި ޓެރަރިސްޓުން" ކަމަށް ތަރުޖަމާނު ސައީދު ހާތިބްޒާދޭ ނެރުއްވި ބަޔާނުގައި ވިދާޅުވި އެވެ.
އިނގިރޭސި ވިލާތުގެ އިތުރުން، އެމެރިކާ، އޮސްޓްރޭލިއާ އަދި ބައެއް އެހެން ގައުމުތަކުގައި ވެސް އިރާނުގެ ރައްޔިތުން ވޯޓުލާން ގޮސް ތިބި ވަގުތު ހަމަނުޖެހުމާ ކުރިމަތިވި ކަމަށް އިރާނުގެ މީޑިއާއިން ރިޕޯޓުކުރެ އެވެ.
އިންތިހާބުން ކުރި ހޯއްދެވީ އަލްޓްރާ ކޮންޒަވޭޓިވް އިބްރާހިމް ރައިސީ ކަމަށް ވަނީ އިއުލާނުކޮށްފަ އެވެ. އިންތިހާބުގައި ވޯޓުލެވޭ އާބާދީގެ 48.8 ޕަސެންޓު މީހުން ވޯޓުލާން ނުކުތެވެ. މިއީ އިރާނުގެ ރިޔާސީ އިންތިހާބެއްގައި އެންމެ މަދުން މީހުން ވޯޓުލާން ނުކުތް ފަހަރެވެ.
އިރާނުން އަރުވާލެވިގެން އުޅޭ އިދިކޮޅު ފަރާތްތަކުން ވަނީ އިންތިހާބު ބޮއިކޮޓް ކުރަން ސަޕޯޓަރުންނަށް ބާރު އަޅާފަ އެވެ.
ލަންޑަނާއި، ބާމިންހަމްގައި ވޯޓުލާ މަރުކަޒުތަކުގައި ހަމަނުޖެހުން ހިންގި ކަމަށް ބުނެ، އިނގިރޭސި ސަފީރު ރޮބް މެކެއާ ފޮރިން މިނިސްޓްރީއަށް ހާޒިރުކޮށްފައި ވާއިރު، ގާނޫނީ ފިޔަވަޅު އަޅާނެ ކަމުގެ އިންޒާރު ވަނީ ދީފަ އެވެ.
އިނގިރޭސި ވިލާތުގައި ހުންނަ އިސް ޑިޕްލޮމެޓަކު އިއްޔެ ޓްވިޓާގައި ބުނީ ބާމިންހަމްގެ ވޯޓުލާ މަރުކަޒެއްގެ ބޭރުގައި ހުރި އަންހެނަކަށް ގްރޫޕަކުން އައިސް ހަމަލާދީ، އަނިޔާކުރި ކަމަށެވެ.
ޓްވީޓާއެކު ޕޯސްޓުކުރި ވީޑިއޯއިން ފެންނަނީ ފިރިހެނުންތަކެއް ދިދަ ދަނޑިތަކެއް ހިފައިގެން އައިސް އަންހެނެއްގެ ގައިގައި ތަޅާ މަންޒަރެވެ.
އޭގެ އިތުރުން އިނގިރޭސި ވިލާތުގައި ހިންގާ ބީބީސީ ފާރިސީ އަދި އިރާން އިންޓަނޭޝަނަލް ނޫހުން އިންތިހާބް ބޮއިކޮޓް ކުރުމަށާއި ހަމަނުޖެހުން ހިންގަން ހިތްވަރު ދިން ކަމަށް ބުނެ ވެސް އިނގިރޭސި ސަފީރަށް އިރާނުން ޝަކުވާ ހުށަހެޅި އެވެ.
އެމެރިކާގައި ވޯޓުލާން ދިޔަ އިރާނު މީހުންނަކީ "ގައްދާރުން" ގެ ގޮތުގައި އެ ގައުމުގައި އުޅޭ އިރާނުގެ އިދިކޮޅު ފަރާތްތަކުން ވަނީ ސިފަކޮށްފަ އެވެ. އެމެރިކާ އާއި އިރާނާ ދެމެދު ޑިޕްލޮމެޓިކް ގުޅުމެއް ނޯވެ އެވެ.
